PUASAINA 14 - Mara Bible RV (BSI)

Tilaipi Saihpa chakana

¹ Abeipa ta Mawsi hnohta,

² “Izarei sawzy cha a lie ei sala, Mikadô nata tilaipi likawh Pihahirô liata a rie awpa ta chho mah y. Tilaipi kiah liata Bâlâzephô dady liata namâ rie awpa a châ.

³ Chatanachata Phiraoh ta Izarei sawzy cha, ‘Râhchawhpa liata viavi ei ta, râhchawhpa liata amâ tâh haw,’ tahpa ta pachâ aw ta.

⁴ Phiraoh palôh kuh pachhasa aw na ta, âmo cha a chadai aw ta, Phiraoh nata a pheisaih zydua hmâpa ta palyupalihna ei hlao aw. Chatanachata Izi mo ta kei he Abeipa ei châ tahpa ama pahno aw,” tah ta. Izarei sawzy ta cha hawhna chata tao ei ta.

⁵ Chyhsazy amâ râ khai haw tahpa Izi bei ama chho nahta, âmo kyh liata Phiraoh nata a chakaotuhpazy palôh anano ha heih ta, “Izarei sawzy miah ama chakao haipa tlai ta eima pasiesa thlâh hapa kha, kheihtazie ta kha hawhta a taopa ma eima châ tly?” tah ei ta.

⁶ Chatanachata Phiraoh cha a talailihzy pachhuahpanoh ta, a pheisaihzy a chhi ta.

⁷ Talailih pha chaipa za charu a tlyh ta, Izi râh liata talailih hropa zydua nata pheisaih hyutuhpazy a chhi khai ta.

⁸ Abeipa ta Izi bei Phiraoh palôh kuh pachhasa ta, chatanachata chhôhmohpa ta a sie haipa Izarei sawzy cha a chadai ta.

⁹ Izi mo ta Izarei sawzy cha a chadai ei ta, Phiraoh arâ zydua, a talailih zydua, arâ a kiahpa zydua nata pheisaih zydua ta âmo cha a chadai ei ta, Bâlâzephô dady Pihahirô kiapâh, tilaipi kiah liata ama riehmo liata kei pha ei ta.

¹⁰ Phiraoh â vaw hnia nahta, Izarei sawzy ta kei sai ei ta, Izi mo ta âmo lâ pangaipa ta ama vaw sie haipa ama hmô nahta, chi ngaita ei ta. Izarei sawzy ta Abeipa awsao ei ta.

¹¹ Mawsi hnohta, “Izi râh liata thlâ a y leipa vâta ma, râhchawhpa liata thi awpa ta miah nâ vaw chhi? Khazia he hawhta miah tao awpa ta Izi râh tawhta miah na vaw puakhei?

¹² He kyh liata, ‘Miah patypamâ hlei khah y, Izi mo he eima chakao molo aw,’ tahpa ta Izi râh liata eima cha chho hapa kha châ vei ma? Râhchawhpa liata thi awpa hlâta cha, Izi mo kha vaw chakao molo thlâh ha sih la, a pha via awpa tlai,” tah ei ta.

¹³ Mawsi ta Izarei phopi hnohta, “Chi khah u, â ipa ta a duah u la, Abeipa pachhana tanoh a vaw tlô awpa mokhâh teh u. Tanoh ta Izi chyhsa nama hmôpazy he chhâzaw ta hmô heih khao aw veih ei chi.

¹⁴ Abeipa ta a châ dyuhpa aw ei. Nâmo deikua cha a thlih thlâh ha teh u,” tah ta.

¹⁵ Abeipa ta Mawsi hnohta, “Khazia eina awsao chi? Izarei sawzy kha hmia lâ sie lymâ awpa ta chho teh.

¹⁶ Na chôchahrei kha hy la, tilaipi chô liata na ku pazawh la, tilaipi kha pachhaih mah y. Chatanachata Izarei sawzy cha tilaipi chhôh alei hipa liata ama sie aw.

