PUASAINA 38 - Mara Bible RV (BSI)

Raopa hlâna maisâh

¹ Akeisia tho ta raopa hlâna maisâh, a doh lâ dy pangawh a seihpa nata a hâ lâ dy pangawh a kawhpa tao ta. Maisâh cha ki palih hneipa ta taopa châ ta, â sâhna lâ cha dy thôh a châ.

² Maisâh chaki miah palih liata a kizy tao ta, a kizy cha maisâh nata pazaopa ta taopa châ ta, dawh ta a pahu.

³ Maisâh chhaichhi zydua, beihzy, buchâh linazy, rahôzy, sa thaona thuakuzy, mei lanazy dawh ta tao ta.

⁴ Maisâh châta dawh sao tao ta, sao cha maisâh kiah ry lâ, maisâh khophie liata phaw ta.

⁵ A lâzy chahraoh nawpa ta dawh sao sona ki palih liata pataoh awpa tiaki miapalih leih ta.

⁶ A lâzy cha akeisia tho ta tao ta, dawh ta pahu ta.

⁷ A sy nawpa ta a kâ chavei chachâh ta a lâzy chahraoh ta, maisâh cha thophia ta dôhpa ta a chhôh pakaopa ta tao ta.

Rahô biebuh

⁸ Ahmaohna poh o chhikao liata chakaotuhpa chanôzy thlalâ hmâpa ta rahô nata a patyuna dawh ta tao ta.

Achhyna byureih tlyhmia

⁹ Achhyna byureih dôhpachhôh tlyhmia tao ta, tlyhmia chho lâ chhâh cha pala rih dipa pabaohpa ta taopa pohraipa dy za kha a seihpa ta chhôh ta.

¹⁰ Pohraipa tôh kih nata a patyuna miakih dawh ta tao ta, a tôh liata bainazy nata patusanazy deikua cha tâkâ ta taopa a châ.

¹¹ Cha hawhna chata dôhpachhôh tlyhmia maw lâ chhâh chhao pala rih dipa pabaohpa ta taopa pohraipa dy za kha a seihpa ta chhôh ta. Pohraipa tôh kih nata a patyuna miakih dawh ta tao ta, a tôh liata bainazy nata patusanazy deikua tâkâ ta taopa a châ.

¹² Dôhpachhôh tlyhmia notla lâ chhâh cha dy sypangawh a kawhpa pohraipa ta chhôh ta, a tôh miahrawh nata a patyuna miahrawh y ta, a tôh liata bainazy nata patusanazy cha tâkâ ta taopa a châ.

¹³ Dôhpachhôh tlyhmia nochhi lâ chhâh chhao dy sypangawh a kawh.

¹⁴ Chhikao hiakha lâta pohraipa parai awpazy cha dy hrawh hleipangawh seih ta, a tôh miathôh nata a patyuna miathôh a y.

¹⁵ Cha hawhna chata chhikao hiakha lâ chhao taopa a châ. Achhyna byureih dôhpachhôh tlyhmia chhikao kâ chavei chachâh pohraipazy cha dy hrawh hleipangawh seih ta, a tôh miathôh nata a patyuna miathôh a y.

¹⁶ Achhyna byureih dôhpachhôh tlyhmia liata pohraipa zydua cha pala rih dipa pabaohpa ta taopa sai a châ.

¹⁷ A tôh patyunazy dawh châ ta, a tôh liata a bainazy nata a patusanazy cha tâkâ châ ta, a lubyuhpazy tâkâ ta pahupa a châ. Achhyna byureih dôhpachhôh tlyhmia tôh zydua cha, tâkâ tlâhzy ta patusapa a châ.

¹⁸ Achhyna byureih dôhpachhôh tlyhmia chhikao liata pohraipa cha, poh kiky thai ngaitapa ta pakyupa châ ta, pala rih dipa pabaohpa zy, pala nohpa, saihdôhpa nata saihlawpa zy ta taopa a châ. A doh lâ dy kih seih ta, â sâhna lâ cha achhyna byureih dôhpachhôh tlyhmia pohraipazy nata pakhopa ta dy pangawh ta taopa a châ.

¹⁹ A tôh miapalih y ta, a tôhzy patyuna miapalih y ta, dawh ta taopa a châ. A tôhzy liata a bainazy cha tâkâ ta taopa châ ta, a lubyuhpazy nata a patusanazy chhao tâkâ ta pahupa a châ.

²⁰ Achhyna byureih nata a tlyhmia dôhna khaipâna zydua cha dawh sai a châ.

Achhyna byureih châta thyunazy

²¹ Hezy biehrai byureih tahpa ta moh bi hrapa achhyna byureih sana nata a chhaichhizy châta thyunazy a châ. Chazy cha Mawsi biepiepa hawhta, theihthaipa Arawna sawchapawpa Ithamâ chhihthana ry liata Livai chizy ta ama ropa a châ.

²² Zudâh chi Hurâ sawchapawpa Uri sawchapawpa Bezale ta Abeipa ta Mawsi hnohta tao awpa ta bie a piepa zydua cha tao khai ta.

²³ A hnohta tho nata lô a khie thaipa zôthai ngaitapa, pala nohpa, saihdôhpa nata saihlawpa nata pala rih dipa pabaohpazy hmâpa ta kiky a thaipa Dânâ chi Ahisamâ sawchapawpa Ôhôliaba ta hria ta.

²⁴ Supathaihpa châta hmâ awpa ngôh thyuna zydua cha, supathaihpa liata hmâpa sekel reizie ta reipa ta, talent miakih nata miachaki nata sekel za sari nata sythôh a châ.

²⁵ Supathaihpa liata hmâpa sekel reizie ta reipa ta, maluh reipazy hry liata a hlaopa zawpi ta tâkâ ama thyupa zydua cha, talent za kha nata sekel 1,775 a châ.

²⁶ Kô kih tawhta a chô lâ maluh reipa chapaw 603,550 ta bekâ miakha chyu thyu ei ta. Bekâ miakha cha supathaihpa liata hmâpa sekel reizie ta reipa ta sekel khophie a châ.

²⁷ Supathaihpa tôh patyuna nata pohraina tôh patyunazy châta leih awpa ta tâkâ talent za kha hmâpa châ ta, a tôh patyuna miakha leih nawpa ta talent miakha lymâ ta hmâpa ta, a tôh patyuna za kha leih nawpa ta talent za kha hmâpa a châ.

²⁸ Sekel 1,775 hmâpa ta, a tôh liata a bainazy tao ta, a lubyuhpa zy cha tâkâ ta pahu ta, a patusanazy a tao.

²⁹ Dawh ama thyupa zydua cha talent sysari nata sekel 2,400 a châ.

³⁰ Chazy hmâpa ta ahmaohna poh o chhikao tôh patyunazy, dawh maisâh, dawh sao nata maisâh liata chhaichhi zydua,

³¹ achhyna byureih dôhpachhôh tlyhmia dôhna tôh patyunazy, achhyna byureih chhikao tôh patyunazy, achhyna byureih khaipâna zydua nata achhyna byureih tlyhmia dôhna khaipâna zydua a tao khai.