PUASAINA 20 - Mara Bible RV (BSI)

Biepiepa Miahrawh

¹ Chatawhcha Khazohpa ta he biezy he reih ta.

² “Kei he Abeipa na Khazohpa, Izi râh, seichâna o tawhta châ chhi papuatuhpa ei châ.

³ “Keima leipa ta khazoh hropazy na hnei awpa châ vei.

⁴ “Na châta nothlahpa khazoh na tao awpa châ vei. Chô lâ avâ liatapa a lyupa tlyma, ry lâ alei liatapa a lyupa tlyma, alei ry lâta ti liatapa a lyupa tlyma, kheihawhpa nothlahpa khazoh hmah na châta na tao awpa châ vei.

⁵ Chazy cha nâ chhy awpa châ leipa ta, na chakao awpa châ hra vei. Kei Abeipa na Khazohpa he, Khazoh hiatlia pasapa châ na ta, pawzy paraona vâta sawzy a hrie tyhpa ei châ. Nâ haotuhpazy cha chhâ thôhna nata chhâ palihna taihta a hrie tyhpa châ na ta,

⁶ kyh na pachâ ta, ei biepiepazy a zyhtuhpa sâh hluhpizy chô liata deikua cha, ngiachhiena a palâsa tyhpa ei châ.

⁷ “Abeipa na Khazohpa moh na reih thlâhthli awpa châ vei. Abeipa ta a moh a reih thlâhthlipa cha thailei a pachâsa aw.

⁸ “Pahânoh a thei thlâh ha aw chi ta, na pathaisa awpa a châ.

⁹ Noh charu chhôh rai hria aw chi ta, na rai zydua na hria aw.

¹⁰ A noh sarina noh deikua cha, Abeipa na Khazohpa châta Pahânoh a châ. Cha noh liata cha, nâ chhao, na sawchapaw chhao, na sawchanô chhao, na seichapaw chhao, na seichanô chhao, na sahroh nata na o liata chihropa a ypazy ta khâpa rai hmah nama hria awpa châ vei.

¹¹ Noh charu chhôh ta Abeipa ta avâ nata alei, tilaipi nata a chhôh liata a ypa zydua tao ta, noh sarina noh cha â pahâpa vâta, Abeipa ta Pahânoh cha byhnâ pie ta a pathaisa.

¹² “Na nô nata na paw palyupalih teh. Chatanachata Abeipa na Khazohpa ta râh a cha piepa liata na hro a pareih aw.

¹³ Liany na chei awpa châ vei.

¹⁴ Nâ phei awpa châ vei.

¹⁵ Na paru awpa châ vei.

¹⁶ Haipa ta na vaih na leih awpa châ vei.

¹⁷ “Na vaih o na uahva awpa châ vei. Na vaih lapinô na uahva awpa châ leipa ta, a seichapaw tlyma, a seichanô tlyma, a viahchao tôhpa tlyma, a alâ tlyma, na vaih hmo kheihawhpa rai na uahva awpa châ vei,” tah ta.

Zawpizy ta ama chi

¹⁸ Chyhsa zydua ta tôkalôhpa, dôhla, chiahmie pyu nata tlâh liata meikhuh zy cha ama hmô nahta, chipa ta a chalyu ei ta, lâhlapi liata a duah ei ta.

¹⁹ Mawsi hnohta, “Nâ ta eima hnohta bie vaw reih la, eima nathlie aw. Khazohpa eima hnohta bie pareisa khao khah y. Chataleipatala eima thi pathlei aw na,” tah ei ta.

²⁰ Mawsi ta zawpi hnohta, “Chi khuh vy. Cha pasia awpa ei ta Khazohpa â vy hih. Nama molei lei nawpa ta, Khazohpa china nâmo liata y mawh sy,” tah ta.

²¹ Mawsi ta Khazohpa yna meihdo chha kaluhpa cha a kei hnia ta, zawpizy deikua cha lâhlapi liata a duah ei ta.

Maisâh tao nawpazie

²² Abeipa ta Mawsi hnohta, “Izarei sawzy hnohta hetana heta reih teh: ‘Vârâh tawhta bie ei cha zâ chhopa ei kha, nâmo tlai ta nama hmô haw.

²³ Keima leipa ta khazoh hropazy nama hnei awpa châ vei. Tâkâ khazohzy tlyma, ngôh khazohzy tlyma, nâmo châta nama tao awpa châ vei.

²⁴ Keima châta alei maisâh tao aw chi ta, cha chô liana chata nâma châta raopa atheihnazy nata aryhna atheihnazy châta na mietakuzy nata na viahchaozy na hlâ tyh aw. Ei moh a thei thlâh ha nawpa ta ei raona su maih liata na hnohta a vy aw na ta, byhnâ ei cha awpa tyh aw.

²⁵ Alô maisâh eina taopa khiah chi ta cha, alô khaipa ta na tao awpa châ vei. Alô khaipa ta na tao khiahta cha, na chhaichhi na hmâpa ta maisâh cha a papuapalei aw.

²⁶ Maisâh chô liata na thluahruana â lâ lei nawpa ta, chhâhchabi tlypa ta ei maisâh lâ na kia awpa châ vei.’