PUASAINA 21 - Mara Bible RV (BSI)

Hebrai Seizy

¹ “Hezy he ama châta ryhpa na tao awpazy a châ.

² Hebrai chyhsa sei ta na chalei khiahta cha, kô charu cha chakao aw ta, a kô sari kô liata, chatlaina ty y leipa ta a pua awpa a châ.

³ Ano dei ta a vaw ngiapa a châ khiahta cha, ano dei ta pua aw ta, lapinô chhao ta a vaw ngiapa a châ khiahta cha, a lapinô chhao a hnohta a pua hra aw.

⁴ A zibeipa ta lapinô hiapa sala, sawchapawzy nata sawchanôzy a sapa khiahta cha, a lapi nata sawzy cha a zibeipa eih châ aw ei ta, ano dei ta a pua aw.

⁵ Châhrasala sei chata, ‘Ei lapi nata ei sawzy he kyhpachâ ngaita ei na ta, pua aw va na,’ tah sala, bie siapa a reih ha khiahta cha,

⁶ a zibeipa ta Khazohpa lâ â chhi aw. Ochhi liata tlyma, ochhi tôh liata tlyma paduasapa ta, a zibeipa ta thua pazaopa ta a nakao vieh aw ta, chatanachata a zibeipa cha chhâzaw ta a chakao aw.

⁷ “Chyhsa ta a sawchanô sei ta a zuah khiahta cha, seichapawzy puazie hawhta ano cha pua aw vei.

⁸ A zibeipa ta ano cha a lapinô châta hnei sala, châhrasala a zibeipa ta a khoh khao vei khiahta cha, ano cha chatlai awpa ta a paryhsa awpa a châ. A seichanô a dôveipa vâta, chihropa hnohta zua theina biehneina a chô liata hnei vei.

⁹ A sawchapaw lapinô châta â tlyh khiahta cha, seichanô cha a sawchanô hawhta a moh awpa a châ.

¹⁰ Lapinô hropa a hnei heihpa chhao ta, lapinô ta a hneipa seichanô châna chata a nie awpa pati nata a chysia nata nôvah likah akaona zy a pachyh via awpa châ vei.

¹¹ Cha hmo miathôhpazy cha a taopa leipa khiahta cha, sôh ta a chatlai byuh leipa ta a pua thei aw.

Hmah apaphaona kyh ryhpazy

¹² “Chyhsa tu ta a thiepa cha, ano chhao thie thlyu awpa a châ.

¹³ Thie a chhuahpa ta â byhpa vâta châ leipa ta, Khazohpa ta ano ku liata thi awpa ta a raopa a châ ha khiahta deikua cha, a thietuhpa châta â râ nawpa su ei raopa aw.

¹⁴ Châhrasala chyhsa ta achhuahna hneipa ta a vaih chô liata ku pathla sala, piehpiepa ta a vaih cha a thie khiahta cha, cha chyhsa cha abohna tluapa ta ei maisâh lâ â râpa chhao ta, cha tawhta la papua aw chi ta, a thi awpa a châ.

¹⁵ “A nô tlyma, a paw tlyma a tupa cha, thie awpa a châ.

¹⁶ “Chyhsapa a parupa cha, a zuah hapa chhao ta nata ano ku liata a y nota hmôpa a châpa chhao ta, cha chyhsa cha thie thlyu awpa a châ.

¹⁷ “A nô chô liata tlyma, a paw chô liata tlyma chhie a sapa cha, thie thlyu awpa a châ.

¹⁸ “Chyhsa a hryuh ei sala, pakha ta â tulâhpa cha alô ta tlyma, a kutô ta tlyma a chô sala, thi leipa ta, châhrasala a rakhô liata a ziakheina taihta châ sala,

¹⁹ vaw thyu heih theipa ta, chôchahrei a chhypa ta a sie thei heih khiahta cha, a chôtuhpa cha pathaih aw ta, a hmahphaopa vâta a daihti a pahleipa vyuhpa thô aw ta, a tlâh pasiana taihta a mohôh awpa a châ.

