PUASAINA 12 - Mara Bible RV (BSI)

Zawpakhô

¹ Abeipa ta Mawsi nata Arawna cha Izi râh liata bie a chho ta, ama hnohta,

² “He thla he nâmo châta thlazy rei pathaona châ aw ta, kô a thaona thla a châ aw.

³ Izarei zawpi zydua hnohta chho u la, he thla noh hrawhna noh liata thie awpa ta, chyhsa to ama chhôhkha lymâ hawhta, chhôhkha miakha ta mietakutaw pô kha amâ so chyu awpa a châ.

⁴ Mietakutaw pô kha thie awpa ta chhôhkha maluh a chyh tu khiahta cha, â hnia chaipa a opapa maluh mopa ta, ama dyh no ta mietakutaw pô kha amâ hly aw.

⁵ Nama mietakutaw cha seina a hnei leipa, a chapawpa kô khapa a châ awpa châ ta, mietaku hry liatapa tlyma, mie hry liatapa tlyma namâ so thei.

⁶ He thlâpâ noh hrawh hleipalihna noh taih soh aw ei chi ta, cha khai tawhta Izarei zawpi pôhpakhypa ta zâlâ a zoh chy ta ama thie aw.

⁷ “Mietakutaw thisaih cha la aw ei ta, ama nie nawpa o liata ochhi tôh miano liata nata ochhi tlâh zy liata ama hnia aw.

⁸ A sa cha, cha zâ ta mei liata rao aw ei ta, viahchhâ thinô pahlao leipa nata âhna khapa a hmiepa ta ama nie aw.

⁹ Aheipa ta nama nie awpa châ leipa ta, ti ta nama pasyu awpa châ hra vei. A luh nata a phei duata nata a chhôhri chhaota nama rao khai awpa a châ.

¹⁰ Mydi taih khâpa hmah nama so awpa châ leipa ta, mydi taih a ypa cha mei liata nama rao khai awpa a châ.

¹¹ Hetana heta nama nie aw: Nama chaisaih pa-ipa ta, pheiky a ky aw ei chi ta, chôchahrei a chhyna chôta, a para ngaitapa ta nama nie aw. Cha cha Abeipa zawpakhô a châ.

¹² Cha zâ ta Izi râh zydua chahryh aw na ta, Izi râh liata sawchapaw uhtheipa zydua, chyhsapa chhao, sa chhao, thie khai aw ei na ta, Izi râh liata khazoh zydua ei pachia aw ei. Kei he Abeipa ei châ.

¹³ Thisaih cha nâmo châta nama yna o ngiana châ aw ta, thisaih ei hmô khiahta cha, ei châ zaw pakhô ha aw ei. Chatanachata Izi râh ei tu tita, nâmo chô lia deikua cha, châ pahleipadia awpa khâpa hri hmah vaw tlô aw vei.

¹⁴ “He noh he nâmo châta atheithlâhna noh châ aw ta, Abeipa châta kyhchhi noh ta nama chay tyh awpa a châ. Nama chhâ zydua liata, he noh he kyhchhi noh ta nama chay tyh awpa châ ta, cha cha chhâzaw châta bieraopa ta a y awpa a châ.

¹⁵ Noh sari chhôh viahchhâ thinô pahlao leipa nama nie awpa a châ. Noh khana noh ta, nama o chhôh tawhta thinô nama pathai khai ha awpa châ ta, ahy rai noh kha noh tawhta noh sari noh taihta viahchhâ thinô pahlaopa a niepa maih cha, cha chyhsa cha Izarei tawhta chhawh pathlahpa a châ aw.

¹⁶ Noh khana noh ta pakhypi pathaihpa hmâh aw ei chi ta, a noh sarina noh ta pakhypi pathaihpa a y heih aw. Chyhsa to nie awpa châta nama hriapa dei leipa cha, cha daihti chhôh cha khâpa rai hmah nama hria awpa châ vei.

