PUASAINA 15 - Mara Bible RV (BSI)

Mawsi hla

¹ Chatawhcha Mawsi nata Izarei sawzy cha Abeipa palyupalihpa ta he hla he sa ei ta. “Abeipa lâ hla ei sa aw, Rônahpa ta pahnie ta, Arâ nata a kiahtuhpa tilaipi chhôh lâ a thy hapa vâta.

² Abeipa cha ei thatlôna nata ei hla châ ta, Ano cha ei pachhana a vaw châ haw; Ei Khazohpa châ ta, Ano cha ei reithai aw; Nâ pathlatuhpa Khazohpa châ ta, Ei palyupalih aw.

³ Zehôvâh cha chariah a dyuhpa pasaipha châ ta, A moh Zehôvâh a châ.

⁴ “Phiraoh talailihzy nata a pheisaihzy tilaipi liata thy ta, A pheisaih hyutuh pha chaipazy Tilaipi Saihpa liata ama tlasao khai haw.

⁵ Ti athupa ta âmo cha vao ta, Alô hawhta ti ry lâ amâ ngua haw.

⁶ Hy Abeipa, na ku chachâh lâ liata hmotaotheina rônahpa y ta, Hy Abeipa, na ku chachâh lâta khakhaipa a chaphie khai haw.

⁷ Nâ beina rônahna ta châ dyuhtuhpazy thy pathlah chi ta, Na hiehâhna papua chi ta, Sawphao hawhta a kâ khai ha ei.

⁸ Na hnapasu hu ta tizy toh ta, Pâhchhô hawhta tipaua a duah ta, Tizy tilaipi liah liata â patlo khai haw.

⁹ Chariahpa ta, ‘A chadai aw na ta, ei pha aw, Hraona sôh rai aw na ta, Âmo vâta lôhrâtlôpa ta ei y aw; Ei zaozi phia aw na ta, Ei ku ta âmo cha a pahleipadia aw,’ tah ta.

¹⁰ Na hu ta thlih vaw pathlisa chi ta, Tilaipi ta âmo cha vao ta, Kylô hawhta tilihpi liata amâ ngua haw.

¹¹ “Hy Abeipa, khazohzy hry liata Nâ hawhpa he ahy ma a y? Pathaihna liata beichaipa châ chi ta, Rônahna liata zachhihpa na châ; Hmonoâhpazy a taotuhpa châ chi ta, Nâ hawhpa he ahy ma a y?

¹² Na ku chachâh lâ pazawh chi ta, Alei ta âmo cha a palâ khai haw.

¹³ “Na kyhpachâna tleih leipa ta phopi na chatlaipa cha a chhi chi ta, Na thatlôna ta na yna su pathaihpa lâ nâ chhi ei.

¹⁴ Phopizy ta thei ei ta, amâ chalyu; Philistia mo thlazohpa ta ama y.

¹⁵ Edômâ beizy chihuhpa ta y ei ta, Môabâ pasaiphazy amâ chalyu; Kâna mo zydua chipa ta ama zao khai haw.

¹⁶ Hy Abeipa, na phopi ama khô khai hlâlei cha, Na chaleipa phopi ama khô hlâlei cha, China nata ngiarohna ta Izi mo tla thlu ta, Na bâh thatlôna vâta alô hawhta amâ chalih.

¹⁷ Na phopi cha a chhi aw chi ta, Na ryuto tlâh liata na loh ei; Hy Abeipa, na pahrâna châta na taopa su liata âmo cha loh aw chi ta, Na ku ta a paduapa supathaihpa lia tlai ta na loh aw ei.

¹⁸ Abeipa cha tlyzaw ta ryu a reih aw.”

¹⁹ Phiraoh arâzy, talailihzy nata arâ a kiahpazy tilaipi chhôh lâ amâ ngia khai nahta, Abeipa ta tilaipi tizy cha vaw pakuasa ta, âmo cha a vao ha ei. Izarei sawzy deikua cha, tilaipi chhôh alei hipa liata ama sie.

Miria hla

²⁰ Chatawhcha hrohsonô Miria, Arawna sietanô cha khohtaw chaba ta, chanô zydua ta khohtaw nata lâna chôta ano cha pazi ei ta.

²¹ Miria ta, “Abeipa lâ hla sa teh u, Rônahpa ta pahnie ta; Arâ nata a kiahtuhpazy Tilaipi lâ a thy ha ei,” tahpa ta hla ta a chhihtha.

Marâh ti khapa

²² Mawsi ta Izarei sawzy cha Tilaipi Saihpa tawhta puakhei ta, Surâ râhchawhpa lâ pangaipa ta sie ei ta. Râhchawhpa liata noh thôh sie ei ta, ti rai hmô leipa ei ta.

²³ Marâh su kei tlô ei ta, Marâh su liata tizy cha a khapa vâta doh thei leipa ei ta. Chavâta a moh chhao Marâh bipa ta a châ.

²⁴ Zawpi ta, “Khâpa ma eima doh aw?” tahpa ta, Mawsi chô liata paphôh ei ta.

²⁵ Mawsi ta Abeipa awsao ta, Abeipa ta tho miakha vaw pahmô ta, cha cha ti liata za thy ta, chatanachata ti cha vaw pahâh ha ta. Cha liata Abeipa ta âmo châta bieraopa nata biepiepa taopa ta, cha liata âmo cha pasia ta,

²⁶ ama hnohta, “Abeipa Khazohpa ao pakhâta ta nathliepa ta, a mohmô liata hmo dopa taopa ta, a biepiepazy nathliepa ta, a bieraopazy na zyh khiahta cha, Izi mo chô liata hri ei patlôsapazy kha, na chô liata kheihawhpa hmah patlôsa aw va na, Kei he Zehôvâh Râfâ ei châ,” tah ta.

²⁷ Chatawhcha Elima su tlô ei ta, cha liata tihnawh hnawh hrawh hleino nata thiahrâ kô kô sysari y ta, cha su liata chavah kiahzy liata riehmo paryh ei ta.