PUASAINA 29 - Mara Bible RV (BSI)

Theihthaipazy chahnaona

¹ “Arawna nata a sawchapawzy ta theihthaipa rai hriapa ta eina chakao thei nawpa ei ta, âmo cha pathaisa awpa châ ta, ama chô liata hetana heta na tao awpa a châ. Viahchao tôh dawpa pô kha nata mietaku tôhpa seina hnei leipa pô no la aw chi ta,

² viahdie dipa hmâpa ta viahchhâ puahpa thinô pahlao leipa, sathaw pahlaopa viahchhâ thlôhpa thinô pahlao leipa nata sathaw hniapa viahchhâ apapa thinô pahlao leipazy na tao aw.

³ Chazy cha hrâbyh miakha liata khô aw chi ta, viahchao tôhpa nata mietaku tôhpa pô no chhao chata viahchhâ hrâbyh cha na vaw cheih aw.

⁴ Arawna nata a sawchapawzy cha ahmaohna poh o chhikao lâ a vaw chhi aw chi ta, âmo cha ti ta na pasi aw ei.

⁵ Chatawhcha chysiazy la aw chi ta, Arawna cha chôtho, ephaw poh, ephaw nata chachôhna vyhphaozy pakysa aw chi ta, zôpha kawpa ta sapa ephaw chaisaihna ta a chai na saih aw.

⁶ A luh liata lakhu pakhu aw chi ta, lakhu chô liana cha lakho pathaihpa na pakho aw.

⁷ Sathawthuna châta taopa sathaw la aw chi ta, a luh liata bao aw chi ta, sathaw na thu aw.

⁸ Chatawhcha a sawchapawzy a vaw chhi aw chi ta, chôtho na paky aw ei.

⁹ Arawna nata a sawchapawzy cha chaisaihna ta ama chai saih aw chi ta, lakhu pakhu aw chi ta, chatanachata theihthaipa châna cha chhâzaw ta âmo eih châ awpa ta bieraopa ta chahnaopa a châ aw. Cha hawhna chata Arawna nata a sawchapawzy cha na chahnao aw ei.

¹⁰ “Ahmaohna poh o hmia liata viahchao tôhpa vaw cheih aw chi ta, Arawna nata a sawchapawzy ta viahchao tôhpa luh chô liata ama ku ama pahnieh aw.

¹¹ Chatawhcha ahmaohna poh o chhikao thaby liata Abeipa hmiakô ta viahchao tôhpa cha na thie aw.

¹² Viahchao tôhpa thisaih cha la aw chi ta, maisâh kizy liata na kuparo ta hnia aw chi ta, thisaih laibâhpazy cha maisâh thaby liata na patlai khai aw.

¹³ A rihhri thaw zydua la aw chi ta, a pathi a pahlypa thaw nata a lôpo miano nata a thaw a pahlypazy chhaota maisâh liata na rao khai aw.

¹⁴ Viahchao tôhpa sa, a vo nata a iezy deikua cha, riehmo khôtho liata na rao awpa a châ. Cha cha moleina hlâna a châ.

¹⁵ “Mietaku tôhpa pô kha vaw cheih aw chi ta, Arawna nata a sawchapawzy ta mietaku tôhpa luh chô liata ama ku ama pahnieh aw.

¹⁶ Mietaku tôhpa cha thie aw chi ta, a thisaih la aw chi ta, maisâh kâ zydua liata na thia aw.

¹⁷ Mietaku tôhpa cha pachhaih aw chi ta, a chhôrih nata a pheizy pasi aw chi ta, chazy cha a satlozy nata a luh chhaota na pahlyh khai aw.

¹⁸ Mietaku tôhpa cha a zydua ta maisâh liata rao aw chi ta, cha cha Abeipa châta raopa hlâna châ ta, Abeipa lâta mei ta hmohlâpa ropahâhpa a châ.

¹⁹ “Mietaku tôhpa hropa a vaw chhi heih aw chi ta, Arawna nata a sawchapawzy ta mietaku tôhpa luh chô liata ama ku ama pahnieh aw.

²⁰ Mietaku tôhpa cha thie aw chi ta, a thisaih la aw chi ta, Arawna nakao chachâh lâ pai liata zy, a sawchapawzy nakao chachâh lâ pai liata zy, ama ku chachâh lâ kupi liata zy, ama phei chachâh lâ pheipi liata zy na hnia aw. Thisaih laibâhpazy cha maisâh kâ zydua liata na thia aw.

²¹ Maisâh chô liata thisaih nata sathawthuna châta taopa sathaw la aw chi ta, Arawna nata a chysiazy liata nata a hnohta a ypa a sawchapawzy nata ama chysiazy liata na thia aw. Chatanachata ano nata a chysiazy nata a hnohta a ypa a sawchapawzy nata ama chysiazy cha pathaisapa a châ ha aw.

²² “Cha cha chahnaona mietaku tôhpa châ ta, a thawzy, a lahmei thawhpazy, a rihhri thawzy, a pathi a pahlypa thawzy, a lôpo miano nata a pahlypa thawzy nata a byh chachâh lâ la aw chi ta,

²³ Abeipa hmiakô liata a ypa viahchhâ thinô pahlao leipa hrâbyh tawhta viahchhâ puahpa miakha, sathaw pahlaopa viahchhâ thlôhpa miakha nata viahchhâ apapa miakha la hra aw chi ta,

²⁴ cha zydua cha Arawna ku nata a sawchapawzy ku liata soh aw chi ta, chaluahpa hlâna châta Abeipa hmiakô liata na chaluah aw.

