PUASAINA 33 - Mara Bible RV (BSI)

Sie awpa ta biepiepa

¹ Abeipa ta Mawsi hnohta, “Izi râh tawhta nâ kaw chhi papuapazy chhao khata, he su tawhta pua u la, Abarahâ, Aisika nata Zakaw hnohta, ‘Na pathlazy hnohta ei pie aw,’ tahpa ta bie ei vaw taihpa râh lâ khy teh u.

² Ei vâlyuhchâpa nama hmia lâta tuah aw na ta, Kâna mo, Amawri mo, Hiti mo, Perizi mo, Hivi mo nata Zebu mozy ei papua aw ei.

³ Sâhpiti nata kheihti lona râh lâ cha khy teh u. Kei deikua cha, nama hnohta a khy hra aw va na. Chataleipatala phopi chhoru ngaitapa châ ei chi ta, lâpi liata ei cha pahleipadia pathlei aw ei na,” tah ta.

⁴ Cha bie pachâchhiechhih ngaitapa cha zawpi ta ama thei nahta, cha ei ta, ama sôhthihzy a tobi tlâ khao leipa ei ta.

⁵ A chhâpa cha, Abeipa ta Mawsi hnohta, “Izarei sawzy chho teh, ‘Phopi chhoru ngaitapa nama châ. Chavâta nama hnohta buakhata chhao ei sie hra khiahta cha, ei cha pahleipadia khai thlâh ha aw ei. Tahmâ nama sôhthihzy kha pahluh khai teh u, chatanachata nama chô liata ei tao awpa ei pahno aw,’” a vaw tah hapa vâta a châ.

⁶ Chavâta Izarei sawzy ta ama sôhthihzy cha Hôribâ tlâh liata ama pahluh khai haw.

Ahmaohna poh o

⁷ Mawsi ta poh o puakheipa ta, riehmo khôtho lâ, riehmo tawhta â hlapa liata parai tyh ta. Cha cha a moh ta ahmaohna poh o bi ta. Abeipa a pado khohpa maihta riehmo khôtho lâta ahmaohna poh o lâ cha ama pangai tyh.

⁸ Mawsi ta poh o lâ a vaw nahta, zawpi zydua thyu ei ta, ama poh o chhikao chyu liata a duah ei ta, poh o chhôh lâ â ngia hlâlei Mawsi cha ama sai thlâh ha tyh.

⁹ Mawsi ta poh o chhôh lâ â ngiapata nahta, meihdo tôh thlai za chô ta, poh o chhikao liata a vaw duah ta, Abeipa ta Mawsi cha bie â vaw chho tyh.

¹⁰ Pôh o chhikao liata meihdo tôh a duahpa cha zawpi zydua ta ama hmô nahta, zawpi zydua cha thyu ei ta, ama poh o chhikao chyu liata amâ chhy tyh.

¹¹ Cha hawhna chata, chyhsa ta a viasa bie â chhopa hawhta, Abeipa ta Mawsi cha hmiadaisâ ta bie â chho tyh. Cha khai tawhta Mawsi cha riehmo lâ a lie tyh ta, a chakaotuhpa thyutliapa Nunâ sawchapawpa Zawsua deikua cha poh o puasai beih vei.

Abeipa ypâna bietai

¹² Mawsi ta Abeipa hnohta, “Nâ ta ei hnohta, ‘He phopi he a chhi teh,’ tah chi ta, châhrasala nâ sielâh awpa chyhsa na chho tlôh leipa chi ta. Cha leipa chhao ta, ‘Na moh ta cha pahno na ta, nâ chhao ei modypa ta na y hra,’ na tah chi ta.

¹³ Na mo ei dy khiahta cha, ngiachhiepa ta na lâpizy na pahmô mah y. Chatanachata cha pahno aw na ta, na modypa ta ei y lymâ thei aw. He phopi he na phopi ama châpa rie a thei mah y,” tah ta.

¹⁴ Abeipa ta, “Ei ypâna nama hnohta sie aw ta, ei cha pahâsa aw ei,” tah ta.

¹⁵ Mawsi ta Abeipa hnohta, “Na ypâna cha eima hnohta a sie leipa khiahta cha, he tawhna heta miah pasiesa khah y.

¹⁶ Kei nata na phopi he, na mo dypa ta eima y tahpa kheihta chyhsa ta ama pahno thei aw? Miah ypâ chi ta, eima hnohta na siena liana chata vei ma, kei nata na phopi he alei chô liata phopi hropa zydua nata eimâ nanona cha â lâ aw vei?” tah ta.

¹⁷ Abeipa ta Mawsi hnohta, “Ei modypa ta y chi ta, na moh ta ei cha pahnopa na châpa vâta, na reipa chhao cha ei tao aw,” tah ta.

¹⁸ Mawsi ta, “Ngiachhiepa ta na rônahna na pahmô mah y,” tah ta.

¹⁹ Abeipa ta, “Ei phana zydua na hmiakô liata vaw pasiesa aw na ta, ei moh Zehôvâh cha na hmiakô liata ei phuah aw. Ei ngiachhie awpa chyhsa cha ngiachhie aw na ta, zawh ei ngiah awpa chyhsa cha zawh ei ngiah aw,” tah ta.

²⁰ Abeipa ta, “Chyhsa ta eina hmô khiahta cha a hroh lei awpa vâta, ei hmia cha hmô thei aw va chi,” tah ta.

²¹ Abeipa ta, “Moh teh, ei kiapâh liata lôpanô a y hih. Cha liata a duah aw chi ta,

²² ei rônahna ta a cha vaw chapia tita, lôpanô keina liata cha nyu aw na ta, ei cha sie pakhô hlâlei cha, ei ku ta ei cha chhôkhâh aw.

²³ Ei ku cha la heih aw na ta, ei hnôhky hmô aw chi ta, ei hmia deikua hmô aw va chi,” tah ta.