PUASAINA 13 - Mara Bible RV (BSI)

Sawchapaw uhtheipa pananona

¹ Abeipa ta Mawsi hnohta,

² “Sawtuapa zydua kei châta na panano awpa a châ. Izarei sawzy hry liata chhi a pahy tuapa sawchapaw uhtheipa nata sahroh chapawpa a pataw tua chaipa maih kei eih a châ,” tah ta.

Viahchhâ thinô pahlao leipa kyhchhi

³ Mawsi ta zawpi hnohta, “He noh, Izi râh seichâna tawhta nama kaw puana noh he khâ a thei thlâh ha muh vy. Abeipa ta ku thatlôpa ta Izi râh tawhta a châ chhi papua ei. Chavâta thinô pahlaopa viahchhâ nama nie awpa châ vei.

⁴ Tanoh, Abi thla liata nama pua hih.

⁵ Abeipa ta nâmo cha pie awpa ta châ pathlatuhpazy hnohta bie â vaw taihpa Kâna mo, Hiti mo, Amawri mo, Hivi mo nata Zebu mozy pahrâna râh, sâhpiti nata kheihti lona râh a cha tlôkhei ti ei ta, he thla liana heta, he chakaona he nama hmâ tyh awpa a châ.

⁶ Noh sari chhôh viahchhâ thinô pahlao leipa nie aw ei chi ta, a noh sarina noh cha Abeipa châta kyhchhi noh a châ aw.

⁷ Noh sari chhôh viahchhâ thinô pahlao leipa nie awpa châ ta, thinô pahlaopa khâpa hmah nâmo liata a y awpa châ leipa ta, nama râh chhôh zydua liata thinô hmô awpa a y awpa châ vei.

⁸ Cha noh liata, nama sawzy hnohta, ‘Izi râh tawhta eima kaw pua nota Abeipa ta eima châta a taopa zydua vâta, he hmo he eima taopa a châ,’ nama tah aw.

⁹ Zawpakhô kyhchhi nama hmâ tyh awpa cha, Abeipa ryhpa nama pakah liata a y thlâh ha thei nawpa ta, ngiana châta nama ku liata a ky ei chi ta, atheithlâhna châta nama mo nata mo likawh liata nama sopa hawhta a châ aw. Abeipa ta ku thatlôpa ta Izi râh tawhta a châ chhi papua ei hih.

¹⁰ Chavâta he bieraopa he, kô chareih a daihti liata nama chay tyh awpa a châ.

Sawchapaw uhtheipa

¹¹ “Abeipa ta nâmo nata châ pathlatuhpazy bie a châ taihpa hawh ei ta, Kâna mo râh cha tlôkheipa ta, cha râh cha a cha pie ti ei ta,

¹² chhi a pahy tuapa maih cha Abeipa châta nama panano lymâ awpa a châ. Nama sahroh a pataw tuapa a chapawpa maih cha Abeipa châta a châ aw.

¹³ Alâ a pataw tuapa a chapawpa deikua cha mietakutaw ta nama chatlai awpa châ ta, nama chatlai khoh vei khiahta cha, a rao nama thlie awpa a châ. Nama sawzy hry liata sawchapaw uhtheipa maih cha nama chatlai awpa a châ.

¹⁴ Noh hro ta nama sawzy ta, ‘He kyhchhi he khâpa ma a yzie?’ tahpa ta ama cha hiahri tita, ama hnohta, ‘Abeipa ta ku thatlôpa ta Izi râh seichâna tawhta miah â chhi papuapa pamosana a châ.

¹⁵ Phiraoh ta palôh lai kawpa ta eima sie awpa a pasai lei no kha, Abeipa ta Izi râh liata sawchapaw uhtheipa zydua, chyhsapa sawchapaw uhtheipa nata sahroh chapawpa a pataw tuapa maih a thie khai ha ei. Chavâta a chapawpa chhi a pahy tuapa zydua cha Abeipa lâta atheihna ta hlâ pi ta, eima sawchapaw uhtheipa zydua deikua cha eima chatlai,’ nama tah aw.

¹⁶ Cha hmo ngiana cha nama ku liata y aw ta, nama mo nata mo likawh liata khiriena ta a y awpa a châ, Abeipa ta ku thatlôpa ta Izi râh tawhta miah â chhi papua ha hih,” tah ta.

Meihdo tôh nata mei tôh

¹⁷ Phiraoh ta Izarei sawzy a pasiesa no kha, Philistinâ râh lâpi lâ a hnia via taraw ta, châhrasala Khazohpa ta, “Adyuhna amâ tyh tita, a ngiapachhipa ta Izi râh lâ ama kua pathlei aw na,” a tahpa vâta âmo cha, cha lâ tawhta a chhi vei.

¹⁸ Khazohpa ta Izarei sawzy cha râhchawhpa siepahliepa ta Tilaipi Saihpa lâta tlao â chhi ei. Chatanachata Izarei sawzy cha, chariah chhaichhi a tobipa ta, Izi râh tawhta ama pua haw.

¹⁹ Zawsi ta Izarei sawzy hnohta, “Khazohpa ta cha za tly thlyu aw ei ta, ei ruzy he, he su tawhta nama phaoh ha awpa a châ,” tahpa ta liahsa bie a pataihsa hapa hawh ei ta, Mawsi ta Zawsi ruzy cha phaoh ta.

²⁰ Sukô su tawhta pua ei ta, râhchawhpa chhâna Ethâmâ su liata a rie ei ta.

²¹ Ama hmia lâta Abeipa sie ta, chhô nah zâ ta ama sie thei nawpa ta, chhô daihti liata meihdo tôh ta âmo cha a chhi ta, zâ daihti liata âmo pakhaih awpa ta mei tôh ta â chhi ei.

²² Nohchhô ta meihdo tôh, zâ ta mei tôh ta Izarei phopi cha siesai beih vei.