PUASAINA 31 - Mara Bible RV (BSI)

Bezale nata Ôhôliaba awna

¹ Abeipa ta Mawsi hnohta,

² “Pachâ teh, Zudâh chi Hurâ sawchapawpa Uri sawchapawpa Bezale cha a moh tlai ta aw na ta,

³ ano cha sona, novâhna, pahnona nata zôthaina tozy hnei awpa ta Khazohpa Thlahpa ta ei pabie.

⁴ Ngôh, tâkâ nata dawh chhaichhizy â ngia ngaitapa ta daih thaina zôthaina zy,

⁵ lôsôhpazy daih ta pangaih thaina zy, tho khie thaina nata kuzô thaina to hnei awpa ta, Khazohpa Thlahpa ta ei pabie.

⁶ A hnohta a hria awpa ta, Dânâ chi Ahisamâ sawchapawpa Ôhôliaba ei rao. Tao awpa bie ei cha piepa zydua ama tao thei nawpa ta, novâhpa zydua palôh liata sona soh na ta,

⁷ ahmaohna poh o, Biehrai Byh nata a chô liata zawngiahna dyuchhai, poh o chhôh liata hmobaoh zydua,

⁸ tlâhkhai nata a hmobaohzy, ngôh suapa ta taopa meiôh tôh hmobaohzy, ropahâhpa maisâh,

⁹ raopa hlâna maisâh nata a hmobaoh zydua, rahô nata a patyuna,

¹⁰ theihthaipa chakaona rai ama hria nawpa ta chysia a ngia ngaitapa ta sapa theihthaipa Arawna chysia pathaihpa nata a sawchapawzy chysia,

¹¹ sathaw pathaihpa nata Su Pathaihpa châta ropahâhpa pahâh ngaitapazy ama tao thei nawpa ta, zôthaipa zydua hnohta sona ei pie ei. Tao awpa ta bie ei cha piepa zydua hawhna khata ama tao awpa a châ,” tah ta.

Pahânoh

¹² Abeipa ta Mawsi hnohta,

¹³ “Izarei sawzy hnohta hetana heta reih teh, ‘Ei Pahânohzy nama chay awpa a châ. Cha cha nama chhâ zydua châta kei nata nâmo likah ta ngiana châ aw ta, chatanachata kei he Zehôvâh Mekâdiske ei châ tahpa nama pahno aw.

¹⁴ Pahânoh cha nama châta noh pathaihpa a châpa vâta nama chay awpa a châ. Pahânoh a papuapaleipa maih cha thie thlyu awpa châ ta, cha noh liata raihria kheihawhpa rai a hriapa chyhsa cha, a phopi tawhta chhawh pathlahpa a châ aw.

¹⁵ Noh charu chhôh rai hria aw ei chi ta, a noh sarina noh cha a pahâ nawpa Pahânoh zachhihpa châ ta, Abeipa châta noh pathaihpa a châ. Ahy rai Pahânoh ta rai a hriapa cha thie thlyu awpa a châ.

¹⁶ Chavâta Izarei sawzy ta Pahânoh cha ama chay awpa châ ta, chhâzaw biehrai ta hneipa ta, ama chhâ zydua ta ama chay awpa a châ.

¹⁷ Noh charu chhôh Abeipa ta avâ nata alei tao ta, a noh sarina noh cha a pahâpa ta a hu â pahnopa vâta, Pahânoh cha kei nata Izarei sawzy azaona ngiana a châ zôzaw aw,’ tah mah y,” tah ta.

¹⁸ Khazohpa ta Mawsi cha Sinai Tlâh liata bie â chho khai nahta, Khazohpa kudy ta ropa biehrai lôphia mianozy cha Mawsi hnohta pie ta.