PUASAINA 6 - Mara Bible RV (BSI)

Khazohpa ta Mawsi a tuah

¹ Abeipa ta Mawsi hnohta, “Tahmâ cha Phiraoh chô liata ei tao awpa na hmô bâ aw. Ei ku thatlôpa a hmôpa vâta, Izarei sawzy pasiesa aw ta; ei ku thatlôpa a hmôpa vâta, a râh tawhta a papua aw ei,” tah ta.

² Khazohpa ta Mawsi cha bie a chho ta, a hnohta, “Kei he Zehôvâh ei châ.

³ Abarahâ, Aisika nata Zakaw zy hnohta Khazohpa Atotaotheipa ta a vaw luah na ta, ei moh Zehôvâh ta deikua cha ama hnohta a pahnosa va na.

⁴ Khichhaipa châpa ta ama vaw pahrâna Kâna râh cha âmo pie awpa ta ama hnohta bie hraih na ta.

⁵ Cha dei châ vei, Izi mo ta sei ta ama hraipa Izarei sawzy a hrôpa thei na ta, ei biehrai ei thei thlâh haw.

⁶ Chavâta Izarei sawzy hnohta, ‘Zehôvâh ta hetana heta a tah: Kei he Zehôvâh ei châ. Izi mo ta phaohri ama cha pavina ry tawhta cha thaoh papuapa ta, ama sei châna tawhta cha pachha aw ei na ta, bâh pazawhpa nata pachiana rônahpa ta ei cha chatlai aw ei.

⁷ Ei phopi châta cha hnei aw ei na ta, nama Khazohpa ei châ aw. Chatanachata kei he Izi mo ta phaohri ama cha pavina tawhta châ thaoh papuatuhpa Zehôvâh nama Khazohpa ei châ tahpa nama pahno aw.

⁸ Abarahâ, Aisika nata Zakaw zy hnohta pie awpa ta ei ku chaluahpa ta bie ei taihpa râh lâ châ chhi aw ei na ta, cha râh cha nama ryuto châta ei cha pie aw ei, kei he Zehôvâh ei châ,’ tahpa ta chho mah y,” tah ta.

⁹ Mawsi ta Izarei sawzy hnohta cha hawhna chata reih ta, châhrasala ama palôh a chhâ kawpa vâ nata ama seichâna ru ngaitapa zy vâta Mawsi bie cha thei thai khao veih ei.

¹⁰ Chatawhcha Abeipa ta Mawsi hnohta,

¹¹ “Vawh la, Izi bei Phiraoh hnohta, Izarei sawzy cha a râh tawhta papuasa awpa ta kei chho teh,” tah ta.

¹² Châhrasala Mawsi ta Abeipa hnohta, “Pachâ teh, Izarei sawzy hmahta eina nathlie khoh leipa khiah ei ta cha, Phiraoh chhochhi ta cha keima kahchôleiâpa biereipa cha kheihta ma a nathlie khoh aw,” tah ta.

¹³ Abeipa ta Mawsi nata Arawna cha bie a chho ta, Izarei sawzy chô liata nata Phiraoh chô liata biehnei awpa nata Izarei sawzy Izi râh tawhta a chhi papua awpa ta âmo cha biepie ta.

Mawsi nata Arawna pathlazy

¹⁴ Hezy he Mawsi nata Arawna pathlatuhpa chhôhkha luhpazy ama châ: Izarei sawchapaw uhtheipa Rubena sawchapawzy cha Hanô, Pâluh, Hezrô nata Kâmi zy châ ei ta, chazy cha Rubena phozy ama châ.

¹⁵ Simeôna sawchapawzy cha Zemua, Zami, Ôhâ, Zaki, Zôhâ nata Kâna zuah liata a sawchapaw Sawla zy châ ei ta, chazy cha Simeôna phozy ama châ.

¹⁶ Hezy he ama thyutôna a laichadaipa ta Livai sawchapawzy moh châ ta, chazy cha Kesao, Kôhâ nata Merâri zy ama châ. Livai hro chhôh kôzy cha, kô 137 a châ.

¹⁷ Kesao sawchapawzy cha, ama pho zipa ta, Libani nata Simei ama châ.

¹⁸ Kôhâ sawchapawzy cha Amrâ, Izah, Hebraw nata Uzie zy châ ei ta, Kôhâ hro chhôh kôzy cha, kô 133 a châ.

¹⁹ Merâri sawchapawzy cha Mâhli nata Musi ama châ. Hezy he ama thyutôna a laichadaipa ta Livai phozy ama châ.

²⁰ Amrâ ta a paw sietanô Zôkebe cha lapinô ta hnei ta, ano ta Arawna nata Mawsi sapa ta, Amrâ hro chhôh kôzy cha, kô 137 a châ.

²¹ Izah sawchapawzy cha Kôrâ, Nephe nata Zikari zy ama châ.

²² Uzie sawchapawzy cha Misela, Elzaphâ nata Sithari zy ama châ.

²³ Arawna ta Aminadâ sawchanô, Nâsô sietanô Elisebâ cha lapinô ta hnei ta, ano ta Nâdâ, Abihu, Eliaza nata Ithamâ zy a sapa ei.

²⁴ Kôrâ sawchapawzy cha Asi, Elkânâ nata Abiasa zy châ ei ta, chazy cha Kôrâ phozy cha ama châ.

²⁵ Arawna sawchapawpa Eliaza ta Putie sawchanôzy hry liata pakha lapinô ta hnei ta, ano ta Phinehâ sapa ta. Chazy cha ama pho tawhta a laichadaipa ta, Livai chizy pathlatuh thabypazy ama châ.

²⁶ Âmo cha Abeipa ta, “Izarei sawzy cha ama py yzie lymâ hawhta Izi râh tawhta a chhi papua teh u,” tahpa ta a chhopa Arawna nata Mawsi kha ama châ.

²⁷ Cha Mawsi nata Arawna cha, Izarei sawzy Izi râh tawhta a chhi papua awpa ta, Izi bei Phiraoh a chhotuhpa ama châ.

²⁸ Abeipa ta Izi râh liata Mawsi bie a chho nona khata,

²⁹ Abeipa ta Mawsi hnohta, “Kei he Abeipa ei châ. Na hnohta ei reipa zydua Izi bei Phiraoh chho mah y,” tah ta.

³⁰ Châhrasala Mawsi ta Abeipa hnohta, “Kei he kahchôleiâpa châ tlôh na ta, keima hawhpa biereipa cha Phiraoh ta kheihta ma a nathlie khoh aw?” tah ta.