PUASAINA 39 - Mara Bible RV (BSI)

Theihthaipa chysia

¹ Su Pathaihpa liata chakao nawpa ta, pala nohpa, saihdôhpa nata saihlawpazy hmâpa ta chysia ngia ngaitapazy tao ei ta. Abeipa ta Mawsi hnohta bie a piepa hawhta, Arawna châta chysia pathaihpazy tao ei ta.

² Ngôh, pala nohpa, saihdôhpa, saihlawpa nata pala rih dipa pabaohpazy hmâpa ta ephaw tao ta.

³ Pala nohpa, saihdôhpa, saihlawpa nata pala rih dipazy cha zôpha kawpa ta a kiky pakyu nawpa ta, ngôh cha â pa kadiepa ta paphiapa ta, a ri ta pachhaih ei ta.

⁴ Theihthaipa viahkao châta a ngiatlâh rizy tao ei ta, cha chata viahkao luh pawhmao liata, viahkao hmia lâ nata a hnôh lâ pazao ei ta.

⁵ Abeipa ta Mawsi hnohta bie a piepa hawhta, viahkao chô liata, viahkao lyupa ta, viahkao nata pazaopa ta chaisaihna tao ei ta, ngôh, palâ nohpa, saihdôhpa, saihlawpa nata pala rih dipa pabaohpazy hmâpa ta, zôpha kawpa ta sapa a châ.

⁶ Awnisi lôsôhpazy pachhuahpanoh ei ta, chazy cha ngôh ta taopa patusana liata pangaih ei ta, moh chahnaona taozie hawhta taopa ta, cha liata Izarei sawzy moh roh ei ta.

⁷ Abeipa ta Mawsi hnohta bie a piepa hawhta, cha moh rona lôsôhpazy cha Izarei sawzy atheithlâhna alôzy châta ephaw ngiatlâh rizy liata bai ta.

⁸ Ephaw taozie hawhta chachôhna vyhphao tao ta, ngôh, pala nohpa, saihdôhpa, saihlawpa nata pala rih dipa pabaohpazy hmâpa ta zôpha kawpa ta tao ta.

⁹ Chachôhna vyhphao cha ki palih hnei ta, pathopa ta taopa châ ta, a doh lâ kha kha, a hâ lâ kha kha ta pathopa ta taopa a châ.

¹⁰ Cha liata lôsôhpazy tlâh palih ta patlâh ei ta, tlâh khana cha sadôni, tôpazi nata kabuni lôzy châ ta,

¹¹ tlâh nona cha emyrâ, saphirâ nata lônah zy châ ta,

¹² tlâh thôhna cha zaki, akate nata amethi lôzy châ ta,

¹³ tlâh palihna cha beri, awnisi nata zaspi lôzy a châ. Chazy cha ngôh patusana liata pangaihpa a châ.

¹⁴ Lôsôhpa miahrawh hleino y ta, chazy cha Izarei saw pahrawh hleino moh lymâ hawhta ama moh bipa a châ. Lôsôhpa miahrawh hleino cha moh chahnaona hawhta tao chyupa châ ta, lôsôhpa miakha chô liata Izarei chi hrawh hleino hry liata chi kha moh pachohsa lymâpa a châ.

¹⁵ Chachôhna vyhphao chô liata ngôh suapa ta taopa bâlia chaori hawhta charipazy tao ei ta,

¹⁶ ngôh patusana nata ngôh tiaki miano tao ei ta, cha tiaki miano cha chachôhna vyhphao pai chavei chachâh ta pataoh ei ta.

¹⁷ Ngôh bâlia miano cha chachôhna vyhphao pai chavei chachâh ta tiaki miano liata buh ei ta.

¹⁸ Bâlia charipa pawhmao raihrie cha patusana miano liata pazao ei ta, chazy cha ephaw hmia lâta a ngiatlâh rizy liata buh ei ta.

¹⁹ Ngôh tiaki miano tao ei ta, chazy cha chachôhna vyhphao ry lâ liata ephaw â daihpa lâta a pai chavei chachâh liata pataoh ei ta.

²⁰ Ngôh tiaki hropa miano tao ei ta, chazy cha ephaw hmia lâta a ngiatlâh rizy thaby liata pataoh ei ta, cha ngôh tiakizy cha zôpha kawpa ta sapa ephaw chaisaihna chô lâta â pazaona kiapâh liata pataoh ei ta.

