PUASAINA 35 - Mara Bible RV (BSI)

Pahânoh ryhpazy

¹ Mawsi ta Izarei zawpi zydua pahmaoh ta, ama hnohta, “He biezy he Abeipa ta tao awpa ta a cha piepa ei a châ.

² Noh charu chhôh rai hria awpa châ ta, a noh sarina noh deikua cha, nama châta noh pathaihpa, Abeipa châta a pahâ nawpa Pahânoh zachhihpa a châ aw. Ahy rai cha noh ta rai a hriapa cha thie awpa a châ.

³ Pahânoh cha nama pahrâna su zydua liata mei rai nama patih awpa châ vei,” tah ta.

Abeipa lâta hmohlâpazy

⁴ Mawsi ta Izarei zawpi zydua hnohta, “He he Abeipa biepiepa a châ.

⁵ Nama hry tawhta Abeipa châta thyuna vaw cheih teh u. Abeipa châta thyuna pie khohna palôh a hneipa maihta thyuna cha vaw cheih ei sala, ngôhzy, tâkâzy, dawhzy;

⁶ pala nohpa, saihdôhpa nata saihlawpazy, pala rih dipa pabaohpazy, mie hmizy;

⁷ mietaku tôhpa vo pasaihpazy, tilaipi siahrâ vozy, akeisia thozy;

⁸ khaihna châta sathaw zy, sathaw pathaihpa châta nata ropahâhpa raopa châta ia-ôzy;

⁹ ephaw nata chachôhna vyhphao kiky pakyu nawpa ta beri lôzy nata lôsôhpazy vaw cheih mawh ei sy.

Achhyna byureih hmobaohzy

¹⁰ “Nama hry liata zôthaipa zydua a vy ei sala, Abeipa ta bie a piepa zydua tao mawh ei sy:

¹¹ Achhyna byureih nata a poh o nata a khuna zy, a patusanazy, a thophiazy, a tlâhzy, a tôhzy, a patyunazy;

¹² Biehrai Byh nata a lâhreizy, zawngiahna dyuchhai nata khuna pohraipa;

¹³ tlâhkhai nata a lâhreizy, a chhaichhi zydua nata ypâna viahchhâ;

¹⁴ khaihna châta meiôh tôh nata a hmobaoh zydua, a meiôhzy nata khaihna châta sathaw;

¹⁵ ropahâhpa maisâh nata a lâhreizy, sathawthuna sathaw, ropahâhpa pahâh ngaitapa nata achhyna byureih chhikao liata parai awpa chhikao pohraipa;

¹⁶ raopa hlâna maisâh nata a dawh sao, a lâhreizy, a hmobaoh zydua nata rahô nata a patyuna;

¹⁷ dôhpachhôh tlyhmia pohraipazy nata a tôhzy, a patyunazy nata dôhpachhôh tlyhmia kaohrai pohraipa;

¹⁸ achhyna byureih khaipânazy, dôhpachhôh tlyhmia dôhna khaipânazy, a chaorizy;

¹⁹ Su Pathaihpa liata chakao nawpa ta â ngia ngaitapa ta sapa chysiazy, theihthaipa chakaona rai hria nawpa châta theihthaipa Arawna chysia pathaihpa nata a sawchapawzy chysia ama vaw cheih awpa a châ,” tah ta.

Thyuna sôh

²⁰ Izarei zawpi zydua cha Mawsi mohmô tawhta pua ei ta.

²¹ Palôh thathyupa nata pie khohna palôh a hneipa maih a vy ei ta, ahmaohna poh o nata a chakaona nata chysia pathaihpazy tao nawpa ta hmâ awpa ta Abeipa lâ thyuna vaw cheih ei ta.

²² A chanô chapaw ta, a palôh liata khona a hneipa maih a vy ei ta, lâkyuzy, rahyzy, moh chahnaona kusadizy, pachhihzy, ngôh ta taopa sôh nata thih to vaw cheih ei ta, chyhsa zydua ta Abeipa lâ ngôhzy hlâ ei ta.

²³ Pala nohpazy, saihdôhpazy, saihlawpazy, pala rih dipazy, mie hmizy, mietaku tôhpa vo pasaihpa nata tilaipi siahrâ vo a hneipa maihta vaw cheih ei ta.

²⁴ Tâkâ nata dawh zy a thyu theipa ta Abeipa châta thyunazy vaw cheih ei ta. Khâpa chhaichhi châ chhâ ta hmâh awpa ta, akeisia tho a hneipa zydua ta vaw cheih hra ei ta.

²⁵ Chanô zôthaipa sahlao zydua ta ama ku ta pala pahieh ei ta, pala nohpazy, saihdôhpazy, saihlawpazy nata pala rih dipa ama pahiehpazy vaw cheih ei ta.

²⁶ Chanô palôh thathyupa zydua ta ama zôthaina hmâpa ta mie hmi pahieh ei ta.

²⁷ Ryureituhpazy ta beri lôsôhpazy nata ephaw nata chachôhna vyhphao liata kiky pakyu awpa lôsôhpazy vaw cheih ei ta.

²⁸ Ia-ôzy nata khaihna châta hmâ awpa nata sathawthuna nata ropahâhpa châta hmâ awpa sathawzy vaw cheih hra ei ta.

²⁹ Chatanachata Izarei saw zydua, a chanô chapaw ta, ama palôh liata pie khohna a hneipa maihta, Abeipa ta tao awpa ta Mawsi ku liata bie a piepa zydua tao nawpa ta lôhthai thyuna vaw cheih ei ta.

Bezale nata Ôhôliaba raihria

³⁰ Mawsi ta Izarei sawzy hnohta, “Pachâ teh u, Abeipa ta Zudâh chi Hurâ sawchapawpa Uri sawchapawpa Bezale cha a moh tlai ta aw ta.

³¹ Ano cha sona, novâhna, pahnona nata zôthaina tozy hnei awpa ta Khazohpa Thlahpa ta pabie ta.

³² Ngôh, tâkâ nata dawh chhaichhizy â ngia ngaitapa ta daih thaina zôthaina piepa ta,

³³ lôsôhpazy daih ta pangaih thaina nata tho khie thaina nata kuzô thaina to hnei awpa ta a aw.

³⁴ Bezale nata Dânâ chi Ahisamâ sawchapaw Ôhôliaba cha ama pano ta chyhsazy pachu thaina sona pie ta.

³⁵ Âmo cha rai zydua hria thai awpa ta palôh sona ta pabie ta, tho nata lô khie thaina, phorâ thaina, pala nohpa, saihdôhpa, saihlawpa nata pala rih dipa pabaohpazy ta kiky zei thaina nata poh sa thaina zy ama hnohta pie ta, rai to hria thaina nata zôthaina ta a tobi ei.”