PUASAINA 25 - Mara Bible RV (BSI)

Achhyna byureih châta thyuna

¹ Abeipa ta Mawsi bie a chho heih ta,

² “Izarei sawzy hnohta bie reih la, thyuna sôh na hlâ awpa ta âmo cha chho mah y. Pie khohna palôh hneipa ta a piepazy tawhta keima châta thyuna sôh nama la awpa a châ.

³ Hezy he âmo tawhta nama la awpa thyunazy cha a châ: Chazy cha ngôh, tâkâ, dawh,

⁴ pala nohpa, saihdôhpa, saihlawpa, pala rih dipa, mie hmi,

⁵ mietaku vo pasaihpa, tilaipi siahrâ vo, akeisia tho,

⁶ meiôh châta sathaw, sathaw athupa nata ropahâh châta rao awpa liata hmâ awpa ia-ôzy,

⁷ ephaw nata chachôhna vyhphao liata kiky zei nawpa ta beri lô nata lôsôhpazy a châ.

⁸ Supathaihpa na taopa mawh ei sy, chatanachata ama hry liata ei pahrâ aw.

⁹ Achhyna byureih nata a chhôh liata hmobaoh zydua cha, a nothlahpa ei cha pahmôpa hawhna heta nama tao awpa a châ.

Biehrai Byh

¹⁰ “Akeisia tho ta Biehrai Byh tao aw ei ta, a doh lâ dy no nata khophie, a hâ lâ dy kha nata khophie kawh aw ta, â sâhna lâ dy kha nata khophie a châ aw.

¹¹ Ngôh suapa ta pahu aw chi ta, a chhôh lâ chhao khôtho lâ chhao pahu khai aw chi ta, ngôh ta a tlâh na pakyu aw.

¹² Biehrai Byh châna chata ngôh tiaki miapalih leih aw chi ta, a phei miapalih liata pataoh aw chi ta, tiaki miano hiakha lâ pataoh awpa châ ta, tiaki miano hiakha lâ na pataoh aw.

¹³ A lâzy châta Akeisia tho hmâh aw chi ta, ngôh ta na pahu awpa a châ.

¹⁴ Byh a sy nawpa ta byh kâ lâta tiakizy liata a lâzy na chahraoh aw.

¹⁵ A lâzy cha Byh tiakizy liata â pataoh thlâh ha awpa châ ta, phia awpa rai châ vei.

¹⁶ Byh chhôh liana chata biehrai ei cha pie awpa cha na khô awpa a châ.

¹⁷ Ngôh suapa ta zawngiahna dyuchhai tao aw chi ta, a doh lâ dy no nata khophie seih aw ta, a hâ lâ dy kha nata khophie a kawh aw.

¹⁸ Ngôh ta cherubi miano daih aw chi ta, zawngiahna dyuchhai nata pazaopa ta, a kâ chavei chachâh ta a y awpa a châ.

¹⁹ Cherubi miakha cha zawngiahna dyuchhai hiakha lâ pai liata pataoh aw chi ta, cherubi hropa cha hiakha lâ chhâna liata pataohpa ta, zawngiahna dyuchhai nata pazaopa ta dyuchhai kâ chavei chachâh ta cherubi miano na tao aw.

²⁰ Cherubizy cha zawngiahna dyuchhai lâ a heih aw ei ta, hmia amâ chhy aw. Ama mathlawzy â sâhpa ta pakai aw ei ta, ama mathlawzy ta zawngiahna dyuchhai cha ama khu aw.

²¹ Zawngiahna dyuchhai cha Byh chô liata patyuh aw chi ta, biehrai ei cha pie awpa cha byh chhôh liata na khô aw.

²² Cha liata châ tyh tyh aw na ta, Izarei sawzy hnohta bie ei pie awpa zydua cha, biehrai byh chô liata zawngiahna dyuchhai liata cherubi mianozy likawh tawhna chata ei cha chho tyh aw.

Viahchhâ tlâhkhai

²³ “Akeisia tho ta tlâhkhai tao aw chi ta, a doh lâ dy no, a hâ lâ dy kha, â sâhna lâ dy kha nata khophie a châ aw.

²⁴ Cha cha ngôh suapa ta pahu aw chi ta, ngôh ta a tlâh na pakyu aw.

²⁵ Pazah tie phiapa ta a tlâh pakyu aw chi ta, a tlâh chhao cha ngôh ta na pakyu aw.

²⁶ Tlâhkhai châta ngôh tiaki miapalih tao aw chi ta, tiakizy cha tlâhkhai kizy liata a ypa tlâhkhai phei miapalihzy liata na pataoh aw.

²⁷ Tlâhkhai a sy tita a lâ chahraoh nawpa ta, tiakizy cha pakyuna liata pataoh awpa a châ.

²⁸ A lâzy akeisia tho ta tao aw chi ta, ngôh ta pahu aw chi ta, chazy hmâpa ta tlâhkhai cha a sy tyh awpa a châ.

²⁹ Tlâhkhai beikohzy, ukâzy, beihraizy nata dopa hlâna patlai nawpa biebuhzy cha ngôh suapa ta na tao awpa a châ.

³⁰ Tlâhkhai liana chata khatino rai ta ypâna viahchhâ ei hmiakô liata na soh awpa a châ.

Ngôh meiôh tôh

³¹ “Ngôh suapa ta meiôh tôh tao aw chi ta, meiôh tôh cha a daih ta daih awpa châ ta, a tôh thaby, a tôh, a nyuzy, a paw ngaihkaruzy, a pawzy â pazao khaipa ta tao awpa a châ.

³² A kâ chavei chachâh ta a chiah miacharu pachiah aw ta, meiôh tôh kâ hiakha lâ a chiah miathôh y aw ta, meiôh tôh kâ hiakha lâ a chiah miathôh a y aw.

³³ Hiakha lâ chhâh chiah liata kuasâh paw pabyuhpa a lyupa nyu miathôh, a paw ngaihkaru nata a paw a hneipa tao aw chi ta, a hiakha lâ chhâh chiah liata chhao kuasâh paw pabyuhpa a lyupa nyu miathôh, a paw ngaihkaru nata a paw a hneipa tao aw chi ta, cha hawh lymâ chata meiôh tôh tawhta a puapa chiah miacharu châta na tao awpa a châ.

³⁴ Meiôh tôh liata kuasâh paw pabyuhpa a lyupa nyu miapalih, a paw ngaihkaru nata a paw a hneipazy a y awpa a châ.

³⁵ A chiah miano ry liata a paw ngaihkaru miakha y aw ta, a chiah hropa miano ry liata a paw ngaihkaru miakha y aw ta, a chiah hropa miano ry liata a paw ngaihkaru miakha y hra aw ta, cha hawh lymâ chata meiôh tôh tawhta a puapa a chiah miacharu châta tao khai awpa a châ.

³⁶ A paw ngaihkaru nata a chiahzy cha meiôh tôh nata â pazao khai awpa châ ta, ngôh suapa ta hmaohkha ta daih khoh khai awpa a châ.

³⁷ Meiôh miasari tao aw chi ta, meiôh tôh liata soh aw chi ta, chatanachata a dady suzy a pakhaih aw.

³⁸ A chaikiezy nata meipaoh sonazy chhao, ngôh suapa ta na tao aw.

³⁹ Meiôh tôh nata a chhaichhi zydua tao nawpa ta ngôh suapa talent miakha na hmâ awpa a châ.

⁴⁰ Tlâh liata a taozie awpa ei cha pahmôpa hawhna tlai khata, na tao awpa a châ.