²¹ Abeipa ta Mawsi hnohta bie a piepa hawhta, chachôhna vyhphao tiakizy cha ephaw tiakizy nata pala nohpa charipa ta chahry pabaoh ei ta, chatanachata chachôhna vyhphao cha zôpha kawpa ta sapa ephaw chaisaihna chô lâta y ta, ephaw liata â ipa ta a bai ta.

²² Ephaw ry lâta a ky awpa viahkao pasipa cha a nohpa sai ta sa ta.

²³ Viahkao pasipa liana cha viahkao rao khaoh paaw ta, cha khaoh cha â hrie thei lei nawpa ta a kiah mei ta.

²⁴ Viahkao paizy liata pawmikarânâ nothlahpa cha pala nohpa, saihdôhpa, saihlawpa nata pala rih dipa pabaohpazy hmâpa ta tao ei ta.

²⁵ Ngôh suapa lailô tawtawzy tao ei ta, cha lailôzy cha viahkao pasipa a dôpa ta, viahkao pasipa pai liata pawmikarânâ likawhzy liata soh ei ta.

²⁶ Abeipa ta Mawsi hnohta bie a piepa hawhta, chakao nawpa viahkao pasipa cha, lailô miakha nata pawmikarânâ miakha lymâ ta i-âhpa ta, viahkao pasipa pai padôpa ta tao ei ta.

²⁷ Abeipa ta Mawsi hnohta bie a piepa hawhta, Arawna nata a sawchapawzy châta pala rih dipa ta sapa chôthozy tao ei ta.

²⁸ Pala rih dipa ta taopa lakhu, pala rih dipa ta taopa luhkhunazy nata pala rih dipa pabaohpa ta taopa chaopasyzy tao hra ei ta.

²⁹ Pala rih dipa pabaohpa nata pala nohpa, saihdôhpa nata saihlawpazy hmâpa ta kiky pakyupa chaisaihnazy ama tao.

³⁰ Abeipa ta Mawsi hnohta bie a piepa hawhta, ngôh suapa lakho pathaihpa tao ei ta, cha liata “Abeipa châta Pathaihpa,” tahpa bie moh chahnaona taozie ta taopa ta pachohsa ei ta.

³¹ Cha cha theihthaipa lakhu liata pala nohpa charipa ta hraih pa-ipa ta ama bai.

Achhyna byureih hmobaohzy

³² Chatanachata ahmaohna poh o liata achhyna byureih raihria zydua cha palohpa châ ta, Abeipa ta tao awpa ta Mawsi hnohta bie a piepa zydua hawhta Izarei sawzy ta tao ei ta.

³³ Mawsi lâta achhyna byureih cha a vykhei ei ta, poh o nata a chhaichhi zydua, a bainazy, a thophiazy, a tlâhzy, a tôhzy, a patyuna zy;

³⁴ mietaku tôhpa vo pasaihpa ta taopa khuna, tilaipi siahrâ vo ta taopa khuna, chhôkhâhna pohraipa;

³⁵ Biehrai Byh nata a lâhreizy, zawngiahna dyuchhai;

³⁶ tlâhkhai nata a chhaichhi zydua nata ypâna viahchhâ;

³⁷ ngôh suapa ta taopa meiôh tôh nata meiôhzy, a hmobaoh zydua nata pakhaih nawpa sathaw;

³⁸ ngôh maisâh, sathawthuna châta sathaw, ropahâhpazy, poh o chhikao pohraipa;

³⁹ dawh maisâh nata a dawh sao, a lâzy, a hmobaoh zydua, rahô nata a patyuna;

⁴⁰ dôhpachhôh tlyhmia dôhna pohraipazy nata a tôhzy, a patyunazy, dôhpachhôh tlyhmia chhikao pohraipa, a chaorizy, a khaipânazy, achhyna byureih nata ahmaohna poh o liata chakaona rai hria nawpa chhaichhi zydua;

⁴¹ Su Pathaihpa liata chakaona rai hria nawpa ta chysia sapa, theihthaipa Arawna châta chysia pathaihpazy nata a sawchapawzy ta theihthaipa rai ama hria nota amâ ky awpa chysiazy taopa a châ.

⁴² Chatanachata Abeipa ta Mawsi hnohta bie a piepa zydua hawhta Izarei sawzy ta ama tao khai.

⁴³ Mawsi ta raihria zydua cha moh ta, Abeipa biepiepa hawhta paloh khaipa a châpa hmô ta, chatanachata Mawsi ta âmo cha byhnâ a awpa ei.