²⁵ Cha khai tawhta ama ku tawhta la aw chi ta, maisâh liata raopa hlâna chô liata na rao aw. Cha cha Abeipa hmiakô liata ropahâhpa châ ta, Abeipa lâta mei ta hmohlâpa a châ.

²⁶ “Arawna chahnaona mietaku tôhpa cha a palôh la aw chi ta, chaluahpa hlâna châta Abeipa hmiakô liata na chaluah aw. Cha cha na tovyuh a châ aw.

²⁷ Chaluahpa hlâna châta chaluah hapa, Arawna nata a sawchapawzy chahnaona mietaku tôhpa palôh nata chalopa hlâna châta chalo hapa phei cha na pathaisa awpa a châ.

²⁸ A phei cha Arawna nata a sawchapawzy ta Izarei sawzy tawhta chhâzaw ta ama to awpa a châ. Cha cha chalopa hlâna a châ. Aryhna hlâna atheihnazy tawhta Izarei sawzy ta ama hlâ awpa chalopa hlâna châ ta, Abeipa lâta ama hmohlâpa a châ aw.

²⁹ “Arawna chysia pathaihpazy cha a sawchapawzy ta to pachhuah lymâ aw ei ta, cha chysia pathaihpazy a tobina chôta sathawthupa nata chahnaopa ama châ aw.

³⁰ Theihthaipa châ awpa ta ano a thlatuhpa a sawchapaw ta, su pathaihpa liata chakaona rai hria awpa ta ahmaohna poh o liata â ngia tita, chysia pathaihpazy cha noh sari chhôh â tobi aw.

³¹ “Chahnaona châta hmâpa mietaku tôhpa cha la aw chi ta, su pathaihpa liata a sa pasyuh aw chi ta,

³² Arawna nata a sawchapawzy ta mietaku tôhpa sa nata hrâbyh liata viahchhâzy cha ahmaohna poh o chhikao thaby liata ama nie aw.

³³ Âmo chahnaona nata pathaisana châta aryhna hmohlâpazy cha nie aw ei ta, hmo pathaihpa a châpa vâta, khôtho chyhsa ta a nie awpa châ vei.

³⁴ Chahnaona sa tlyma, viahchhâ tlyma, a mylâ taihta a laibâhpa a y khiahta cha, a laibâhpa cha mei ta na rao awpa a châ. Hmo pathaihpa a châpa vâta nie awpa châ vei.

³⁵ “Bie ei cha piepa zydua hawhna khata Arawna nata a sawchapawzy chô liata tao aw chi ta, âmo chahnao awpa ta noh sari chhôh na panano tua awpa ei a châ.

³⁶ Aryhna tao nawpa ta moleina hlâna atheihna châta viahchao tôhpa noh chareih ta na hlâ aw. Maisâh cha aryhna taopa ta pathaisa aw chi ta, a pathaih thei nawpa ta sathaw na thu aw.

³⁷ Noh sari chhôh aryhna taopa ta maisâh cha pathaisa aw chi ta, chatanachata maisâh cha hmo pathaih chaipa vaw châ aw ta, maisâh a hriapa maih ama pathaih lymâ aw.

Noh chareih hmohlâpa

³⁸ “Maisâh chô liata hmo na hlâ awpa cha, he he a châ: Noh chareih ta kô kha uhtheipa mietakutaw pô no lymâ na hlâ aw.

³⁹ Mietakutaw pô kha my ta hlâ aw chi ta, mietakutaw hropa zâlâ ta na hlâ tyh aw.

⁴⁰ Mietakutaw pô kha hlâna liata viahdie dipa kachu su hrawh su kha nata sathaw saohpa chhiehraôh ôh kha pahlao aw chi ta, dopa hlâna châta kresawhti chhiehroôh ôh kha na pahlao aw.

⁴¹ Mietakutaw hropa cha zâlâ ta hlâ aw chi ta, my ta niepa hlâna taozie hawhta nata dopa hlâna taozie hawhta tao aw chi ta, cha cha Abeipa lâta mei ta hmohlâpa ropahâhpa a châ aw.

⁴² Cha cha nama chhâ zydua ta ahmaohna poh o chhikao thaby liata Abeipa hmiakô ta khâ nama hlâ tyh awpa raopa hlâna châ aw ta, cha liata châ tyh aw na ta, bie ei châ chho tyh aw.

⁴³ Cha liata Izarei sawzy chhao a tyh tyh hra aw ei na ta, chatanachata poh o cha ei rônahna ta pathaisapa a châ aw.

⁴⁴ Ahmaohna poh o nata maisâhzy pathaisa aw na ta, Arawna nata a sawchapawzy chhao, theihthaipa rai hriapa ta eina chakao thei nawpa ei ta ei pathaisa hra aw ei.

⁴⁵ Izarei sawzy hry liata pahrâ aw na ta, ama Khazohpa ei châ aw.

⁴⁶ Ama hry liata ei pahrâ thei nawpa ta, kei he Izi râh tawhta âmo a kaw chhi papuatuhpa Abeipa ama Khazohpa ei châ tahpa ama pahno aw. Kei he Abeipa ama Khazohpa ei châ.