PUASAINA 18 - Mara Bible RV (BSI)

Zetharô ta Mawsi a tly

¹ Khazohpa ta a phopi Izarei sawzy nata Mawsi chô liata a hmotaopa zydua nata Abeipa ta Izarei sawzy Izi râh tawhta â kaw chhi papuazie zy cha, Midia theihthaipa, Mawsi puhpa Zetharô ta vaw thei ta.

² Mawsi ta a lapinô Zipôrâ cha o lâ padisa chy ta, Mawsi puhpa Zetharô ta Zipôrâ cha,

³ a sawchapaw panozy chhaota a o liata paysa ta. A sawchapaw pakhapa cha, Mawsi ta, “Chyhsa râh liata khichhaipa ta ei y,”tah ta a moh Kesao a bipa kha châ ta,

⁴ ahropa cha, “Nâ pathlatuhpa Khazohpa cha nâ baotuhpa a châ, Phiraoh zaozi tawhta eina pachha haw,” tah ta, a moh Elieze a bipa kha a châ.

⁵ Mawsi puhpa Zetharô cha, Mawsi lapinô nata a sawchapawzy chhaota râhchawhpa liata Khazohpa tlâh liata Mawsi riehmo lâ vawh ta.

⁶ Mawsi hnohta, “Kei, na puhpa Zetharô, na lapinô nata na sawchapaw panozy chhaota nâ lâ ei vy hai,” tahpa ta bieta ta.

⁷ Mawsi cha a puhpa dy awpa ta pua ta, a bôh ta, a pahnâ ta. Thâtihzy a hiahri raihrie ei ta, poh o chhôh lâ a ngia ei ta.

⁸ Izarei mo vâta Abeipa ta Phiraoh nata Izi mo chô liata a taopa zydua zy, lâpi liata rairuna amâ tyhpa zydua zy, Abeipa ta Izarei sawzy a pachhazie zy, Mawsi ta a puhpa cha chho ta.

⁹ Abeipa ta Izarei sawzy chô liata hmo phapa a taopa zydua vâta nata Izi mo ku tawhta Izarei sawzy a pachha hapa vâ ei ta, Zetharô cha a ly ngaita ta.

¹⁰ Zetharô ta, “Izi mo ku tawhta nata Phiraoh ku tawhta nâma châ pachhatuhpa nata Izarei sawzy Izi mo ku tawhta a pachhatuhpa Abeipa cha reithaipa ta y mawh sy!

¹¹ Tahmâ la Abeipa he khazoh zydua hlâta rônah viapa a châzie ei pahno haw. Izarei phopi chô liata a palai ngaitapazy chô liata a hmotaozie tawhta â lâ haw,” tah ta.

¹² Mawsi puhpa Zetharô cha raopa hlâna nata Khazohpa lâta atheihnazy vaw cheih ta, Mawsi puhpa hnohta Khazohpa hmiakô liata viahchhâ nie awpa ta, Arawna nata Izarei machâ zydua a vy ei ta.

Ryureituhpazy atlyhna

¹³ A mylâ ta Mawsi cha zawpi biepeipazy pachia awpa ta a tyuh ta, zawpizy cha my tawhta zâlâ taihta Mawsi chadôpa ta a duah ei ta.

¹⁴ Mawsi puhpa ta zawpi châta Mawsi hmotaopa zydua a hmô nahta, a hnohta, “Zawpi châta khâpa hmo ma na taopa ei? Khazia nâma dei ta a tyuh chi ta, my tawhta zâlâ taihta chyhsa zydua na kiapâh liata amâ duah thlâh haw?” tah ta.

¹⁵ Mawsi ta a puhpa hnohta, “Zawpizy he Khazohpa a saohiah awpa ta kei lâ a vypa ama châ.

¹⁶ Biepeipa ama hnei tita, kei lâ a vykhei ei ta, kei ta ama likah bie cha pachiapa ei na ta, Khazohpa bieraopa nata a ryhpazy ei pahnosa tyh ei,” tah ta.

¹⁷ A puhpa ta Mawsi hnohta, “Na hmotaozie he pha vei.

¹⁸ Nâ nata na hnohta a ypa zawpizy he nama tha namâ pachhâ khai pathlei aw. He raihria he na châta a hri tu ha ta, nâma dei ta hria khai thei aw va chi.

¹⁹ Ei bie nathlie mah y, ryh ei cha raokhei aw. Na hnohta Khazohpa y mawh sy! Zawpi vyuhpa ta Khazohpa hmiakô liata nâ a duah aw chi ta, biepeipazy cha Khazohpa lâ na tlôkhei tyh aw.

²⁰ Bieraopazy nata ryhpazy âmo pachu aw chi ta, ama lâpi a chhih awpa nata ama tao awpazy na pahmô lymâ aw ei.

²¹ Cha thota, chyhsa hmâ tlâhpa, Khazohpa a chipa, ngâchhihpa nata avyuhna a haopa chyhsazy zawpi hry tawhta a tlyh aw chi ta, âmo cha sâh kha chô liata hyutuhpa ta zy, za kha chô liata hyutuhpa ta zy, sypangawh chô liata hyutuhpa ta zy, pahrawh chô liata hyutuhpazy ta na rao aw ei.

²² Âmo chata zawpizy cha pachia aw ei ta, bie ru viapa maih nâ lâ vaw tlôkhei aw ei ta, bie chynawhpazy cha âmo ta ama pachia lymâ aw. Chatanachata na châta nao via aw ta, na phaohri ama cha chapawh ha aw.

²³ Cha hawhta tao awpa ta Khazohpa ta bie cha pie ta, cha hawhta na tao khiahta cha, tlyuh aw chi ta, zawpi zydua chhao he, thlalôhpa ta ama o lâ amâ di thei aw,” tah ta.

²⁴ Mawsi ta a puhpa biereipa cha a pyh ta, a reipa zydua hawhta tao khai ta.

²⁵ Mawsi ta Izarei saw zydua hry tawhta hmâ tlâhpa chyhsazy a tlyh ta, âmo cha Izarei phopi hyutuhpazy ta tao ta, a sâh chô liata hyutuhpa ta zy, a za chô liata hyutuhpa ta zy, sypangawh chô liata hyutuhpa ta zy nata pahrawh chô liata hyutuhpa zy ta a rao ei.

²⁶ Âmo chata zawpi cha pachia ei ta, bie rupa maih Mawsi lâ tlôkhei ei ta, bie chynawhpa deikua cha, âmo ta ama pachia lymâ.

²⁷ Chatawhcha Mawsi ta a puhpa cha pathlie ta, a puhpa Zetharô cha a râh lâ a lie lilaw ha heih ta.