PUASAINA 26 - Mara Bible RV (BSI)

Achhyna Byureih

¹ “Pohraipa miahrawh ta a chô khupa achhyna byureih na sa awpa a châ. Pohraipa cha pala rih dipa pabaohpa nata pala nohpa, saihdôhpa nata saihlawpazy ta taopa châ aw ta, zôthaipazy ta zô pha ngaitapa ta ama taopa cherubi nothlahpazy pachohsa awpa a châ.

² Pohraipa maih cha a doh lâ dy kih nata dy charie, a hâ lâ dy palih châ aw ta, pohraipa zydua cha amâ kho khai awpa a châ.

³ Pohraipa miapangawh pazao aw chi ta, pohraipa hropa miapangawh na pazao hra aw.

⁴ Pohraipa pazaopa miakhana liata pohraipa chhâna pai liata nali nohpazy tao aw chi ta, cha hawhna chata, pohraipa pazaopa mianona liata pohraipa chhâna pai liata a nalizy na tao hra aw.

⁵ Pohraipa pazaopa miakhana liata a nali sypangawh thla aw chi ta, cha hawhna chata, pohraipa pazaopa mianona pai liata a nali sypangawh na thla hra aw. Cha nalizy cha â dadypa ta ama y awpa a châ.

⁶ Ngôh ta taopa hraina sypangawh tao aw chi ta, hrainazy chata pohraipazy cha hrai pakaoh aw chi ta, chatanachata achhyna byureih tlohpa a vaw châ ha aw.

⁷ “Achhyna byureih chôkhu poh o châta mie hmi pohraipazy tao aw chi ta, pohraipa miahrawh hleikha na tao aw.

⁸ Pohraipa maih cha a doh lâ dy sythôh, a hâ lâ dy palih châ aw ta, pohraipa miahrawh hleikhazy cha â kho khai awpa a châ.

⁹ Pohraipa miapangawh pazaopa nata pohraipa miacharu pazaopa tao aw chi ta, pohraipa miacharuna cha patho aw chi ta, poh o laihmia lâ na padaih aw.

¹⁰ Pohraipa pazaopa miakhana liata pohraipa chhâna pai liata a nali sypangawh thla aw chi ta, pohraipa pazaopa mianona liata pohraipa chhâna pai liata chhao a nali sypangawh na thla aw.

¹¹ “Dawh ta taopa hraina sypangawh tao aw chi ta, hrainazy cha pohraipa nalizy liata chahraoh aw chi ta, chatanachata poh o cha a pazao khai aw ta, poh o tlohpa a vaw châ aw.

¹² Achhyna byureih ohmia, ohnôh nata okâ lâzy khuna châta pathliah awpa ta, poh o pohraipa paizy palai awpa châ ta, achhyna byureih ohnôh lâ liata pohraipa khophie pathliah awpa a châ.

¹³ Poh o pohraipa a doh lâ dy kha lymâ ta hiakha lâ nata hiakha lâ a pai palaipa cha, achhyna byureih khu nawpa ta achhyna byureih okâ chavei chachâh ta pathliah awpa a châ.

¹⁴ Mietaku tôhpa vo pasaihpa hmâpa ta poh o chôkhu tao aw chi ta, tilaipi siahrâ vo ta a chô khu pachhuahna na tao aw.

¹⁵ “Achhyna byureih pâhchhô cha akeisia thophiazy hmâpa ta â tôh lâta na chhôh awpa a châ.

¹⁶ Thophia cha a doh lâ dy hrawh seih aw ta, a hâ lâ dy kha nata khophie a kawh aw.

¹⁷ Pazao nawpa ta thophia zydua a ngaih miano chyu hnei aw ta, cha hawhna chata achhyna byureih pâhchhô thophia zydua cha na tao khai aw.

¹⁸ Achhyna byureih pâhchhô tao aw chi ta, chho lâ daih châta thophia phia kih na tao aw.

