PUASAINA 5 - Mara Bible RV (BSI)

Mawsi nata Arawna Phiraoh hmiakô liata

¹ Cha khai tawhta, Mawsi nata Arawna cha vawh ei ta, Phiraoh hnohta, “Zehôvâh, Izarei Khazohpa ta, ‘Râhchawhpa liata ei châta kyhchhi ama tao thei nawpa ta, ei phopi pasiesa teh,’ a cha tah,” tah ei ta.

² Phiraoh ta, “Abeipa cha ahy maw? A bie zyh ta, Izarei cha ei pasiesa awpa cha ahy ma a châ? Abeipa cha pahno va na, Izarei chhao pasiesa aw va na,” tah ta.

³ Âmo ta, “Hebraizy Khazohpa ta miah za tly ha ta, chavâta Khazohpa lâ eimâ theih thei nawpa ta, ngiachhiepa ta noh thôh lâsie râhchawhpa lâ miah pasiesa mah y. Chataleipatala potlana ta tlyma, zaozi ta tlyma, miah a hrie pathlei aw,” tah ei ta.

⁴ Izi bei ta ama hnohta “Nâmo, Mawsi nata Arawna, khazia zawpizy cha ama raihria tawhta nama la papua? Nama rai kei hria molo teh u,” tah ta.

⁵ Phiraoh ta, “Moh teh u, he phopi he a râh phopi hlâta hluh via ha bâ ei ta, ama raihriazy tlao nama chalihsa haw,” tah ta.

⁶ Cha noh tlai chata Phiraoh ta raihria hyutuhpazy nata vaituhpazy hnohta,

⁷ “Leiraopa tao nawpa ta sawphao nama pie tyhpa hawhna khata nama pie awpa châ khao vei. Âmo tlai ta sie aw ei ta, sawphao amâ pakhy pâ aw.

⁸ Leiraopa deikua cha, ama tao tyhpa zie a hnaw pazao aw ei chi ta, nama pachyh via awpa châ vei, thathipa ama châ hih. Chavâta awh ei ta, ‘Eima Khazohpa lâ eimâ theih thei nawpa ta, miah pasiesa teh,’ ama tahpa a châ.

⁹ Chyhsazy he rai ru viapa ta pavipa châ ei sala, cha raizy liata ngosiah ei sala, haipa bie rei awpazy ama pachâ khao leina hâh ta,” tahpa ta biepie ta.

¹⁰ Raihria hyutuhpazy nata vaituhpazy cha pua ei ta, Izarei phopi hnohta, “Phiraoh ta hetana heta a tah: ‘Sawphao cha pie khao aw veih ei na.

¹¹ Nâmo tlai ta sie aw ei chi ta, sawphao tlua aw ei chi ta, nama hmôna su tawhta nama vaw paly aw. Nama rai deikua cha pachyh viapa châ aw vei,’ a tah,” tah ei ta.

¹² Chatanachata Izarei sawzy cha Izi râh zydua liata a khie ei ta, sawphao vyuhpa ta sâhkô chuahmi pakhy laih ei ta.

¹³ Raihria hyutuhpazy ta, “Sawphao y nota noh kha ta nama hriapa zie kha nama patlô lymâ awpa a châ” tah ei ta, âmo cha tophi ei ta.

¹⁴ Phiraoh raihria hyutuhpazy ta, Izarei sawzy hry liata raihria vaituhpa ta ama raopazy cha tu ei ta, “Khazia leiraopa nama tao tyhpa zie zâhnia nata tanoh nama tao vei?” tah ei ta.

¹⁵ Izarei saw raihria vaituhpazy cha Phiraoh lâ vawh ei ta, a hnohta, “Khazia châ chakaotuhpazy he, he hawhta miah na tao?

¹⁶ Châ chakaotuhpazy he sawphao rai miah pie khao leipa ei ta, chatanachôta ‘Leiraopa tao teh u,’ miah ama tah. Moh tua, châ chakaotuhpazy he miah tu ei ta, châhrasala na chyhsazy thaileipa a châ,” tahpa ta ama nôpona bie tlôkhei ei ta.

¹⁷ Châhrasala Phiraoh ta, “Thathipa nama châ, thathipa nama châ, chavâta ‘Abeipa lâ eimâ theih thei nawpa ta, miah pasiesa teh,’ nama tahpa a châ.

¹⁸ Tahmâ vawh u la, rai kei hria teh u. Sawphao piepa châ aw veih ei chi. Châhrasala leiraopa tao awpa taihpa zie nama tao pyly awpa a châ,” tah ta.

¹⁹ “Noh kha ta nama hria awpa, nama leiraopa tao awpa zie pachyh via hlei aw veih ei chi,” tahpa bie ama thei nahta, raihria vaituhpa Izarei sawzy cha, ama topa a chhiezie pahno ei ta.

²⁰ Phiraoh tawhta ama pua nahta, âmo a vaw hâ thlâh hapa Mawsi nata Arawna cha a tyh ei ta,

²¹ ama hnohta, “Abeipa ta cha moh ei sala, cha pachia mawh ei sy. Phiraoh nata a chakaotuhpazy mohmô liata roh chhiepa ta miah tao ei chi ta, miah thie awpa ta ama ku liata zaozi nama chabasa ha hih,” tah ei ta.

Mawsi thlahchhâna

²² Mawsi cha Abeipa lâ a heih ta, a hnohta, “Hy Abeipa, khazia ma he phopi chô liata hmo pha leipa na tao tly? Khâpa vâta ma eina tuah chi?

²³ Na moh ta bie rei awpa ta Phiraoh lâ ei vy rakha tawhta, Phiraoh ta he phopi chô liata moleina hmo tao ta, nâ hra ta na phopi he pachha tlôh chi va,” tah ta.