¹⁷ Pachâ teh, Izi mo palôh kuh pachhasa aw na ta, Izarei sawzy a chadai aw ei ta, chatanachata Phiraoh nata a pheisaih zydua nata a talailihzy nata arâ a kiahpazy hmâpa ta palyupalihna ei hlao aw.

¹⁸ Phiraoh nata a talailihzy nata arâ a kiahpazy hmâpa ta palyupalihna ei hlao tita, Izi mo ta kei he Abeipa ei châ tahpa ama pahno aw,” tah ta.

¹⁹ Chatawhcha Izarei sawzy ama hmia lâta a chhihtha laihpa Khazohpa vâlyuhchâpa cha, ama hnôh lâ a pasie ta, meihdo tôh chhao ama hmia lâ tawhta a pasiepa ta ama hnôh lâta a duahpa ta,

²⁰ Izi pheisaihzy nata Izarei pheisaihzy likawh liata vaw tla ta. Meihdo nata zohna vaw y ta, zâ chhôh zydua meihdo ta hia kha lâ zohna paysapa ta, hia kha la khaihna paysa ta, zâ chhôh zydua ta hia kha lâ tawhta hia kha lâ a hnia thei veih ei.

²¹ Mawsi ta tilaipi chô liata a ku pazawh ta, Abeipa ta azozâkhihdei ta nochhi thlih ru ngaitapa vaw pathlisa ta, tizy hnoh lâ a sy ei ta, tilaipi cha alei hipa lâta pachâsa ta. Chatanachata tizy cha a pachhaih ta.

²² Izarei sawzy cha tilaipi chhôh alei hipa liata sie ei ta, tizy cha ama chachâh lâ nata ama chavei lâta âmo châta pâhchhô hawhta vaw y ta.

²³ Izi mo ta Izarei sawzy cha a chadai ei ta, Phiraoh arâ zydua, a talailihzy nata arâ a kiahpazy cha tilaipi chhôh lâ a ngia ei ta.

²⁴ Khih a vaw dei nahta, Abeipa ta Izi pheisaihzy cha mei tôh nata meihdo tôh tawhta za moh ta, Izi pheisaihzy cha tymâpa ta paysa ta.

²⁵ Abeipa ta ama talailih pheizy a thlo hapa vâta sie thei khao leipa ei ta. Izi mo ta, “Izarei mo hmiakô tawhna heta a râ ha ei suh u, Abeipa ta âmo chhâh a châ ta Izi mo â dyuh ha hih,” tah ei ta.

²⁶ Abeipa ta Mawsi hnohta, “Ti vaw loh pakhua sala, Izi mo nata ama talailihzy nata arâ a kiahpazy vao khai ha awpa ta, tilaipi chô liata na ku vaw pazawh teh,” tah ta.

²⁷ Mawsi ta tilaipi chô liata a ku pazawh ta, khih a vaw dei nahta, tilaipi cha a y tyhpa hawhta vaw y ha heih ta. Izi mo cha a râ ei ta, châhrasala Abeipa ta âmo cha tilaipi chhôh liata a thy khai ha ei.

²⁸ Tizy vaw loh pakhua ei ta, talailihzy nata arâ a kiahpazy nata Izarei mo a chadaituhpa Phiraoh pheisaih zydua cha, ti ta vao ei ta, pakha hmah a hrohpa y veih ei.

²⁹ Izarei sawzy deikua cha, tilaipi chhôh alei hipa liata sie ei ta, tizy cha ama chachâh lâ nata ama chavei lâta âmo châta pâhchhô châ ha ta.

³⁰ Cha hawhna chata Abeipa ta Izarei sawzy cha, cha noh liata Izi mo ku tawhta a pachha ha ei. Izarei sawzy ta Izi mo cha thiruapa ta tilaipi kiah liata hmô ei ta.

³¹ Abeipa ta Izi mo chô liata hmotaotheina rônah ngaitapa a hmâpa cha Izarei sawzy ta hmô ei ta, chavâta Izarei phopi ta Abeipa cha chi ngaita ei ta, chatanachata Abeipa nata a chakaotuhpa Mawsi cha a ngiapâ ha ei ta.