¹⁷ Cha noh lia tlai ta nama zawpizy Izi râh tawhta ei kaw chhi papuapa vâ ei ta, viahchhâ thinô pahlao leipa kyhchhi nama chay tyh awpa a châ. Cha noh cha nama chhâ zydua liata nama chay tyh awpa châ ta, cha cha nama châta chhâzaw bieraopa ta a y awpa a châ.

¹⁸ Thla khana, noh hrawh hleipalihna noh zâlâ tawhta noh kih nata noh khana noh zâlâ taihta, viahchhâ thinô pahlao leipa cha nama nie awpa a châ.

¹⁹ Noh sari chhôh nama o chhôh liata thinô rai a y awpa châ vei. Ahy rai thinô pahlaopa a niepa chyhsa cha, chihropa chhao, a râh chyhsa chhao, Izarei zawpi tawhta chhawh pathlahpa a châ aw.

²⁰ Cha daihti chhôh liata thinô pahlaopa khâpa hmah nama nie awpa châ leipa ta, nama pahrâna su zydua liata viahchhâ thinô pahlao leipa nama nie awpa a châ,” tah ta.

²¹ Chatawhcha Mawsi ta Izarei machâ zydua aw ta, ama hnohta, “Vawh u la, nama chhôhkha maluh chyu hawhta mietakutawzy a kei tlyh u la, zawpakhô mietakutaw cha thie teh u.

²² Hisaw ty la aw ei chi ta, rahô liata thisaih liata ny aw ei chi ta, rahô liata thisaih cha ochhi tlâh liata nata ochhi tôh miano liata nama hnia aw. Khihdei hlâlei cha, ahy hmah ama ochhi tawhta ama pua awpa châ vei.

²³ Abeipa ta Izi mo thie awpa ta vaw chahryh aw ta, ochhi tlâh nata ochhi tôh miano liata thisaih hniapa a hmô tita, Abeipa ta ochhi cha a zaw pakhô aw ta, pahleipadiatuhpa cha nâmo thie awpa ta nama o liata pangiasa aw vei.

²⁴ “Nâmo nata nama pathlazy châta chhâzaw bieraopa y thlâh ha awpa ta, he kyhchhi he nama tao tyh awpa a châ.

²⁵ Abeipa ta bie â taihpa hawhta râh a cha pie awpa ei nama tlô tita, he chakaona he nama pazao lymâ awpa a châ.

²⁶ Nama sawzy ta, ‘He chakaona he khâpa ma a yzie?’ tahpa ta ama cha hiahri tita,

²⁷ nâmo ta, ‘He he Abeipa Zawpakhô atheihna a châ. Abeipa ta Izi mo a thie nota, Izi râh liata Izarei sawzy o cha a zawpakhô ta, eima ozy a pahlôhpa atheithlâhna châta ei tao tyhpa a châ,’ nama tah aw,” tah ta. Chatawhcha zawpizy cha ama luh a bôhpa ta Abeipa a chhy ei ta.

²⁸ Izarei sawzy cha sie ei ta, Abeipa ta Mawsi nata Arawna bie a piepa hawhta kei tao ei ta.

Potla chhâna: Sawchapaw uhtheipa thina

²⁹ Chatanachata zâcho a vaw châ nahta, Abeipa ta Izi râh liata sawtuapa zydua, Phiraoh sawchapaw uhtheipa beidyuchhai liata a tyuhpa tawhta a tâhpa sawchapaw uhtheipa patâhna o liata a ypa taihta thie ta, sahroh a pataw tuapa zydua chhao a thi khai haw.

³⁰ Phiraoh nata a chakaotuhpa zydua nata Izi mo zydua cha azo ta thyu ei ta. Athipa pakha hmah y leina o rai a y leipa vâta, Izi râh liata thata chana y ta.

³¹ Phiraoh ta Mawsi nata Arawna cha azo ta aw ta, ama hnohta, “Thyu u la, nâmo pano nata Izarei phopi cha, ei phopi hry tawhna heta pua teh u. Sie u la, nama reipa hawhna khata, Abeipa cha kei chakao teh u.

³² Nama reipa hawhna khata, nama mietaku zawzy nata nama viahchao hrizy cha a chhi u la, sie teh u. Kei chhao he byhnâ na awpa teh u!” tah ta.

