PUASAINA 28 - Mara Bible RV (BSI)

Theihthaipa chysia

¹ “Na unawhpa Arawna cha, a sawchapawzy chhaota, Izarei sawzy hry tawhta pananopa ta na hnohta a chhi aw chi ta, chatanachata Arawna nata a sawchapaw Nâdâ, Abihu, Eliaza nata Ithamâ zy cha ei theihthaipa rai hriapa ta eina chakao aw ei.

² Na unawhpa Arawna châta a rônah nawpa nata â ngia nawpa ta chysia pathaihpa na taopa aw.

³ Sona thlahpa ta ei pabiepa zôthaipa zydua hnohta Arawna chysia taopa awpa ta chho aw chi ta, chatanachata Arawna cha pathaisapa ta y aw ta, kei châta theihthaipa chakaona rai a hria thei aw.

⁴ Hezy he zôthaipazy ta chysia ama tao awpazy cha a châ: Chachôhna vyhphao, ephaw, viahkao pasipa, chôtho chapaipa, lakhu nata chaisaihna zy. Kei châta theihthaipa chakaona rai ama hria thei nawpa ta, zôthaipazy ta na unawhpa Arawna nata a sawchapawzy châta chysia pathaihpazy ama taopa aw.

⁵ Ngôh, pala nohpa, saihdôhpa, saihlawpa nata pala rih dipa pabaohpazy hmâpa ta theihthaipa chysia cha ama tao aw.

⁶ “Ephaw tao aw ei ta, cha cha ngôh, pala saihdôhpa nata saihlawpa nata pala rih dipa pabaohpazy hmâpa ta zôpha kawpa ta ama tao aw.

⁷ Ephaw cha a luh pawhmaozy liata a ngiatlâh ri miano y aw ta, cha chata a hmia lâ nata a hnôh lâ a pazao aw.

⁸ Zôpha kawpa ta sapa chaisaihna a chô liata y aw ta, ephaw nata sapati awpa châ ta, cha cha ngôh, pala nohpa, saihdôhpa, saihlawpa nata pala rih dipa pabaohpazy ta sa awpa a châ.

⁹ Chatawhcha awnisi lô miano la aw chi ta, cha liana chata Izarei sawzy moh roh aw chi ta,

¹⁰ ama pina kô â pazinazie hawhta alô miakha liata pacharu moh, alô hropa liata pacharu moh na roh aw.

¹¹ Lôsôhpa daih thaipa ta moh chahnaona a taopa hawhta, Izarei saw pahrawh hleinozy moh cha, alô miano liana chata roh aw chi ta, ngôh patusana liata na pangaih aw.

¹² Alô mianozy cha ephaw ngiatlâh rizy liata bai aw chi ta, cha cha Izarei sawzy atheithlâhna alôzy châ aw ei ta, chatanachata Abeipa hmiakô liata atheithlâhna châta Arawna ta Izarei saw pahrawh hleino mohzy cha a ngiatlâh kârano ta a phaoh tyh aw.

¹³ A patusanazy ngôh ta tao aw chi ta,

¹⁴ ngôh suapa bâlia ri no chaori hawhta charih aw chi ta, cha bâlia charipazy cha patusana liata na pazao aw.

¹⁵ “Pachiana chachôhna vyhphao tao aw chi ta, cha cha zôthaipazy ta zôpha kawpa ta ama tao aw. Ephaw taozie hawhta, ngôh, pala nohpa, saihdôhpa, saihlawpa nata pala rih dipa pabaohpazy hmâpa ta na tao aw.

¹⁶ Chachôhna vyhphao cha ki palih hnei aw ta, pathopa ta tao awpa châ ta, a doh lâ kha kha, a hâ lâ kha kha ta patho awpa a châ.

¹⁷ Cha liata lôsôhpazy tlâh palih ta patlâh aw chi ta, tlâh khana cha sadôni, tôpazi nata kabuni lôzy châ aw ta,

¹⁸ tlâh nona cha emyrâ, saphirâ nata lônah zy châ aw ta,

¹⁹ tlâh thôhna cha zaki, akate nata amethi lôzy châ aw ta,

²⁰ tlâh palihna cha beri, awnisi nata zaspi lôzy a châ aw. Chazy cha ngôh patusana liata pangaih awpa a châ.

²¹ Lôsôhpa miahrawh hleino y aw ta, chazy cha Izarei saw pahrawh hleinozy moh lymâ hawhta ama moh bipa a châ aw. Lôsôhpa miahrawh hleinozy cha moh chahnaona hawhta tao chyu awpa châ ta, lôsôhpa miakha chô liata Izarei chi hrawh hleino hry liata chi kha moh pachohsa lymâpa a châ aw.

²² Chachôhna vyhphao chô liata ngôh suapa ta taopa bâlia, chaori hawhta charipazy na tao aw.

²³ Chachôhna vyhphao châta ngôh tiaki miano tao aw chi ta, cha tiaki miano cha chachôhna vyhphao pai chavei chachâh liata na pataoh aw.

