PUASAINA 36 - Mara Bible RV (BSI)

Bezale nata Ôhôliaba raihriazy

¹ Chatawhcha Mawsi ta, “Supathaihpa liata rai to hria thai nawpa ta Abeipa ta sona nata novâhna a piepa Bezale, Ôhôliaba nata chyhsa zôthaipa zydua ta Abeipa biepiepa zydua ama hria awpa a châ,” tah ta.

Thyuna sôh

² Mawsi ta Bezale, Ôhôliaba nata Abeipa ta ama palôh liata sona a piepa zôthaipa zydua nata palôh thathyuna a hneipa maih aw ta.

³ Izarei sawzy ta supathaihpa châta rai hria nawpa ta ama vaw thyupa zydua Mawsi tawhta la lymâ ei ta. My chareih ta lôhthai thyunazy Mawsi hnohta vaw hlâ pazao lymâ ei ta.

⁴ Zôthaipazy ta âmo rai siesaipa ta supathaihpa rai tlao ama hria lymâ.

⁵ “Abeipa ta tao awpa ta bie a piepazy tao nawpa châta â ngiahpa khô lâ taihta chyhsazy ta hmo ama vaw hlâ,” tahpa ta Mawsi cha chho ei ta.

⁶ Chavâta Mawsi ta biepie ta, “A chanô chapaw ta supathaihpa châta thyuna vaw pie khao khah ei sy,” tahpa ta ama riehmo zydua liata tlâh paawsa ta. Cha hawhna chata zawpizy cha ama thyuna chalihsapa a châ.

⁷ Thyuna ama hmôpazy tawhta rai zydua hria nawpa châta â daihpa dei châ leipa ta, a hluhna lâ tlao a châ.

Achhyna byureih tlâhrai

⁸ Raihriatuhpazy hry liata zôthaipa zydua ta achhyna byureih cha pohraipa miahrawh a hneipa ta tao ei ta. Cha pohraipazy cha pala rih dipa pabaohpa nata pala nohpa, saihdôhpa nata saihlawpa zy hmâpa ta taopa châ ta, zôthaipazy ta zôpha kawpa ta ama taopa cherubi nothlahpazy pachohsapa a châ.

⁹ Pohraipa maih cha a doh lâ dy kih nata dy charie, a hâ lâ dy palih châ ta, pohraipa zydua amâ kho khai.

¹⁰ Zôthaipa ta pohraipa miapangawh pazao ta, pohraipa hropa chhao miapangawh ta pazaopa ta tao ta.

¹¹ Pohraipa pazaopa miakhana liata pohraipa chhâna pai liata a nali nohpazy tao ta, cha hawhna chata pohraipa pazaopa mianona liata pohraipa chhâna pai liata tao hra ta.

¹² Pohraipa pazaopa miakhana pai liata a nali sypangawh tao ta, pohraipa pazaopa mianona pai liata a nali sypangawh tao hra ta, cha nalizy cha â dadypa ta sopa ama châ.

¹³ Ngôh ta taopa hraina sypangawh tao ta, hrainazy chata pohraipazy cha hrai pakaoh ta, chatanachata achhyna byureih tlohpa vaw châ ha ta.

¹⁴ Achhyna byureih chôkhu poh o châta mie hmi pohraipazy tao ta, pohraipa miahrawh hleikha a tao.

¹⁵ Pohraipa maih cha a doh lâ dy sythôh, a hâ lâ dy palih châ ta, pohraipa miahrawh hleikhazy cha â kho khai.

¹⁶ Pohraipa miapangawh pazao ta, pohraipa miacharu pazao hra ta.

¹⁷ Pohraipa pazaopa miakhana liata pohraipa chhâna pai liata a nali sypangawh tao ta, pohraipa pazaopa mianona liata pohraipa chhâna pai liata chhao, a nali sypangawh thla ta.

¹⁸ Poh o tlohpa a vaw châ thei nawpa ta, dawh ta taopa hraina sypangawh tao ta.

