PUASAINA 24 - Mara Bible RV (BSI)

Biehrai pa-ina

¹ Chatawhcha Abeipa ta Mawsi hnohta, “Nâma, Arawna, Nâdâ, Abihu nata Izarei machâ sysari Abeipa lâ a khy u la, lâhla tawhta a vaw chhy muh vy.

² Mawsi dei ta Abeipa lâ a vaw hnia aw ta, ahropazy cha amâ vaw hnia awpa châ vei, zawpizy chhao a hnohta amâ khy awpa châ vei,” tah ta.

³ Mawsi cha zu ta, Abeipa bie zydua nata ryhpa zydua cha zawpi hnohta za chho ta, chyhsa zydua ta, “Abeipa reipa zydua cha eima tao aw,” tahpa ta â raohpa ta a chhy ei ta.

⁴ Mawsi ta Abeipa bie zydua cha roh khai ta, a mylâ my ta thyu ta, tlâh thaby liata maisâh tao ta, Izarei chi hrawh hleino moh ta lôbô miahrawh hleino bô ta.

⁵ Izarei sawzy hry ta satliazy tuah ta, âmo ta Abeipa lâ raopa hlâna hlâ ei ta, aryhna hlâna châta viahchao tôhpa ta a theih ei ta.

⁶ Mawsi ta thisaih â khophie la ta, biebuh liata patlai ta, ahropa cha maisâh liata thia ta.

⁷ Biehrai Châbu la ta, zawpi theina liata reih ta, zawpizy ta, “Abeipa reipa zydua tao aw pi ta, eima zyh aw,” tah ei ta.

⁸ Mawsi ta thisaih la ta, zawpizy chô liata thia ta, ama hnohta, “Moh teh u, he he biehrai thisaih a châ. Abeipa ta he bie zydua hmâpa ta nama hnohta bie a hraih haw,” tah ta.

⁹ Chatawhcha Mawsi nata Arawna, Nâdâ, Abihu nata Izarei machâ sysarizy cha khy ei ta,

¹⁰ Izarei Khazohpa cha hmô ei ta. A phei ry cha saphai lôsôhpa paryhpa hawhta châ ta, a pathaihzie cha avâ pathaihpa hawhta pathaih ta.

¹¹ Khazohpa hmô ei ta, niepa ta doh ei ta. Châhrasala Khazohpa ta Izarei hyutuhpazy chô liata a ku pathla vei.

Mawsi Sinai tlâh liata

¹² Abeipa ta Mawsi hnohta, “Tlâh lâ a khy la, cha liata na vaw hâ mah y. Chatanachata zawpizy na pachu awpa lôphiapa liata ryhpa nata biepiepa ei ropazy ei cha pie aw,” tah ta.

¹³ Mawsi nata ano baotuhpa Zawsua cha thyu ei ta, Mawsi cha Khazohpa tlâh lâ khy ta.

¹⁴ Mawsi ta machâzy hnohta, “Nâmo lâ eimâ vy heih hlâlei cha, he liana heta miah vaw hâ thlâh ha muh vy. Moh teh u, Arawna nata Hurâ nama hnohta ama y hih. Chavâta biepeipa a hneipa cha âmo hnohta a tlôkhei aw,” tah ta.

¹⁵ Mawsi cha tlâh lâ khy ta, tlâh cha meihdo ta vaw pahly khai ha ta.

¹⁶ Abeipa rônahna ta Sinai Tlâh cha vaw khu ta, meihdo ta tlâh cha noh charu chhôh khu ta, a noh sarina noh ta Khazohpa ta meihdo hry tawhta Mawsi cha vaw aw ta.

¹⁷ Abeipa rônahna a vaw luahpa cha, Izarei sawzy mohmô liata, tlâh laki liata mei a kâpa a lyu.

¹⁸ Mawsi cha meihdo hry liata a kei ngia ta, tlâh lâ kiah ta, tlâh liana cha noh sypalih nata zâ sypalih y ta.