PUASAINA 30 - Mara Bible RV (BSI)

Ropahâhpa maisâh

¹ “Ropahâhpa rao nawpa maisâh tao aw chi ta, akeisia tho ta na tao aw.

² A doh lâ dy kha seih aw ta, a hâ lâ dy kha kawh aw ta, ki palih a hnei aw. Dy no a sâh aw ta, a kizy cha maisâh nata â pazao khai awpa a châ.

³ A chôzy, a kâzy nata a kizy ngôh suapa ta pahu aw chi ta, a kiahzy ngôh pakyupa ta na padô aw.

⁴ Maisâh asyna lâhrei chahraoh nawpa ta, maisâh kiah ry a kâ chavei chachâh ta ngôh tiakizy na pataoh aw.

⁵ Akeisia tho ta a lâhreizy cha tao aw chi ta, ngôh ta na pahu aw.

⁶ Maisâh cha Biehrai byh chô lâta pohraipa hmiakô, Biehrai byh chô lâta Zawngiahna Dyuchhai hmiakô liata ei châ tyh nawpa su liata na patyu aw.

⁷ Arawna ta maisâh chô liata ropahâhpa rao tyh aw ta, my chareih ta meiôhzy a patohpatia tita a rao tyh aw.

⁸ Zâlâ ta meiôhzy a pakhaih tita chhao ropahâhpa cha rao tyh aw ta, chatanachata nama chhâ zydua châta Abeipa hmiakô liata ropahâhpa a châ lymâ aw.

⁹ Cha liata ropahâhpa hropa tlyma, raopa hlâna tlyma, niepa hlâna tlyma nama hlâ awpa châ leipa ta, dopa hlâna chhao a chô liata nama bao awpa châ vei.

¹⁰ Arawna ta kô kha ta ei kha maisâh kizy chô liata aryhna a tao tyh aw. Molei chatlaina thisaih hmâpa ta aryhna cha, kô kha ta ei kha, nama chhâ zydua liata tao tyh awpa a châ. Cha cha Abeipa châta hmo pathaih ngaitapa a châ,” tah ta.

Hrona chatlaina sôh

¹¹ Abeipa ta Mawsi hnohta,

¹² “Izarei sawzy maluhpi na rei tita, ama maluh na reipa chyhsazy chata ama hrona chatlaina hmopiepa Abeipa lâ ama hlâ awpa a châ. Chatanachata ama maluh na rei tita, ama hry liata hri vaw tlô leipa ta a y aw.

¹³ Maluhpi reina liata pahlaopa maihta, hezy he Abeipa lâ ama hlâ aw: Su pathaihpa liata hmâpa sekel khophie ama pie awpa a châ. Sekel tlaw kha liata kerâ mia kih y ta, sekel khophie cha Abeipa lâta hmohlâpa a châ aw.

¹⁴ Maluh reipazy hry liata a hlaopa kô kih tawhta a chô lâ maihta Abeipa lâta hmohlâpa cha ama pie awpa a châ.

¹⁵ Nama hrona chatlai nawpa ta Abeipa lâ hmo nama hlâ tita, chyhsa hneirôhpa ta sekel khophie hlâta hluh via a pie awpa châ leipa ta, dyhchhiepa chhao ta sekel khophie hlâta chyh via a pie awpa châ vei.

¹⁶ Hrona chatlaina sôh cha Izarei sawzy tawhta la aw chi ta, ahmaohna poh o liata chakaona rai hria nawpa châta na pie aw. Chatanachata nama hrona chatlai nawpa ta nama piepa a châzie Izarei sawzy ta Abeipa hmiakô liata namâ thei thlâhna a châ aw,” tah ta.

Kuphei asina rahô

¹⁷ Abeipa ta Mawsi hnohta,

¹⁸ “A si nawpa ta dawh rahô tao aw chi ta, a patyuna dawh chhaota na tao aw. Cha cha ahmaohna poh o nata maisâh likawh liata patyu aw chi ta, a chhôh liata ti na soh aw.

