PUASAINA 16 - Mara Bible RV (BSI)

Vârâh tawhta mânâ nata mamo

¹ Elima su tawhta pua ei ta, Izarei zawpi zydua ta Sini râhchawhpa vaw tlô ei ta, cha cha Elima nata Sinai likawh ta a ypa châ ta, Izi râh ama puasai tawhta thla nona noh hrawh hleipangawhna noh ta cha su cha ama vaw tlô.

² Râhchawhpa liana chata Izarei zawpi zydua ta Mawsi nata Arawna chô liata paphôh ei ta.

³ Izarei sawzy ta ama hnohta, “Izi râh liata sa beih kiah liata a tyuh pi ta, viahchhâ eima rih biena taihta eima nie no khata Abeipa ku ta vaw thi ha sih la a pha via awpa tlai. Zawpi zydua he nodipa ta miah thie awpa ta râhchawhpa lâ miah namâ vaw chhi he zaw,” tah ei ta.

⁴ Abeipa ta Mawsi hnohta, “Pachâ teh, nama châta avâ tawhta viahchhâ pasuasa aw na ta, zawpizy pua aw ei ta, noh kha châta ama tovyuh a daihpa ta noh chareih amâ huah lymâ aw. Cha liana chata ei ryhpa ama zyh ma, zyh vei ma tahpa ei pasia aw ei.

⁵ Noh charu noh liata deikua cha, noh chareih ta amâ huapa lie no ta a huah aw ei ta, nie awpa châta amâ patohpatia tyh aw,” tah ta.

⁶ Mawsi nata Arawna ta Izarei saw zydua hnohta, “Abeipa ta a chô liata nama paphôhnazy kha thei ta, chavâta zâlâ ta Abeipa cha Izi râh tawhta châ chhi papuatuhpa tlai a châ tahpa pahno aw ei chi ta,

⁷ my ta Abeipa rônahna nama hmô aw. Keimo he khâpa ma eima châ tly, eima chô liata nama paphôhpa he?” tah ei ta.

⁸ Mawsi ta, “Abeipa ta a chô liata nama paphôhnazy a theipa vâta, zâlâ ta sa nie awpa cha piepa ta, my ta viahchhâ rih biena taih a cha pie ti ei ta, ano cha Abeipa a châ tlai tahpa nama pahno aw. Keimo he khâpa ma eima châ tly? Keimo chô liata a paphôhpa châ leipa ei chi ta, Abeipa chô liata a paphôhpa tlao nama châ,” tah ta.

⁹ Chatawhcha Mawsi ta Arawna hnohta, “Izarei zawpi zydua hnohta, ‘Abeipa hmiakô lâ a vaw hnia teh u, nama paphôhnazy a thei haw,’ tahpa ta kei chho teh,” tah ta.

¹⁰ Arawna ta Izarei zawpi hnohta bie a rei hai nota, râhchawhpa lâ sai ei ta, Abeipa rônahna meihdo liata a vaw lâ ta.

¹¹ Abeipa ta Mawsi hnohta,

¹² “Izarei sawzy paphôhna ei thei haw. Chavâta ama hnohta, ‘Zâlâ sa nie aw ei chi ta, mylâ viahchhâ rih biena taih nama nie aw. Chatanachata kei he Abeipa nama Khazohpa ei châ tahpa nama pahno aw,’ tahpa ta chho mah y,” tah ta.

¹³ Zâlâ ta ama riehmo biena taihta mamo a vaw zaw ei ta, a mylâ ta ama riehmo chheipâh liata diati thata tla ta.

¹⁴ Diati a hi nahta, râhchawhpa alei chô liata chhâmeih papa a lyupa hmo chyhpata, dâhaw tlaw tiepa vaw y hôlô ta.

¹⁵ Cha cha Izarei sawzy ta ama hmô nahta, khâpa ma a châ tahpa ama pahno leipa vâta, “He he khâpa ma a châ tly?” tahpa ta âmo nata âmo a hiahri ei ta. Mawsi ta ama hnohta, “He he viahchhâ a châ, Abeipa ta nama nie awpa a cha piepa ei a châ hih.

¹⁶ He he Abeipa ta, ‘Chyhsa to ta ama nie khi chyu ta a huah ei sala, chyhsa pakha châta saikhua hmo kha lymâ ta a huahpa ta, nama poh o liata chyhsa a ypa zie lymâ hawhta namâ huah awpa a châ,’ tahpa ta bie a piepa kha a châ,” tah ta.