²⁰ “Chyhsa ta a seichapaw tlyma, a seichanô tlyma, chôchahrei ta tu sala, ano ku liata a thi khiahta cha, cha chyhsa cha hrie thlyu awpa a châ.

²¹ Châhrasala sei cha noh kha khai tawhta tlyma, noh no khai tawhta tlyma a kaw thyu heih thei khiahta cha, sei cha a sôh a châpa vâta, cha chyhsa cha hrie awpa châ vei.

²² “Chyhsa amâ tu nota, chanô nawh hneipa tu pathlei ha ei sala, a nawh rao sala, pasana hropa deikua a y leipa khiahta cha, chanô vahpa ta a pacheisa awpa zie reih aw ta, ryureituhpazy paryhsapa hawhta a cheih awpa a châ.

²³ Raona hropa a y khiahta deikua cha, hrona vyuhpa ta hrona,

²⁴ mo vyuhpa ta mo, hâh vyuhpa ta hâh, ku vyuhpa ta ku, phei vyuhpa ta phei,

²⁵ mei kâpa vyuhpa ta mei kâpa, hmah vyuhpa ta hmah, tu vyuhpa ta tupa ta na hrie awpa a châ.

²⁶ “Chyhsa ta a seichapaw mo liata tlyma, a seichanô mo liata tlyma tu sala, a mo a parao khiahta cha, a mo a parao hapa vâta, sei cha a papua awpa a châ.

²⁷ A seichapaw hâh tlyma, a seichanô hâh tlyma a palaosa khiahta cha, a hâh a palaosapa vâta, sei cha a papua awpa a châ.

Sahroh hneituhpazy maophaohna

²⁸ “Viahchao tôhpa ta chapaw tlyma, chanô tlyma a daihsao khiahta cha, cha viahchao tôhpa cha alô ta vawhsao thlyu awpa châ ta, a sa nie awpa châ vei. Viahchao tôhpa hneituhpa deikua a pathaih aw.

²⁹ Châhrasala viahchao tôhpa cha, cha hlâ tawhta chyhsa a vaw daih tyhpa châ sala, a hneituhpa chhao zikyu a râ hapa châ ta, châhrasala hraikhôh leipa ta, chapaw tlyma, chanô tlyma a daihsao khiahta cha, cha viahchao tôhpa cha alô ta vawhsao awpa châ ta, a hneituhpa chhao thie awpa a châ.

³⁰ Ama chatlaisa khiahta cha, a luh ty chei awpa tupa zie a pie awpa a châ.

³¹ Chapaw hawti tlyma, chanô hawti tlyma, a daihsao khiahta cha, cha pachiazie hawhna chata a chô liata pachia awpa a châ.

³² Viahchao tôhpa ta seichapaw tlyma, seichanô tlyma a daihsao khiahta cha, viahchao hneituhpa ta seizy zibeipa hnohta tâkâ sekel sythôh pie aw ta, viahchao tôhpa cha alô ta vawhsao awpa a châ.

³³ “Chyhsa ta khaohtlô chhiehruh pahy sala tlyma, chyhsa ta khaohtlô chao ta chhiehruh leipa sala tlyma, viahchao tôhpa tlyma, alâ tlyma, cha khaohtlô liata a tla khiahta cha,

³⁴ khaohtlô hneituhpa ta a thô awpa a châ. Sahroh hneituhpa hnohta tâkâ pie aw ta, sahroh thipa cha ano ta a to aw.

³⁵ “Chyhsa viahchao tôhpa ta chyhsa hropa viahchao tôhpa a daihsao khiahta cha, viahchao tôhpa hrohpa cha zuah aw ei ta, a ty amâ rai aw. Viahchao tôhpa a thipa chhao amâ rai aw.

³⁶ Viahchao tôhpa chata, cha hlâ tawh chhao ta vaw daih tyh ta, châhrasala hneituhpa ta a hraikhôh leipa khiahta cha, viahchao tôhpa vyuhpa ta viahchao tôhpa lilaw pie aw ta, sahroh thipa cha ano ta a to aw.