PUASAINA 32 - Mara Bible RV (BSI)

Ngôh viahchaotaw

¹ Mawsi cha tlâh tawhta charâ ta a za chô leipa zawpi ta ama pahno nahta, Arawna lâta zawpi a hmaohpakhy ei ta, a hnohta, “Thyu la, eima hmia lâta a sie awpa khazoh miah taopa teh. Kha Mawsi, Izi râh tawhta miah a kaw chhi papuatuhpa chyhsa kha, khâpa hmo ma a chô liata a tlô tahpa pahno khao ma pi hih,” tah ei ta.

² Arawna ta ama hnohta, “Nama lapinôzy, nama sawchapawzy nata nama sawchanôzy ta ama nakao liata amâ bapa ngôh rahyzy pahluh u la, kei lâ vaw chei teh u,” tah ta.

³ Chatanachata zawpi zydua ta ama nakao liata amâ bapa ngôh rahyzy cha pahluh ei ta, Arawna lâ vaw cheih ei ta.

⁴ Arawna ta ngôh rahy ama vaw piepazy cha la ta, viahchaotaw nothlahpa leih ta, ngôh daina chhaichhi hmâpa ta â ngia kawpa ta daih ta. Zawpi ta, “Hy Izarei, he he Izi râh tawhta châ kaw chhi papuatuhpa na khazoh a châ hih” tah ei ta.

⁵ Cha cha Arawna ta a hmô nahta, viahchaotaw nothlahpa hmiakô liata maisâh tao ta. Arawna ta tlâh awh ta, “Mylâ cha Abeipa châta kyhchhi a y aw,” tah ta.

⁶ A mylâ mydi kari ta thyu ei ta, raopa hlânazy hlâpa ta, aryhna hlânazy vaw cheih ei ta. Niedo awpa ta zawpi a tyuh ei ta, cha khai tawhta a palypauasa awpa ta thyu ei ta.

⁷ Abeipa ta Mawsi hnohta, “Zu teh, na phopi Izi râh tawhta nâ kaw chhi papuapazy âmosasyh ta amâ parao ha khuh.

⁸ Ei biepiepazy thlai tleisaipa ta, viahchaotaw nothlahpa a tao ei ta, cha cha amâ chhy. Ano lâ a theih ei ta, ‘Hy Izarei, he he Izi râh tawhta châ kaw chhi papuatuhpa na khazoh a châ hih!’ ama tah,” tah ta.

⁹ Abeipa ta Mawsi hnohta, “He phopi he moh thlâh ha ei na ta, phopi chhoru ngaitapa ama châ.

¹⁰ Chavâta na patypamâ khao mâh khah y, ei pathi iana ta âmo kâ sala, ei pahleipadia khai hana hâh ei ta. Chatanachata nâ cha phopi rônahpa ta ei cha tao aw,” tah ta.

¹¹ Châhrasala Mawsi ta Abeipa a Khazohpa cha a haw ta, a hnohta, “Hy Abeipa, hmotaotheina rônahpa nata ku thatlôpa ta Izi râh tawhta nâ kaw chhi papuapa na phopi chô liata khazia ma cha tlu po ta na hie a hâh tly?

¹² Izi mo ta, ‘Izarei sawzy cha tlâhzy liata thie ta, alei chô tawhta âmo pamuapa ta, ama chô liata chhiena patlôsa awpa ta, Khazohpa ta â chhi papua ei,’ ama cha tah aw mâh tâh? Na hiehâhna ru ngaitapa cha padia la, na palôh panano la, na phopi chô liata chhiena patlôsa nâ chhuahpa cha, rie patlôsa khah y.

¹³ Châ chakaotuhpa Abarahâ, Aisika nata Izarei hnohta, ‘Avâ liata Awhsi zie ta na pathlazy papôh aw na ta, pie awpa ta bie ei vaw taihpa râh zydua kha na pathlazy pie aw na ta, chhâzaw ryuto châta ama hnei aw,’ tahpa ta nâma tlai ta bie nâ vaw taih hapazy kha rie a thei mah y,” tah ta.

¹⁴ Chatanachata Abeipa cha a palôh panano ta, a phopi chô liata chhiena patlôsa awpa bie a reipa cha a pathleih haw.

¹⁵ Mawsi cha tlâh tawhta zâ lie ta, biehrai lôphia miano a ku liata chabapa ta za chô ta. Lôphiazy cha kârano ta ropa châ ta, a hmia nata a hnôh ta ropa a châ.

