PUASAINA 11 - Mara Bible RV (BSI)

Sawchapaw uhtheipa thina zikyurâna

¹ Abeipa ta Mawsi hnohta, “Phiraoh chô liata nata Izi râh chô liata potlana miakha patlôsa via aw na ta, cha khai tawhta la a cha pasiesa ha aw ei. A cha pasiesa daidao ei ta la, tlokhuh ta a cha to papua ha aw ei.

² Tahmâ zawpi theina liata bie kei reih teh. A chanô chapaw ta ama opazy liata tâkâ atobina nata ngôh atobinazy hiah khai mawh ei sy,” tah ta.

³ Abeipa ta Izarei phopi cha Izi mo hmiakô liata ngiachhiena pahlaosa ta. Cha dei châ vei, Mawsi cha Izi râh liata Phiraoh chakaotuhpazy pachâzie nata zawpi pachâzie liata chyhsa rônah ngaitapa châ ta.

⁴ Mawsi ta, “Abeipa ta hetana heta a tah: ‘Zâ cho rachhôh liata Izi râh zydua vaw chahryh aw na ta,

⁵ Izi râh liata sawchapaw uhtheipa zydua ama thi khai aw. Beidyuchhai liata a tyuhpa Phiraoh sawchapaw uhtheipa tawhta sâh chariehna thaby liata a ypa seichanô sawchapaw uhtheipa taihta ama thi khai aw. Sahroh chapawpa a pataw tuapa zydua chhao ama thi khai aw.

⁶ Izi râh chhôh zydua liata chana ru ngaitapa y aw ta, cha hawhta chana rupa rai y beih leipa ta, y beih khao aw vei.

⁷ Izarei sawzy deikua cha, chyhsapa chô liata chhao, sa chô liata chhao, i hmahta nga aw veih ei. Chatanachata Abeipa ta Izi nata Izarei likah a panano tlai tahpa nama pahno aw.’

⁸ Châ chakaotuhpa zydua he ei hnohta a zu aw ei ta, ei hmiakô liata a bôhpa ta, ‘Nâ nata châ zituhpa chyhsa zydua he pua teh u,’ tah aw ei ta, cha khai tawhta ei pua aw,” tah ta. Chatanachata Phiraoh tawhtapa cha hiehâh ngaitapa ta pua ha ta.

⁹ Abeipa ta Mawsi hnohta, “Ei hmotao noâhpazy Izi râh liana heta papôhsapa ta a y thei nawpa ta, Phiraoh ta nama bie a pyh aw vei,” tah ta.

¹⁰ Cha hmonoâhpa zydua cha Mawsi nata Arawna ta Phiraoh hmiakô liata tao ei ta. Châhrasala Abeipa ta Phiraoh cha a palôh kuh pachhasa ta, Izarei sawzy cha a râh tawhta papuasa khoh vei.