¹⁷ Izarei sawzy ta cha hawhna chata tao ei ta, thokha a hluh via a huah ei ta, thokha a chyh via amâ huah.

¹⁸ Saikhua ta ama panua nahta deikua cha, a hluh via a huahpa ta laibâhpa hnei leipa ta, a chyh via a huahpa ta a phahla hlei vei. Chyhsa to ama nie khi chyu ta amâ huah khai.

¹⁹ Mawsi ta ama hnohta, “Ahy hmahta mylâ châta a khai khuh vy,” tah ta.

²⁰ Châhrasala Mawsi bie cha nathlie khoh leipa ei ta. Thokha ta a mylâ châta a so ei ta, alôpa vaw y ta, a roh thata chhie ta, Mawsi cha ama chô liata a hiehâh kaw ta.

²¹ Chavâta my chareih chyhsa to ama nie khi chyu lymâ ta a huah tyh ei ta, noh a vaw sa nahta deikua cha, alei liata mânâzy cha a zao khai ha tyh.

²² A noh charuna noh ta viahchhâ cha a lie no ta, chyhsa pakha châta saikhua hmo no lymâ ta a huah ei ta. Zawpi ryureituhpazy ta, cha hmo cha Mawsi chho ei ta.

²³ Mawsi ta, “He he Abeipa biepiepa a châ: ‘Mylâ cha a pahâna noh, noh ziehpa, Abeipa châta Pahânoh pathaihpa a châ aw. Chavâta pakâh awpazy cha pakâh u la, chho awpazy chhoh u la, a laibâhpa zydua mylâ châta namâ so aw,’” tah ta.

²⁴ Mawsi biepiepa hawhta a mylâ taihta soh ei ta, châhrasala a roh chhie leipa ta alôpa chhao thla hra vei.

²⁵ Mawsi ta, “Tanoh cha he he nie teh u, tanoh cha Abeipa châta Pahânoh a châ hih. Tanoh la alei liata a tlapa hmô aw veih ei chi.

²⁶ Noh charu chhôh a huah tyh aw ei chi ta, a noh sarina noh deikua cha Pahânoh châ ta, a hua awpa y khao aw vei,” tah ta.

²⁷ Chyhsa thokha cha noh sarina noh ta a huah awpa ta pua ei ta, châhrasala a hua awpa rai hmô veih ei.

²⁸ Chatawhcha Abeipa ta Mawsi hnohta, “Khachâ ma ei biepiepazy nata ei ryhpazy he a py khoh leipa ta nama y aw?

²⁹ Pachâ teh u, Abeipa ta Pahânoh cha pie ei ta, chavâta noh charuna noh ta, noh no a khi awpa viahchhâ a cha pie ei. Chyhsa to âmo su chyu liata y khai mawh ei sy. Noh sarina noh cha ahy hmahta a yna su tawhta khô pua cheita khah sy,” tah ta.

³⁰ Chatanachata noh sarina noh liata cha Izarei phopi amâ pahâ khai haw.

³¹ Izarei pathlazy ta viahchhâ cha a moh mânâ bi ei ta. Mânâ cha sysadi chi hawhta dieh ta, a pahânazie cha kheihti pahlaopa viahchhâ hawhta a châ.

³² Mawsi ta, “He he Abeipa biepiepa a châ: ‘Nama chhâ vaw y lymâ awpa châta mânâ he saikhua hmo kha la u la namâ so awpa a châ. Chatanachata Izi râh tawhta ei châ chhi papua nona ei ta, râhchawhpa liata nâmo ei cha pasana viahchhâ kha âmo chhao ta ama vaw hmô thei hra aw,’” tah ta.

³³ Chatawhcha Mawsi ta Arawna hnohta, “Beih miakha la la, mânâ khôna saikhua kha a chhôh liata khô la, nama chhâ zydua ta chhy lymâ awpa ta Abeipa hmiakô liata soh mah y,” tah ta.

³⁴ Abeipa ta Mawsi bie a piepa hawhna chata, Arawna ta saikhua khôna beih cha Biehrai Byh hmiakô liata soh ta.

³⁵ Izarei sawzy ta ama pahrâ nawpa râh ama tlô hlâlei cha, kô sypalih chhôh râhchawhpa liata mânâ nie ei ta, Kâna râhri ama tlô hlâlei cha mânâ ama nie lymâ.

³⁶ Saikhua hmo kha cha kachu su hrawh su kha a châ.