¹⁹ Cha cha Arawna nata a sawchapawzy ku nata phei a si nawpa a châ aw.

²⁰ Ahmaohna poh o chhôh lâ amâ ngia tita, ama thi lei nawpa ta, ti ta amâ si awpa châ ta, Abeipa lâta mei ta raopa hmohlâpa chakaona rai hria awpa ta maisâh amâ hnia tita chhao, ama thi lei nawpa ta, ti ta amâ si awpa a châ.

²¹ Ama thi lei nawpa ta ama ku nata pheizy amâ si tyh awpa a châ. Cha cha ano nata a pathlazy nata ama chhâ zydua châta chhâzaw bieraopa a châ aw,” tah ta.

Sathawthuna sathaw nata ropahâhpa

²² Abeipa ta Mawsi hnohta,

²³ “Ropahâhpa pahâh chaipazy a tlyh la, Achhyna o sekel reizie ta, deiryh ti sekel 500 a hripa, cha khophie ta lôiasoh ropahâhpa sekel 250 a hripa, basuh ropahâhpa sekel 250 a hripa,

²⁴ lôiasoh chihropa sekel 500 a hripa nata ôli thaw chhiehroôh ôh kha la aw chi ta,

²⁵ chazy hmâpa ta ropahâhpa taotuhpa taozie hawhta sathaw pathaihpa na tao aw. Cha cha sathawthuna liata hmâ awpa sathaw pathaihpa a châ aw.

²⁶ Cha ropahâhpa chata apakhyna poh o, Biehrai Byh,

²⁷ tlâhkhai nata a hmobaoh zydua, meiôh tôh nata a hmobaohzy, ropahâhpa maisâh,

²⁸ raopa hlâna maisâh nata a hmobaoh zydua, rahô nata a patyunazy na hnia khai aw.

²⁹ Chazy cha hmo pathaih ngaitapa ama châ thei nawpa ta pathaisa aw chi ta, cha hmozy a hriapa maih cha ama pathaih lymâ aw.

³⁰ Kei châta theihthaipa chakaona rai hriapa ta eina chakao thei nawpa ei ta, Arawna nata a sawchapawzy cha sathawthupa ta na pathaisa aw ei.

³¹ Chatawhcha Izarei sawzy hnohta, ‘He he nama chhâ zydua châta sathaw pathaihpa a châ aw.

³² Chyhsa pôhpa liata hry awpa châ leipa ta, he sathaw taozie hawhna heta sathaw hropa tao awpa châ hra vei. He sathaw he cha pathaih ta, nama châta hmo pathaihpa a châ.

³³ He sathaw taozie hawhta sathaw hropa a taopa nata theihthaipa a châ leipa chô liata a hmâhpa cha, a phopi tawhta chhawh pathlahpa a châ aw,’ tah mah y,” tah ta.

³⁴ Abeipa ta Mawsi hnohta, “Ropahâhpa pahâh ngaitapa stâti, ônichâ nata kâbanu zy cha deiryh pasoh ngaitapa chhaota khopathliahna â khopa sai ta la aw chi ta,

³⁵ cha cha ropahâhpa taotuhpa taozie hawhta taopa ta, alôh mia aw chi ta, ropahâhpa pasohpa nata pathaih ngaitapa na tao aw.

³⁶ Thokha a dipa ta charo aw chi ta, ei châ vaw tyh nawpa ahmaohna poh o chhôh liata Biehrai Byh hmiakô liata na soh aw. Cha cha nama châta hmo pathaih ngaitapa a châ aw.

³⁷ Cha ropahâhpa, a tao nawpazie ta na tao awpa cha, nâmo châta namâ tao awpa châ leipa ta, Abeipa châta hmo pathaihpa ta namâ pyh awpa a châ.

³⁸ Ahy rai ano châta ropahâh chakhyhpa hawhta a hmâhpa cha, a phopi tawhta chhawh pathlahpa a châ aw,” tah ta.