¹⁹ A ngaih miano pangaih nawpa ta thophia phia kha ry liata patyuna miano lymâ tao aw chi ta, thophia hropazy ry liata chhao a ngaih miano pangaih nawpa ta patyuna miano lymâ ta tao hrapa ta, thophia phia kih ry liata tâkâ ta taopa patyuna sypalih na tao aw.

²⁰ Achhyna byureih kâ hiakha lâ, maw lâ daih châta thophia phia kih tao aw chi ta,

²¹ thophia phia kha ry liata patyuna miano y aw ta, thophia hropazy ry liata chhao patyuna miano lymâ hneipa ta, thophia phia kih châna chata tâkâ ta taopa patyuna sypalih na tao aw.

²² Achhyna byureih hnôh lâ, notla daih lâ châta thophia phia charu tao aw chi ta,

²³ achhyna byureih hnôh lâta a ki chhânazy châta thophia phia no na tao aw.

²⁴ Cha thophia phia no cha a thaby tawhta a pawhmao taih pakyupa ta, a nali hmiatua chaipa tlôna taih pakyu awpa châ ta, cha hawhna chata a miano ta tao awpa a châ. Cha cha ki no châta a châ aw.

²⁵ Chatanachata thophia phia charie y aw ta, amâ bô nawpa ta tâkâ ta taopa patyuna miahrawh hleicharu a y aw. Thophia phia kha ry liata abôna miano y aw ta, thophia hropazy ry liata chhao abôna miano lymâ a y aw.

²⁶ “Akeisia tho ta pâhchhô tlâhzy tao aw chi ta, achhyna byureih kâ hiakha lâ pâhchhô phiazy paryh nawpa ta tlâh pangawh,

²⁷ achhyna byureih kâ hiakha lâ pâhchhô phiazy paryh nawpa ta tlâh pangawh, achhyna byureih hnôh lâ notla daih lâta pâhchhô phiazy paryh nawpa ta tlâh pangawh na tao aw.

²⁸ Pâhchhô khophie liata a liah tlâh pakhâhpa châ aw ta, cha chata pâhchhô phia hiakha lâ chhâna tawhta hiakha lâ chhâna taihta a lâ ta a hrei aw.

²⁹ Pâhchhô phiazy cha ngôh ta pahu aw chi ta, a tlâhzy hrei pakhâh nawpa châta ngôh tiakizy tao aw chi ta, a tlâhzy cha ngôh ta na pahu aw.

³⁰ Tlâh chô liata ei cha pahmôpa hawhna tlai khata, achhyna byureih cha na sa awpa a châ.

³¹ “Pohraipa cha pala nohpa, saihdôhpa nata saihlawpazy nata pala rih dipa pabaohpazy hmâpa ta tao aw chi ta, cha liata zôpha kawpa ta taopa cherubi nothlahpazy na pachohsa aw.

³² Cha cha ngôh ta pahupa akeisia tho tôh miapalih liata na parai aw. A baina cha ngôh ta tao awpa châ ta, a tôh cha tâkâ ta taopa patyuna miapalih liata patyuh awpa a châ.

³³ Pohraipa cha bainazy liata baih aw chi ta, biehrai byh cha pohraipa chhôh liata soh aw chi ta, chatanachata cha pohraipa cha nama châta su pathaihpa nata su pathaih chaipa pachhaihna a châ aw.

³⁴ Su pathaih chaipa liata biehrai byh chô liata zawngiahna dyuchhai na soh aw.

³⁵ Pohraipa khôtho liata tlâhkhai patyuh aw chi ta, achhyna byureih chho lâ daih tlâhkhai dady liata meiôh sona tôh padua aw chi ta, tlâhkhai cha maw lâ chhâh ta na soh aw.

³⁶ “Poh o chhikao châta pohraipa tao aw chi ta, pala rih dipa pabaohpazy, pala nohpa, saihdôhpa nata saihlawpazy ta pohraipa cha kiky zei awpa a châ.

³⁷ Pohraipa tôh châta akeisia tho tôh pangawh tao aw chi ta, chazy cha ngôh ta pahu aw chi ta, a bainazy ngôh ta taopa châ aw ta, a tôhzy patyuna châta dawh ta taopa patyuna miapangawh na leih awpa a châ.