PUASAINA 27 - Mara Bible RV (BSI)

Raopa hlâna maisâh

¹ “Akeisia tho ta maisâh, a doh lâ dy pangawh a seihpa nata a hâ lâ dy pangawh a kawhpa na tao aw. Maisâh cha ki palih hnei aw ta, dy thôh â sâh aw.

² Maisâh chaki miah palih liata a kizy tao aw chi ta, cha a kizy cha maisâh nata â pazao khai awpa châ ta, dawh ta na pahu aw.

³ Maisâh buchâh thyna beihzy, buchâh linazy, rahôzy, sa thaona thuakuzy nata mei lanazy tao aw chi ta, maisâh chhaichhi zydua cha dawh ta na tao khai aw.

⁴ Maisâh châta dawh sao tao aw chi ta, sao chô lâ a ki mia palihzy liata dawh nali miapalih na pataoh aw.

⁵ Dawh sao cha maisâh kiah ry lâ, maisâh khophie liata na phaw aw.

⁶ Akeisia tho ta maisâh lâzy tao aw chi ta, dawh ta na pahu aw.

⁷ A lâzy cha maisâh tiakizy liata chahraoh aw chi ta, maisâh cha a sy a byuh tita, a kâ chavei chachâh ta a lâzy chahraohpa ta a sypa a châ aw.

⁸ Maisâh cha thophia ta dôhpa ta a chhôh pakaopa ta tao aw chi ta, tlâh liata ei cha pahmôpa hawhna tlai khata na tao aw.

Achhyna byureih tlyhmia

⁹ “Achhyna byureih dôhpachhôh tlyhmia tao aw chi ta, tlyhmia chho lâ chhâh cha pala rih dipa pabaohpa ta taopa pohraipa dy za kha a seihpa ta na chhôh aw.

¹⁰ Pohraipa tôh kih nata a patyuna miakih dawh ta taopa châ aw ta, a tôh liata bainazy nata a patusanazy deikua cha tâkâ ta taopa a châ aw.

¹¹ Cha hawhna chata dôhpachhôh tlyhmia maw lâ chhâh chhao pala rih dipa pabaohpa ta taopa pohraipa dy za kha a seihpa ta chhôh aw chi ta, pohraipa châta a tôh miakih y aw ta, a tôhzy patyu nawpa ta dawh ta taopa patyuna miakih y hra aw ta, a tôh liata bainazy nata patusanazy deikua tâkâ ta taopa a châ aw.

¹² Dôhpachhôh tlyhmia notla lâ chhâh cha dy sypangawh a kawhpa pohraipa ta chhôhpa châ aw ta, a tôh miahrawh nata a patyuna miahrawh a y aw.

¹³ Dôhpachhôh tlyhmia nochhi lâ chhâh chhao dy sypangawh a kawh hra aw.

¹⁴ Chhikao hiakha lâta pohraipa parai awpazy cha dy hrawh hleipangawh seih aw ta, a tôh miathôh nata a patyuna miathôh a y aw.

¹⁵ Chhikao hiakha lâta pohraipa parai awpazy chhao dy hrawh hleipangawh seih aw ta, a tôh miathôh nata a patyuna miathôh a y hra aw.

¹⁶ Dôhpachhôh tlyhmia chhikao pohraipa cha dy kih seih aw ta, pala rih dipa pabaohpazy, pala nohpazy, saihdôhpazy nata saihlawpazy ta pohraipa cha kiky tao awpa châ ta, a tôh miapalih nata a patyuna miapalih a y awpa a châ.

¹⁷ Dôhpachhôh tlyhmia dôhna tôh zydua tâkâ ta a patusana tao khai awpa châ ta, a bainazy tâkâ châ aw ta, a patyunazy cha dawh a châ aw.

¹⁸ Chatanachata tlyhmia dôhna cha a doh lâ dy za kha seih aw ta, a hâ lâ dy sypangawh kawh aw ta, a sâhna lâ dy pangawh a châ aw. Pala rih dipa pabaohpa pohraipa ta dôhpa châ aw ta, a patyunazy cha dawh a châ aw.

¹⁹ Chakaona to châta hmâ awpa achhyna byureih chhaichhi zydua, a patusana zydua nata tlyhmia dôhna patusana zydua cha dawh ta tao khai awpa a châ.

Meiôh

²⁰ “Meiôh cha khâ a khaih thei nawpa ta rao awpa châ ta, khaihna châta saohpa ôli thaw pasohpa nâ lâta vaw chei awpa ta Izarei sawzy bie na pie aw.

²¹ Ahmaohna poh o liata Biehrai Byh pohraipa khôtho liata, Arawna nata a sawchapawzy ta meiôh cha Abeipa hmiakô liata zâlâ tawhta my taihta ama pakhaih tyh awpa a châ. Cha cha Izarei saw chhâ vaw y lymâ awpazy châta chhâzaw bieraopa a châ aw.