PUASAINA 17 - Mara Bible RV (BSI)

Lôpanô tawhta ti a pua

¹ Izarei zawpizy cha Sini râhchawhpa tawhta pua heih ei ta, Abeipa biepiepa hawhta a paty paty ta riehmo taopa ta sie lymâ ei ta, Rephidi liata a rie ei ta, cha liata zawpi châta ti do awpa y leipa ta.

² Chavâta zawpi ta Mawsi cha a hryuh ei ta, “Ti do awpa miah pie teh,” tah ei ta. Mawsi ta ama hnohta, “Khazia einâ hryuh ei chi, khazia Abeipa nama pasia,” tah ta.

³ Zawpizy cha ama dâhphi ngaita ta, Mawsi chô liata paphôh ei ta, a hnohta, “Khazia keimo nata eima sawzy nata eima sahrohzy he dâhphipa ta miah thie awpa ta Izi râh tawhta miah nâ kaw chhi papua?” tah ei ta.

⁴ Mawsi cha Abeipa pado ta, a hnohta, “He chyhsazy heta alô ta na vawhsao awpa a mâ thlâh ha bâ ei ta, kheihta ei tao aw ei?” tah ta.

⁵ Abeipa ta Mawsi hnohta, “Zawpizy hmia lâta sie la, Izarei machâ thokha na hnohta a chhi la, Nile chavah na tuna chôchahrei kha na ku liata chabapa ta sie mah y.

⁶ Hôribâ liata lôpanô chô liata na hmiakô liata a vaw duah aw na ta, lôpanô cha tu aw chi ta, cha tawhta zawpi do awpa ti a vaw pua aw,” tah ta. Mawsi ta Izarei machâzy mohmô liata cha hawhna chata tao ta.

⁷ Izarei sawzy paphôhna vâta nata, “Eima hry liata Abeipa a y ma, y vei ma?” tahpa ta Abeipa ama pasiapa vâta, cha su cha a moh Mâsâ nata Meribâ a bi.

Amale mo nata adyuhna

⁸ Chatawhcha Amale mo a vy ei ta, Izarei mo cha Rephidi liata a vaw dyuh ei ta.

⁹ Mawsi ta Zawsua hnohta, “Eima hry tawhta chapaw thokha a tlyh la, pua u la, Amale mo a kei dyuh teh u. Khazohpa chôchahrei chabapa ta, mylâ tlâh laki liata ei vaw duah aw,” tah ta.

¹⁰ Mawsi ta a chhopa hawhta, Zawsua ta Amale mo cha a dyuh ta. Cha nota Mawsi, Arawna nata Hurâ zy cha tlâh laki lâ kiah ei ta.

¹¹ Mawsi ta a ku a pazawh chhôh cha Izarei mo ta pahnie lymâ ei ta, a ku a pathliah nahta, Amale mo ta ama pahnie ha tyh.

¹² Châhrasala Mawsi kuzy cha vaw si ha ta, chavâta alô la ei ta, a kiapâh liata soh ei ta, cha liata a tyuh ta. Arawna nata Hurâ ta a ku cha dei ei ta, pakha ta hiakha la dei ta, pakha ta hia kha lâ a dei. Cha hawhna chata noh tlana taihta a kuzy cha a pazawh ualua ta pazawh thlâh ha ta.

¹³ Chatanachata Zawsua ta Amale nata a sahlaozy cha zaozi ta a pahnie ha ei.

¹⁴ Abeipa ta Mawsi hnohta, “He bie he a theih thlâh ha awpa ta, châbu liata roh la, Zawsua nah theina liata reih mah y. Amale mo he avâ ry liata ama y hra tahpa chyhsa ta ama pahno khao leina taihta ei pahleipadia khai aw ei,” tah ta.

¹⁵ Chatawhcha Mawsi ta maisâh tao ta, a moh Zehôvâh Nisi a bi.

¹⁶ Mawsi ta, “Amale cha Abeipa beidyuchhai chô liata a ku a hypa vâta, chhâ a vaw y lymâ awpa zydua liata Abeipa ta â dyuh lymâ aw,” tah ta.