PUASAINA 34 - Mara Bible RV (BSI)

Lôphia thiehpa

¹ Abeipa ta Mawsi hnohta, “Lôphia hmiatuapazy hawhpa kha miano khai heih la, cha lôphiazy liana chata lôphia hmiatuapa na pakei hapazy liata biezy kha ei roh heih aw.

² Mylâ my a vaw mâ la, Sinai tlâh lâ mydi ta a khy la, tlâh laki liata ei hmiakô liata a vaw duah mah y.

³ Na hnohta pakha hmah amâ khy awpa châ leipa ta, tlâh zydua liata chyhsa pakha hmah ama y awpa châ vei. Mietaku zawzy nata viahchao hrizy chhao tlâh dady liata ama lao ama bâ awpa châ hra vei,” tah ta.

⁴ Chatanachata Mawsi ta hmiatuapa hawhta lôphia miano khai ta, mydi kari ta thyu ta, Abeipa ta bie a piepa hawhta Sinai tlâh lâ khy ta, lôphia mianozy cha a ku ta chaba ta.

⁵ Abeipa cha meihdo hry liata a zu ta, Mawsi kiapâh liata a vaw duah ta, a moh cha Abeipa a châ tahpa ta phuah ta.

⁶ Abeipa cha Mawsi hmiakô liata vaw sie ta, “Abeipa, Abeipa, zawngiahna nata ngiachhiena Khazohpa, hiehâh rupa, kyhpachâna nata ngâchhihna ta a biepa,

⁷ chyhsa sâh hluhpi chô liata ngiachhiena palâsa ta, taopasina nata paraona nata moleinazy a ngiahthai ta, thailei a châpazy deikua hrie leipa ta a pakhôsa leipa, pawzy hmoparaona cha saw nata samoh sahlâhzy chô liata patlôsa ta, chhâ thôhna nata chhâ palihna taihta a patlôsapa,” tahpa ta a phuah ta.

⁸ Mawsi cha alei lâ thlai a bôh ta, Abeipa cha a chhy ta.

⁹ Mawsi ta, “Tahmâ na modypa ei châ khiahta cha, Hy Abeipa, ngiachhiepa ta Abeipa cha eima hnohta sie hra mawh sy. Phopi chhorupa châ hrei sih la, eima paraona nata eima moleinazy miah a ngiahthai la, na ryuto châta miah hnei mah y,” tah ta.

Biehrai pathiehna

¹⁰ Abeipa ta, “Pachâ teh, bie ei hrai hih. Na phopi hmiakô liata hmonoâhpa ei tao aw. Cha cha khizaw zydua nata kheihawhpa phopi hry lia hmahta tao beih leipa a châ. Na chô liata ei tao awpa hmo cha rarôh y ngaitapa a châpa vâta, na pahrâlâhpa phopi zydua ta Abeipa raihria ama hmô aw.

¹¹ “Tanoh ta bie ei cha piepa he zyh mah y. Amawri mo, Kâna mo, Hiti mo, Perizi mo, Hivi mo nata Zebu mozy cha na mohmô liata ei papua aw ei.

¹² Na sie nawpa râh liata a pahrâpazy hnohta biehrai tao lei awpa ta a vaih mah y. Chataleipatala nama hry liata khoheih ama châ pathlei aw.

¹³ Ama maisâhzy pacho aw ei chi ta, ama lôbôzy pakei khaipa ta, ama Aseri tôhzy nama chhawh pachhô khai awpa a châ.

¹⁴ Khazoh hropa rai namâ chhy awpa châ vei. Abeipa cha a moh Hiatlia châ ta, a hiatlia pasa kawpa Khazohpa a châ.

¹⁵ Cha râh liata a pahrâpazy hnohta biehrai tao lei awpa ta a vaih teh u. Chataleipatala ama khazohzy liata sihryhpa ta, ama khazohzy lâta amâ theih tita, cha hrua aw ei ta, amâ theihna sa nama nie pathlei aw na.

¹⁶ Cha leipa chhao ta, nama sawchapawzy châta ama sawchanôzy hnei aw ei chi ta, ama sawchanôzy ta ama khazohzy liata sihryh aw ei ta, nama sawchapawzy chhao ama khazohzy liata ama pasihryhsa pathlei aw.

¹⁷ “Thua ta leihpa nothlahpa khazohzy na tao awpa châ vei.

