PUASAINA 23 - Mara Bible RV (BSI)

Adona nata ngâchhihna ryhpazy

¹ “Bie pathâhpa doleipa na rei pachhuah awpa châ vei. Pahnokheituhpa haiphiahpa châ awpa ta, moleipa hry liata nâ hlao awpa châ vei.

² Hmo moleipa taona liata zawpi na zi awpa châ leipa ta, biepeipa pachiana liata bie pahnotuhpa ta nâ dua tita, ryureina dopa tleisai awpa ta zawpi na zi awpa châ vei.

³ “Dyhchhiepa ta biepeipa hnei sala, dyhchhiepa a châpa vâta na khokhei via awpa châ vei.

⁴ “Na khakhaipa viahchao tôhpa a leipa tlyma, alâ a leipa tlyma na hmô khiahta cha, ano lâ nâ chhi ha awpa a châ.

⁵ Châ haotuhpa alâ cha a hmophao ta vipa ta, â hluah thlâh hapa na hmô khiahta cha, na siesai awpa châ vei. A hmophao pathlâpa aw chi ta, alâ cha na padua ha awpa a châ.

⁶ “Dyhchhiepa cha a biepeipa pachiana liata â dona na chhu awpa châ vei.

⁷ Moleipa cha thai ei pachâsa lei awpa vâta, haipa bie ta chyhsa na leih awpa châ leipa ta, paraona a hnei leipa nata mosiapa na thie awpa châ vei.

⁸ Panaopapana na la awpa châ vei. Panaopapana ta mo pavâpa mo pachaosa ta, mosiapa cha biedopa tawhta a patleisa tyh.

⁹ “Mapaihpa na tlybai awpa châ vei. Nâmo chhao Izi râh liata mapaihpa châ ei chi ta, mapaihpa châpa palôh rietheizie nama pahno.

Pahânoh ryhpazy

¹⁰ “Kô charu chhôh na lyu liata chi cheih aw chi ta, a kôvei na pakhy aw.

¹¹ A kô sarina kô liata deikua cha, lyu cha pahâsa aw chi ta, pachihpa ta na paysa aw. Chatanachata na chiheihzy hry liata dyhchhiepazy ta nie aw ei ta, ama la bâhpazy cha lyurâhpa sazy ta ama nie aw. Cha hawhna chata na kre sadô nata na ôli sadô chhao na tao aw.

¹² “Noh charu chhôh na rai hria aw chi ta, a noh sarina noh deikua cha, nâ pahâ tyh awpa a châ. Chatanachata na viahchao tôhpa nata alâ zy chhao a pahâ aw ei ta, na o liata a pihpa sei nata na hnohta a ypa chihropa zy ama tha a dâh hra aw.

¹³ Nama hnohta ei reipa zydua he pachâ u la, khazoh hropazy moh rai reih leipa u la, na pakah tawhta a pua rai ta pua khah sy.

Kyhchhi miathôhzy

¹⁴ “Kô kha ta ei thôh kei châta kyhchhi na tao tyh awpa a châ.

¹⁵ Viahchhâ thinô pahlao leipa kyhchhi na tao awpa châ ta, bie ei cha piepa hawhta, noh sari chhôh viahchhâ thinô pahlao leipa na nie awpa a châ. Kyhchhi cha Abi thla daihti raopa liata na tao tyh aw, cha daihti liata Izi râh tawhta na kaw puapa vâta. Ahy hmah ku ruapa ta ei hmiakô liata namâ vaw luah awpa châ vei.

¹⁶ Lyu liata na tupa, na hriapasana thei hmiatua chaipa Sâhhria Kyhchhi na tao tyh awpa a châ. Kô châh vaw di ta, lyu liata na hriapasana theizy na pakhy khai tawhta, Peihtla Kyhchhi na tao awpa a châ.

¹⁷ Chapaw zydua ta kô kha ta ei thôh Zehôvâh Khazohpa hmiakô liata amâ luah tyh awpa a châ.

¹⁸ “Atheihna sa thisaih eina hlâ ti chi ta, viahchhâ thinô pahlaopa chhaota na hlâ awpa châ leipa ta, ei kyhchhi thaw chhao a mylâ taihta a y awpa châ vei.

¹⁹ “Na lyu liata chicheipa a daih tua chaipazy hry liata a pha chaipazy cha, Abeipa na Khazohpa o liata na hlâ awpa a châ. “Mietaw sa cha a panô sâhpiti ta na chho awpa châ vei.

Kâna pahniena bietai

²⁰ “Moh teh, lâpi liata châ vaih awpa nata su ei chhuahdypa châ tlôkhei awpa ta, na hmia lâta vâlyuhchâpa ei pasiesa.

²¹ Na nah pachôhpa ta, a bie nathlie la, ano cha chakhia khah y. Ei moh ano liata y tlôh ta, chavâta nama paraonazy a ngiahthai aw vei.

²² “Châhrasala a bie pakhâta ta nathliepa ta, ei reipa zydua na tao khiahta cha, na chariahpazy châta chariahpa châ aw na ta, na khakhaipazy châta khakhaipa ei châ aw.

²³ “Ei vâlyuhchâpa na hmia lâta sie aw ta, Amawri mo, Hiti mo, Perizi mo, Kâna mo, Hivi mo nata Zebu mozy yna lâ châ chhi aw ta, âmo cha ei pahleipadia aw ei.

²⁴ Ama khazohzy hmiakô liata a bôhpa ta nâ chhy awpa châ leipa ta, âmo na chakao awpa châ hra vei. Ama taopazy hawhta na tao hra awpa châ leipa ta, tlokhuh na pahleipadia khai ha awpa ei châ ta, ama panana tôhzy na phy pachhô khai ha awpa a châ.

²⁵ Abeipa nama Khazohpa nama chakao awpa a châ. Chatanachata nama viahchhâ nata ti zy byhnâ pie aw na ta, nama hry tawhta hriiah ei papai aw.

²⁶ Na râh liata nawh raona y leipa aw ta, chanô chohpa chhao y aw veih ei. Na chhâ palona taihta ei cha pahrosa aw.

²⁷ Na hmia lâta ei chichhihna pasiesa aw na ta, na tlô awpa liata phopi zydua ama nô papo aw na ta, na khakhaipa zydua na hmiakô tawhta ei parâpaisa aw ei.

²⁸ Na hmia lâta kheipangiah tuah aw na ta, cha chata Hivi mo, Kâna mo nata Hiti mozy na hmia lâta â chadai aw ei.

²⁹ Kô kha chhôh ta âmo cha na hmiakô tawhta papua khai aw veih ei na, chataleipatala râh cha roryhrapa ta y aw ta, râhsazy na châta a vaw hluh tu pathlei aw.

³⁰ Nama maluh pôhpa ta, râh liata a pahrâ khi nama y hlâlei cha, a chyh chyhta ta ei cha papuapa aw ei.

³¹ Tilaipi Saihpa tawhta Philistinâ mo tilaipi taihta nata râhchawhpa tawhta Ufrâti chavah taihta na râhri châta ei cha taopa aw. Cha râh liata a pahrâpazy cha, na ku liata cha pie aw na ta, âmo cha na hmiakô tawhta na papua awpa a châ.

³² Ama hnohta bie na hraih awpa châ leipa ta, ama khazohzy hnohta bie na hraih awpa châ hra vei.

³³ Na râh chhôh liata ama pahrâ awpa châ vei. Chataleipatala ei chô liata cha pamoleisa aw ei ta, ama khazohzy na chakao tlai khiahta cha, na châta khoheih a châ aw,” tah ta.