²⁴ Ngôh bâlia miano cha chachôhna vyhphao pai chavei chachâh liata tiaki miano liata na buh aw.

²⁵ Bâlia charipa pawhmao raihrie cha patusana miano liata pazao aw chi ta, chazy cha ephaw hmia lâta a ngiatlâh rizy liata na buh aw.

²⁶ Ngôh tiaki miano tao aw chi ta, chazy cha chachôhna vyhphao ry lâ liata ephaw a daihpa lâta a pai chavei chachâh liata na pataoh aw.

²⁷ Ngôh tiaki hropa miano tao aw chi ta, chazy cha ephaw hmia lâta a ngiatlâh rizy thaby liata na pataoh aw. Cha ngôh tiakizy cha zôpha kawpa ta sapa ephaw chaisaihna chô lâta â pazaona kiapâh liata a y awpa a châ.

²⁸ Chachôhna vyhphao tiakizy cha ephaw tiakizy nata pala nohpa charipa ta chahry pabaohpa châ aw ta, chatanachata chachôhna vyhphao cha zôpha kawpa ta sapa ephaw chaisaihna chô lâta y aw ta, ephaw liata â ipa ta â bai aw.

²⁹ Chatanachata Arawna cha su pathaihpa lâ a vaw tita, pachiana chachôhna vyhphao liata ropa Izarei sawzy moh cha a pathipalôh liata y aw ta, atheithlâhna châta Abeipa hmiakô liata a tlôkhei tyh aw.

³⁰ Pachiana chachôhna vyhphao liata Uri nata Thumi soh aw chi ta, Abeipa hmiakô lâ Arawna a vaw tita, cha cha a pathipalôh liata y aw ta, chatanachata Izarei sawzy pachiana cha Arawna ta a pathipalôh liata khatino rai ta a theipa ta, Abeipa hmiakô liata â dua tyh awpa a châ.

³¹ “Ephaw ry lâta a ky awpa viahkao pasipa cha a nohpa sai ta na tao aw.

³² Luh chahraoh nawpa ta a liah liata a khaoh y aw ta, cha khaoh cha â hrie lei nawpa ta viahkao rao meipa hawhta a kiah na mei awpa a châ.

³³ A pai liata pawmikarânâ nothlahpa nohpa, saihdôhpa nata saihlawpa zy tao aw chi ta, chazy cha viahkao pasipa kiah padôpa ta y aw ei ta, ama likawh liata ngôh lailô tawtawzy na pataoh aw.

³⁴ Viahkao pasipa pai liata ngôh lailô nata pawmikarânâ zy cha, ngôh lailô miakha nata pawmikarânâ miakha lymâ ta i-âhpa ta na pataoh aw.

³⁵ Arawna ta chakaona a hnei tita viahkao pasipa cha a ky tyh aw ta, Abeipa hmiakô su pathaihpa liata â ngia tita nata a pua tita a pyu thei theipa châ aw ta, chatanachata thi aw vei.

³⁶ “Ngôh suapa dawhrâ tao aw chi ta, cha liata ‘Abeipa châta Pathaihpa,’ tahpa bie cha moh chahnaona taozie hawhta taopa ta, na pachohsa aw.

³⁷ Cha cha theihthaipa lakhu liata pala nohpa charipa ta rie aw chi ta, theihthaipa lakhu hmia lâ liata na bai aw.

³⁸ Cha cha Arawna khi liata y aw ta, Izarei sawzy ta ama hmopiepa pathaihpa châta ama hlâ awpa hmo pathaihpazy liata moleina a ypazy cha, Arawna ta phaoh khai aw ta, Abeipa hmiakô liata a ly tlâh ama châ thei nawpa ta, Arawna khi liata khâ a y thlâh ha awpa a châ.

³⁹ “Chôtho cha pala rih dipa ta a chei a ngia ngaitapa ta tao aw chi ta, theihthaipa lakhu chhao pala rih dipa ta tao hra aw chi ta, chaisaihna cha kiky pakyupa ta na tao aw.

⁴⁰ “Cha hawhna chata Arawna sawchapawzy châta chôtho, chaisaihna nata lakhuzy taopa aw chi ta, cha cha ama rônahna nata amâ ngiana châta a châ aw.

⁴¹ Cha chysiazy cha na unawhpa Arawna nata a sawchapawzy pakysa aw chi ta, theihthaipa rai hriapa ta eina chakao thei nawpa ei ta, âmo cha sathawthupa ta, chahnao aw chi ta, na pathaisa aw ei.

⁴² Ama sapa thluahruana khu nawpa ta, âmo châta pala rih dipa chaopasy taopa aw chi ta, chaopasy cha chai tawhta byhhmia taih a pasi awpa a châ.

⁴³ Cha chysiazy cha Arawna nata a sawchapawzy ta ahmaohna poh o liata amâ ngia tita nata su pathaihpa liata chakao awpa ta maisâh amâ hnia tita, amâ ky tyh aw. Chataleipatala thailei châ aw ei ta, ama thi pathlei aw. Cha cha Arawna nata a pathlazy châta chhâzaw bieraopa a châ aw.