¹⁸ “Viahchhâ thinô pahlao leipa kyhchhi na chay awpa a châ. Bie ei cha piepa hawhna khata, Abi thla daihti raopa liata noh sari chhôh viahchhâ thinô pahlao leipa na nie awpa a châ, Abi thla liata Izi râh tawhta na kaw puapa vâta.

¹⁹ Chhi a pahy tua chaipa maih keima eih a châ. Na sahroh a pataw tuapa a chapawpa zydua, viahchao chhao, mietaku chhao, kei eih a châ khai.

²⁰ Alâ a pataw tuapa cha mietakutaw ta na chatlai aw. Na chatlai khoh vei khiahta cha, a rao na thlie pachhô awpa a châ. Na sawchapaw uhtheipa zydua cha na chatlai awpa a châ. Ei hmiakô liata ahy hmahta ku ruapa ta namâ vy awpa châ vei.

²¹ “Noh charu chhôh rai hria aw chi ta, a noh sarina noh deikua cha nâ pahâ aw. Leipalie daihti nata sâh hria daihti hmahta châ hra sala, nâ pahâ awpa a châ.

²² Hâta Kyhchhi chay aw chi ta, cha cha sâh hria a daih tua chaipa kyhchhi a châ. Kô châhdi sâh pakhy khai tawhta Peihtla Kyhchhi chhao na chay tyh aw.

²³ Chapaw zydua kô kha ta ei thôh Abeipa Khazoh, Izarei Khazohpa hmiakô liata amâ lâ tyh awpa a châ.

²⁴ Phopizy na hmiakô tawhta papua aw na ta, na râhrizy ei pakawh awpa vâta, kô kha ta ei thôh Abeipa na Khazohpa hmiakô liata a lâ awpa ta nâ khy chhôh ta, na râh cha ahy hmahta uahva thei aw veih ei.

²⁵ “Atheihna sa thisaih eina hlâ ti chi ta, viahchhâ thinô pahlaopa chhaota na vaw hlâ awpa châ leipa ta, Zawpakhô Kyhchhi atheihna chhao a mylâ taihta a y awpa châ vei.

²⁶ Na lyu liata chicheipa a daih tua chaipazy hry liata a pha chaipazy cha, Abeipa na Khazohpa o liata na hlâ awpa a châ. Mietaw sa cha a panô sâhpiti ta na chho awpa châ vei,” tah ta.

²⁷ Abeipa ta Mawsi hnohta, “He biezy he roh teh. He biezy hmâpa heta, nâ nata Izarei hnohta bie ei hraih haw,” tah ta.

²⁸ Mawsi cha, cha liata Abeipa hnohta noh sypalih nata zâ sypalih y ta, pati rai nie leipa ta, ti chhao doh vei. Chatanachata Abeipa ta Biepiepa Miahrawh biehrai biezy cha lôphiazy liata roh ta.

Mawsi hmia khaihna

²⁹ Mawsi cha biehrai lôphia miano a ku ta chabapa ta Sinai Tlâh tawhta za chô ta. Tlâh tawhta a za chô nota, Abeipa bie â chhopa vâta, a hmia a khaih hapa a pahno leipa ta.

³⁰ Arawna nata Izarei saw zydua ta Mawsi hmia khaihpa ama hmô nahta, a hnia ngâh leipa ei ta.

³¹ Mawsi ta âmo cha aw ta, Arawna nata zawpi ryureituhpa zydua cha ano lâ a lie ei ta, Mawsi ta âmo cha bie a chho ta.

³² Cha khai tawhta Izarei saw zydua ta a vaw hnia ei ta, Abeipa ta Sinai Tlâh liata a chhopa bie zydua cha, biepiepa châta âmo pie pachhuah ta.

³³ Ama hnohta bie a rei khai nahta, Mawsi cha hmiakhuna ta a hmia a khu ta.

³⁴ Abeipa bie a chho awpa ta a hmiakô liata â ngia nahta deikua cha, a pua heih hlâlei a hmiakhuna cha hlai tyh ta. A kaw pua nahta, a hnohta biepiepa cha Izarei sawzy hnohta a reih pachhuah tyh.

³⁵ Izarei sawzy ta Mawsi hmia moh ei ta, a khaih ha tyh. Chavâta Mawsi cha Khazohpa bie a chho awpa ta â ngia heih hlâlei hmiakhuna ta a hmia cha a khu heih tyh.