¹⁹ Mietaku tôhpa vo pasaihpa hmâpa ta poh o chôkhu tao ta, tilaipi siahrâ vo ta a chô khu pachhuahna a tao.

²⁰ Achhyna byureih pâhchhô cha akeisia thophiazy hmâpa ta â tôh lâta chhôh ta.

²¹ Thophia cha a doh lâ dy hrawh seih ta, a hâ lâ dy kha nata khophie a kawh.

²² Pazao nawpa ta, thophia zydua a ngaih miano chyu hnei ta, cha hawhna chata achhyna byureih pâhchhô thophia zydua cha tao ta.

²³ Cha hawhna chata achhyna byureih pâhchhô cha tao ta, chho lâ daih châta thophia phia kih a tao.

²⁴ A ngaih miano pangaih nawpa ta, thophia phia kha ry liata patyuna miano lymâ tao ta, thophia hropazy ry liata chhao, a ngaih miano pangaih nawpa ta patyuna miano lymâ tao hra ta, thophia phia kih ry liata tâkâ ta taopa patyuna sypalih a tao.

²⁵ Achhyna byureih kâ hiakha lâ, maw lâ daih châta thophia phia kih tao ta.

²⁶ Thophia phia kha ry liata patyuna miano tao ta, thophia hropazy ry liata chhao patyuna miano lymâ taopa ta, thophia phia kih châta tâkâ ta taopa patyuna sypalih a tao.

²⁷ Achhyna byureih hnôh lâ, notla daih lâ châta thophia phia charu tao ta,

²⁸ achhyna byureih hnôh lâta a ki chhânazy châta thophia phia no tao hra ta.

²⁹ Thophia phia no cha a thaby tawhta a pawhmao taih ta, a nali hmiatua chaipa tlôna taihta pakyu ta, cha hawhna chata ki no liata tao raihrie ta.

³⁰ Thophia phia charie y ta, amâ tyu nawpa ta tâkâ ta taopa patyuna miahrawh hleicharu y ta, thophia phia kha ry liata patyuna miano lymâ a tao.

³¹ Akeisia tho ta pâhchhô tlâhzy tao ta, achhyna byureih kâ hiakha lâ pâhchhô phiazy paryh nawpa ta tlâh pangawh,

³² achhyna byureih kâ hiakha lâ pâhchhô phiazy paryh nawpa ta tlâh pangawh, achhyna byureih hnôh lâ notla daih lâta pâhchhô phiazy paryh nawpa ta tlâh pangawh tao ta.

³³ Pâhchhô khophie liata a liah tlâh pakhâh ta, cha chata pâhchhô phia hiakha lâ chhâna tawhta hiakha lâ chhâna taihta a lâ hrei ta.

³⁴ Pâhchhô phiazy cha ngôh ta pahu ta, a tlâhzy hrei pakhâh nawpa châta ngôh tiakizy tao ta, a tlâhzy cha ngôh ta pahu ta.

³⁵ Pohraipa cha pala nohpa, saihdôhpa nata saihlawpazy nata pala rih dipa pabaohpazy hmâpa ta tao ta, cha liata zôpha kawpa ta taopa cherubi nothlahpazy pachohsa ta.

³⁶ Cha châna chata akeisia tho tôh miapalih tao ta, chazy cha ngôh ta pahu ta, a bainazy ngôh ta tao ta, amâ tyuna châta tâkâ ta taopa patyuna miapalih leih ta.

³⁷ Poh o chhikao châta pohraipa tao ta, cha cha pala rih dipa pabaohpa nata pala nohpa, saihdôhpa nata saihlawpazy ta kiky zeipa ta taopa a châ.

³⁸ A baina chhaopa chhikao pohraipa tôh miapangawh tao ta, a tôh lubyuhpazy nata a patusanazy cha ngôh ta pahu ta, a patyuna miapangawh deikua cha dawh a châ.