³³ Izi mo ta, “Eima thi khai dâhdei aw he zaw,” tah ei ta, Izarei sawzy cha Izi râh tawhta a chatliepa ta pua awpa ta a haw ei ta.

³⁴ Izarei sawzy ta ama viahchhâ nyhpazy cha, thinô ama pahlao hlâta la ei ta, ama viahchhâ nyhna beihkohzy ama poh ta pahlypa ta, ama ngiatlâh liata baih ei ta.

³⁵ Mawsi bie hawhta taopa ta, Izarei sawzy ta Izi mo cha tâkâ atobina nata ngôh atobinazy nata chysiazy hiah ei ta.

³⁶ Abeipa ta Izarei sawzy cha Izi mo ngiachhiena pahlaosa ta, Izi mo ta ama hiapa maih pie lymâ ei ta, cha hawhna chata Izi mo cha hrao ei ta.

Izarei sawzy Izi râh ama puasai

³⁷ Izarei sawzy cha Râmese khih tawhta Sukô lâ pangaipa ta sie ei ta, chanô nata hawtizy rei leipa ta, chapaw pitlohpa sai ta 600,000 phei ta ama sie.

³⁸ Chihropa hluhpi nata sahroh hluhpi, mietaku zawzy nata viahchao hrizy chhao ama hnohta ama sie hra.

³⁹ Izi râh tawhta ama puakheipa viahdie nyhpa hmâpa ta, viahchhâ thinô pahlao leipazy cha tao ei ta. Izi râh tawhta tophipa châ ei ta, ama hâ hmâ lei awpa vâta, thinô pahlao leipa viahchhâ dei leipa ta cha, lâpi liata ama nie awpa a tao hmâ veih ei.

⁴⁰ Izarei sawzy Izi râh liata ama pahrâ chhôh cha, kô 430 a châ.

⁴¹ Kô 430 chhâna liata, cha noh lia tlai ta, Abeipa pheisaih zydua cha Izi râh tawhta ama pua khai haw.

⁴² Cha zâ cha Izi râh tawhta âmo papua awpa ta Abeipa ta a mokhâh zâ a châpa vâta, Izarei sawzy chhao ta, cha zâ cha Abeipa palyupalihpa ta chay zâ châta chhâ zydua ta ama hmâh tyh awpa a châ.

Zawpakhô châta biepie hropazy

⁴³ Abeipa ta Mawsi nata Arawna hnohta, “He he zawpakhô bieraopa a châ: Chihropazy ta Zawpakhô Kyhchhi pati ama nie hra awpa châ vei.

⁴⁴ Tâkâ ta chaleipa sei deikua cha, a chopaw na tai khai tawhta a nie thei aw.

⁴⁵ Chihropa nata hriahlaopazy ta ama nie awpa châ vei.

⁴⁶ O kha liata nie awpa châ ta, a sa kheihawhpa hmahta o tawhta khôtho lâ na puakhei awpa châ leipa ta, a rupa kheihawhpa hmahta na thlie awpa châ vei.

⁴⁷ Cha biepiepazy cha, Izarei zawpi zydua ta ama zyh awpa a châ.

⁴⁸ Chihropa nama hry liata a pahrâpa ta Abeipa Zawpakhô a chay khoh hra khiahta cha, a hnohta a ypa chapaw zydua chopaw tai khai tua awpa châ ta, cha khai tawhta a vaw hnia aw ta, a chay hra aw. Chatanachata ano cha râh liata a pihpa hawhta pachâpa a châ aw. Chopaw tai leipa chyhsa deikua cha a nie awpa châ vei.

⁴⁹ A râh chyhsa nata chihropa nama hry liata a pahrâpazy cha, ryhpa miakha ry liata ama y khai awpa a châ,” tah ta.

⁵⁰ Abeipa ta Mawsi nata Arawna hnohta bie a piepa hawh tlai ta, Izarei saw zydua ta tao ei ta.

⁵¹ Chatanachata cha noh lia tlai chata, Abeipa ta Izarei sawzy cha, a py py ta Izi râh tawhta â chhi papua ha ei.