PUASAINA 37 - Mara Bible RV (BSI)

Biehrai Byh

¹ Bezale ta akeisia tho ta Biehrai Byh tao ta, a doh lâ dy no nata khophie seih ta, a hâ lâ dy kha nata khophie kawh ta, â sâhna lâ dy kha nata khophie a châ.

² A chhôh nata khôtho lâ ngôh suapa ta pahu ta, ngôh ta a tlâh a pakyu.

³ A phei miapalih liata pataoh awpa ngôh tiaki miapalih leih ta, tiaki miano hiakha lâ châta châ ta, tiaki miano hiakha lâ châta a châ.

⁴ Akeisia tho ta a lâzy tao ta, chazy cha ngôh ta pahu ta,

⁵ Byh a sy nawpa ta a kâ lâta tiakizy liata a lâzy a chahraoh.

⁶ Ngôh suapa ta zawngiahna dyuchhai tao ta, a doh lâ dy no nata khophie seih ta, a hâ lâ dy kha nata khophie a kawh.

⁷ Cherubi miano ngôh ta tao ta, zawngiahna dyuchhai a kâ chavei chachâh liata a daih ta daihpa ta a tao.

⁸ Cherubi miakha zawngiahna dyuchhai hiakha lâ pai liata pataoh ta, cherubi hropa hiakha lâ pai liata pataoh ta, zawngiahna dyuchhai nata pazaopa ta dyuchhai kâ chavei chachâh ta cherubi miano a tao.

⁹ Cherubizy cha zawngiahna dyuchhai lâ a heihpa ta, ama hmia a chhy ei ta, ama mathlawzy â sâhpa ta pakai ei ta, zawngiahna dyuchhai cha ama mathlaw ta ama khu.

Tlâhkhai

¹⁰ Akeisia tho ta tlâhkhai tao ta, a doh lâ dy no seih ta, a hâ lâ dy kha kawh ta, a sâhna lâ dy kha nata khophie a châ.

¹¹ Cha cha ngôh suapa ta pahu ta, ngôh ta a tlâh a pakyu.

¹² Pazah tie phiapa ta a tlâh tao ta, a tlâh â dôna taihta ngôh ta a pakyu.

¹³ Tlâhkhai châta ngôh tiaki miapalih leih ta, tiakizy cha tlâhkhai ki phei palih liata pataoh ta.

¹⁴ Tlâhkhai a sy tita a lâ chahraoh nawpa ta, tiakizy cha pakyuna liata pataoh ta.

¹⁵ A lâzy akeisia tho ta tao ta, ngôh ta pahu ta.

¹⁶ Tlâhkhai hmobaoh, beikohzy, ukâzy, biebuhzy nata dopa hlâna patlai nawpa beihraizy ngôh suapa ta tao ta.

Meiôh tôh

¹⁷ Ngôh suapa ta meiôh tôh tao ta. A tôh thaby, a tôh, a nyuzy, a paw ngaihchakuazy nata a pawzy a pazao khaipa ta a tao.

¹⁸ A kâ chavei chachâh ta a chiah miacharu pachiah ta, meiôh tôh kâ hiakha lâ a chiah miathôh y ta, meiôh tôh kâ hiakha lâ a chiah miathôh y hra ta.

¹⁹ Hiakha lâ chhâh chiah liata kuasâh paw pabyuhpa a lyupa nyu miathôh, a paw ngaihkaru nata a paw a hneipa tao ta, hiakha lâ chhâh chiah liata chhao kuasâh paw pabyuhpa a lyupa nyu miathôh, a paw ngaihkaru nata a paw a hneipa tao hra ta. Cha hawh lymâ chata meiôh tôh tawhta a puapa chiah miacharu châta tao ta.

²⁰ Meiôh tôh liata kuasâh paw pabyuhpa a lyupa nyu miapalih, a paw ngaihkaru nata a paw a hneipazy y ta.

²¹ A chiah miano ry liata a paw ngaihkaru miakha y ta, a chiah hropa miano ry liata a paw ngaihkaru miakha y ta, a chiah hropa miano ry liata a paw ngaihkaru miakha y hra ta, cha hawh lymâ chata, meiôh tôh tawhta a puapa a chiah miacharu châta tao khai ta.

²² A paw ngaihkaru nata a chiahzy cha meiôh tôh nata a pazao khai ta, ngôh suapa ta hmaohkha ta daih khoh khaipa a châ.

²³ Meiôh miasari tao ta, a chaikiezy nata meipaoh sonazy ngôh suapa ta tao ta.

²⁴ Ngôh suapa talent miakha hmâpa ta meiôh tôh nata a chhaichhi zydua a tao.

Ropahâhpa maisâh

²⁵ Ropahâhpa rao nawpa ta maisâh ki palihpa akeisia tho ta tao ta, a doh lâ dy kha seih ta, a hâ lâ dy kha a kawh. Maisâh cha ki palih hneipa ta taopa châ ta, â sâhna lâ dy no a châ. Maisâh ki palih liata a kizy taopa châ ta, maisâh nata pazaopa ta taopa a châ.

²⁶ A chôzy, a kâzy nata a kizy ngôh suapa ta pahu ta, a kiahzy ngôh pakyupa ta a padô.

²⁷ Maisâh asyna lâhrei chahraoh nawpa ta, maisâh kiah ry a kâ chavei chachâh ta ngôh tiakizy a pataoh.

²⁸ Akeisia tho ta a lâhreizy cha tao ta, ngôh ta a pahu.

Sathawthuna sathaw nata ropahâhpa

²⁹ Sathawthuna châta sathaw pathaihpa nata ropahâhpa pasohpa tao ta, ropahâhpa a tao thaipazy taozie hawh tlai ta a tao.