PUASAINA 22 - Mara Bible RV (BSI)

Pacheisana ryhpa bie

¹ “Chyhsa ta viahchao tôhpa tlyma, mietaku tlyma paru sala, a thie khiahta tlyma, a zuah khiahta tlyma, viahchao tôhpa pô kha vyuhpa ta viahchao tôhpa pô pangawh thô aw ta, mietaku pô kha vyuhpa ta mietaku pô palih a thô aw.

² “Parutuhpa cha chyhsa o a ngiapa ta a paru hai nota hmôpa châ sala, tusaopa a châ khiahta cha, a tusaotuhpa chô liata thisaih maoh y aw vei.

³ Noh a chhi tawhta tusaopa a châ khiahta deikua cha, a thisaih maoh a y aw. Parutuhpa cha a hmo parupazy a thô awpa châ ta, khâpa hmah a hnei vei khiahta cha, a parupa thô nawpa ta ano zuah awpa a châ.

⁴ “Parupa viahchao tôhpa tlyma, alâ tlyma, mietaku tlyma, parutuhpa ku liata ahrohpa ta hmôpa a châ khiahta cha, a lie no ta a thô awpa a châ.

⁵ “Chyhsa ta chyhsa hropa lyu liata tlyma, kre sadô liata tlyma, a sahroh lao a pabâsa raruah khiahta tlyma, a sahroh pathliepa ta chyhsa lyu a pabâsa khiahta cha, ano lyu pha chaipa nata ano kre sadô pha chaipazy ta a thô awpa a châ.

⁶ “Chyhsa ta mei pakâ sala, ahloh buhzy lâta kâ laihpa ta, sapiahzy tlyma, sâh a duahpa tlyma, lyu tlyma, a kâ khiahta cha, mei pakâtuhpa ta a mâ zydua a thô thlyu awpa a châ.

⁷ “Chyhsa ta a tâkâ tlyma, a hmo tlyma, a vaih pavaosa sala, cha o tawhta chyhsa ta paru sala, parutuhpa cha hmôpa a châ khiahta cha, a lie no ta a thô awpa a châ.

⁸ Parutuhpa hmôpa a châ vei khiahta cha, parupa sôh avaotuhpa o hneituhpa cha Khazohpa a hnia aw ta, a vaih hmo cha ano ku ta a la nata la lei pasiapa a châ aw.

⁹ “Parupa hmo maih, viahchao tôhpa tlyma, alâ tlyma, mietaku tlyma, chysia tlyma, hmo leipa khâpa rai, chyhsa ta, ‘He he kei eih a châ,’ a tah khiahta cha, ama pano likah biepeipa cha, Khazohpa hnohta tlôkheipa châ aw ta, Khazohpa ta thailei a pachâsapa ta a lie no ta a vaih cha a thô awpa a châ.

¹⁰ “Chyhsa ta alâ tlyma, viahchao tôhpa tlyma, mietaku tlyma, sahroh kheihawhpa rai, a vaih pamokhâhsa sala, athipa ta tlyma, hmahphaopa ta tlyma, hraopa ta tlyma vaw y sala, a hmôpa ama y vei khiahta cha,

¹¹ a mokhâhtuhpa cha a vaih sahroh a hria nata hria lei pasia nawpa ta, Abeipa moh reipa ta ama pano likah liata chhie a sakhâh aw ei ta, hneituhpa ta chhie amâ sakhâhna bie hawhta a pyh aw ta, mokhâhtuhpa ta thô aw vei.

¹² A parupa tlai a châ khiahta deikua cha, hneituhpa hnohta a thô awpa a châ.

¹³ Sa ta a taipa a châ khiahta cha, pasia nawpa ta sa zômeihpa vaw cheih aw ta, sa taipa sahroh vyuhpa cha thô aw vei.

¹⁴ “Chyhsa ta a vaih sahroh a hlâh sala, hmaphaohpa ta tlyma, athipa ta tlyma vaw y sala, cha nota sahroh hneituhpa â hlao vei khiahta cha, a thô thlyu awpa a châ.

¹⁵ Hneituhpa â hlao khiahta deikua cha, thô aw vei. A mâ hneipa ta a hlâpa a châ khiahta cha, â hlâna mâ nata sahroh pahleipa mâ panâhpa a châ aw.

Khih nata tlâh ryhpazy

¹⁶ “Chyhsa ta lapinô châta a pahawh leipa laihsa reipasao sala, â ziakhei khiahta cha, nômâ pie aw ta, a lapinô ta a hnei thlyu awpa a châ.

¹⁷ Chanô paw ta a pahneisa khoh ngâsâ leipa khiahta cha, laihsa kôpazy nômâ zie sôh a pie pyly awpa a châ.

¹⁸ “Dyuthaipa chanô na pahlôh awpa châ vei.

¹⁹ “Sahroh a ziakheipa cha thie thlyu awpa a châ.

²⁰ “Abeipa lâta châ leipa ta, khazoh hropa lâta atheihna a hlâpa cha, pahleipadia awpa a châ.

²¹ “Chihropa chô liata adoleipa ta na tao awpa châ leipa ta, ano cha na tlybai awpa châ hra vei. Nâmo chhao Izi râh liata chihropa nama châ hrapa kha.

²² Nôhmei nata hârazy ama rie nama pathei awpa châ vei.

²³ Ama rie pathei u la, eina awsao khiah ei ta cha, ama awna ao thei aw na ta,

²⁴ ei pathi thata ia aw ta, zaozi ta ei cha thie aw ei. Chatanachata nama lapinôzy nôhmei châ aw ei ta, nama sawzy hârapa ta ama y aw.

²⁵ “Ei phopi chyhsa na kiapâh liata a ypa dyhchhiepa hnohta na sôh na pahmâsa khiahta cha, sôh dyu a pacheisapa chyhsa hawhta a pachâ leipa la, apôhna na haw awpa châ vei.

²⁶ “Na vaih poh sôhkâ ta na lapa khiahta cha, noh tla hlâta na pie heih awpa a châ.

²⁷ A chhâpa cha, cha poh cha a bu awpa a hnei chhôhpa, a pôhpa liata â bu awpa poh châ ta, khâpa a bupa ta ma â mô aw? Kei cha ngiachhiena a hneipa châ tlôh na ta, chavâta eina awsao tita ei thei aw.

²⁸ “Khazohpa na rei pachhie awpa châ leipa ta, na phopi ryureituhpa chô liata bie pha leipa na reih awpa châ vei.

²⁹ “Na kôvei tawhta nata na kresawhti saohpazy tawhta hlâ awpazy na pahawhpasâh awpa châ vei. Na sawchapawzy hry liata a pih tua chaipa cha, kei eina pie aw chi.

³⁰ Cha hawhna chata, na viahchao tôhpazy nata na mietakuzy chhao na tao aw. Noh sari chhôh a panô hnohta y aw ta, a noh chariena noh ta kei lâta na vaw hlâ aw.

³¹ “Ei chyhsa pathaihpa nama châ awpa a châ. Chavâta lyurâhpa liata arie ta a taipa sa nama nie awpa châ vei. Cha hawhpa cha i nama thy awpa a châ.