¹⁶ Lôphiazy cha Khazohpa taopa châ ta, bieropazy chhao Khazohpa ropa châ ta, lôphiazy liata khiepa ta ropa a châ.

¹⁷ Zawsua ta zawpi awpa pyu a thei nahta, Mawsi hnohta, “Riehmo liata adyuhna pyu a y,” tah ta.

¹⁸ Mawsi ta, “Cha pyu cha pahniena pyu châ leipa ta, Pahniepazy chana ao châ hra vei, Hla sapa pyu tlao ei thei,” tah ta.

¹⁹ Mawsi cha riehmo kiapâh a kei tlô nahta, viahchaotaw nothlahpa nata ama lâpazy hmô ta. Mawsi cha a hiehâh ngaita ta, a ku liata lôphiazy cha tlâh thaby liata thy ta, kei khai ha ta.

²⁰ Viahchaotaw nothlahpa ama taopa cha la ta, mei ta rao ta, a dina taihta charo ta, a paohpa ti liata hie ta, Izarei sawzy padosa ta.

²¹ Mawsi ta Arawna hnohta, “He phopi heta na chô liata khâpa ma tao ei ta, he hawhpa hmo molei ngaitapa he ama chô liata na patlôsa?” tah ta.

²² Arawna ta, “Ei zibeipa a pathi ia khah sy. He phopi he pahno chi ta, moleina lâ a heihpa ama châ tahpa na pahno.

²³ Âmo ta ei hnohta, ‘Eima hmia lâta a sie awpa khazoh miah taopa teh. Izi râh tawhta miah a kaw chhi papuatuhpa Mawsi chô liata khâpa hmo ma a tlô tahpa pahno khao ma pi,’ vaw tah ei ta.

²⁴ Kei ta ama hnohta, ‘Ngôh a hneipa maihta pahluh mawh ei sy,’ tah na ta. Na vaw pie ei ta, cha cha mei liata phôh na ta, chatanachata he viahchaotaw nothlahpa he a vaw pua thlâh haw!” tah ta.

²⁵ Zawpi âmo kho ta ama ypa Mawsi ta hmô ta. Arawna ta ama chariahpazy mohmô ta mohnao chhihpa ta yna taihta âmo kho ta a paysapa a châ.

²⁶ Mawsi cha riehmo chhikao liata a duah ta, “Abeipa chhâh a châpa maih kei lâ a vy teh u,” tah ta. Livai sawchapaw zydua ano lâ vawh ei ta.

²⁷ Mawsi ta ama hnohta, “Zehôvâh, Izarei Khazohpa ta hetana heta a tah: ‘Chyhsa to nama zaozi phia u la, riehmo chhikao to liata a ngia u la, nama unawhzy, nama ylâhpazy, nama vaihzy thie teh u,’” tah ta.

²⁸ Livai sawchapawzy ta Mawsi bie hawhta tao ei ta, cha noh liata chyhsa sâh thôh rachhôh ama thi.

²⁹ Mawsi ta, “Tanoh he Abeipa châta a panano teh u. Chyhsa to ta ama sawchapawzy nata ama unawhzy a dyuh ha ei ta, chavâta tanoh he Abeipa ta byhnâ a cha pie aw ei,” tah ta.

³⁰ A mylâ ta Mawsi ta zawpi hnohta, “Moleina lai ngaitapa nama tao haw. Tahmâ he Abeipa lâ khy aw na ta, nama moleina chatlaina ei tao thei aw tly ma,” tah ta.

³¹ Chatanachata Mawsi cha Abeipa lâ khy heih ta, a hnohta, “He phopi heta moleina lai ngaitapa ama tao haw. Ngôh khazoh amâ tao.

³² Ngiachhiepa ta ama moleinazy rie a ngiahthai mah y. Nâ ngiahthai thei leipa khiahta cha, na châbu liata na ropa tawhna khata na thy ha mah y,” tah ta.

³³ Abeipa ta Mawsi hnohta, “Ahy rai ei chô liata hmo a paraopa maih ei châbu tawhta ei thy aw.

³⁴ Tahmâ zu la, phopi cha, sie nawpa ei cha chhopa su lâ a chhi mah y. Ei vâlyuhchâpa ta hmia a châ sahpa aw. Chatahrasala ei cha vaw tly ti ei ta cha, ama moleina vâta ei hrie pyly aw ei,” tah ta.

³⁵ Chatanachata viahchaotaw nothlahpa ama taopa vâta, Arawna taopa nothlahpa vâna tlai khata, Abeipa ta Izarei phopi cha potlana ta a hrie haw.