PUASAINA 10 - Mara Bible RV (BSI)

Potla miachariena: Khawsu ta hriena

¹ Chatawhcha Abeipa ta Mawsi hnohta, “Phiraoh lâ a kei ngia teh. Kei tawhta ngianazy ama hry liata ei chaluah thei nawpa ta, ano palôh nata a chakaotuhpazy palôh kuh ei pachhasa haw.

² Chatanachata na sawchapawpa nata na samohpa nah theina liata Izi râh chô liata ei hmotaoziezy nata ama hry liata hmonoâhpa ei taopazy he chho aw chi ta, kei he Abeipa ei châ tahpa nama pahno thei aw,” tah ta.

³ Mawsi nata Arawna cha Phiraoh lâ a kei ngia ei ta, a hnohta, “Zehôvâh, Hebraizy Khazohpa ta hetana heta a tah: ‘Khachâ ma ei hmiakô liata a panawh khoh leipa ta na y aw? Eina chakao thei nawpa ei ta, ei phopi pasiesa bâ teh.

⁴ Ei phopi na pasiesa vei khiah ei ta cha, pachâ teh, na râh chô liata khawsuzy mylâ vaw patlôsa aw na ta,

⁵ alei chô bie khai aw ei ta, ahy hmahta alei rai hmô thei khao aw vei ei. Pareih ta a daih laibâhpa zydua nie khai aw ei ta, lyu liata a pyuhpa nama thokô zydua ama nie khai aw.

⁶ Nâma ozy nata châ chakaotuhpa zydua o nata Izi mo o zydua ama bie khai aw. Châ pathlatuhpazy nata âmo a pathlatuhpazy chhao ta khizaw liata ama vaw y pathao noh tawhta tanoh taihta cha hawhpa cha hmô beih veih ei,’” tahpa ta chho ei ta. Chatawhcha Mawsi cha a palie ta, Phiraoh tawhta pua ha ta.

⁷ Phiraoh chakaotuhpazy ta a hnohta, “Kha chyhsa kha khachâ ma eima châta khoheih a châ aw tly? Abeipa ama Khazohpa cha ama chakao thei nawpa ta, chyhsazy cha pasiesa thlâh ha bâ teh, Izi râh paraopa a châ hapa he pahno to va chi mâ?” tah ei ta.

⁸ Mawsi nata Arawna cha Phiraoh lâ a chhi heih ei ta, Phiraoh ta ama hnohta, “Sie u la, Abeipa nama Khazohpa cha kei chakao muh vy. Ahyzy tlai ma a sie aw ei?” tah ta.

⁹ Mawsi ta, “Abeipa châta kyhchhina eima tao awpa châ tlôh ta, chavâta eima zydua ta hawti machâ ta eima sie aw. Eima sawchapawzy, eima sawchanôzy, eima mietaku zawzy nata eima viahchao hrizy chhaota eima sie aw,” tah ta.

¹⁰ Phiraoh ta ama hnohta, “Nâmo nata nama hawtizy ei cha pasiesa tlai khiah ei ta cha, Abeipa cha nama hnohta y mawh sy! A pachâ teh u, hmo moleipa tao namâ chhuah hih.

¹¹ Châ bao va! Nâmo, chapawzy sie u la, Abeipa cha kei chakao teh u. Cha cha nama khopa tlai a châ khawh,” tah ta. Chatanachata Mawsi nata Arawna cha Phiraoh mohmô tawhta papua ha ei ta.

¹² Abeipa ta Mawsi hnohta, “Izi râh liata khawsuzy vaw tlô ei sala, pareih ta a daih bâhpa, râh liata chicheipa zydua ama nie khai ha nawpa ta, Izi râh chô liata na ku pazawh teh,” tah ta.

¹³ Mawsi ta Izi râh chô liata a chôchahrei pazawh ta, cha noh cha noh y ta nata zâkhihdei ta, Abeipa ta Izi râh chô liata nochhi thlih vaw pathlisa ta. Mydi a vaw châ nahta, nochhi thlih ta khawsuzy vaw phaoh ta.

¹⁴ Izi râh zydua cha khawsu ta bie ta, râh chhôh su to liata a choh ei ta, ama hluhzie cha, cha hawhta khawsu hluhpa cha kha hlâta y beih leipa ta, y beih khao aw vei.

¹⁵ Râh zydua bie khai ei ta, râh zydua a vyh khai haw. Pareih ta a daih laibâhpa, râh liata chicheipa to nata theilâpa zydua nie khai ei ta, Izi râh zydua lyu liata hmo hrohpa rai, tho chhao, chicheipa chhao, y khao vei.

¹⁶ Chatawhcha Phiraoh ta Mawsi nata Arawna cha a chatliepa ta aw ta, ama hnohta, “Abeipa nama Khazohpa chô liata nata nâmo chô liata hmo ei parao haw.

¹⁷ Chavâta tahmâ ei châ haw ei, he ei khata ngâlâh he ei moleina rie nâ ngiahthai u la, he thina he kei tawhta na lapa awpa ta Abeipa nama Khazohpa cha na hiapa teh u,” tah ta.

¹⁸ Mawsi cha Phiraoh tawhta pua ta, Abeipa lâ hiah ta.

¹⁹ Abeipa ta thlih cha notla thlih ru ngaitapa lâta paliesa ta, cha chata khawsuzy cha phaoh ta, Tilaipi Saihpa lâ phaoh pathlah ta, Izi râh chhôh zydua liata khawsu sâkha hmah y khao vei.

²⁰ Châhrasala Abeipa ta Phiraoh cha a palôh kuh pachhasa ta, chavâta Izarei sawzy cha pasiesa khoh khao vei.

Potla miachakina: Zohna ta hriena

²¹ Abeipa ta Mawsi hnoh ta, “Izi râh he zohna ta khu sala, zoh kaluhpa ry liata ama pathâ hôlôna hâh ta, avâ lâ na ku pazawh teh,” tah ta.

²² Mawsi ta a ku avâ lâ pazawh ta, chatanachata Izi râh chhôh zydua noh thôh chhôh zoh kaluh ha ta.

²³ Â hmô thei khao leipa ei ta, noh thôh chhôh ama yna su tawhta a pasie thei tlâ khao veih ei. Izarei sawzy deikua cha, ama yna chyu liata khaihna ama hnei khai.

²⁴ Phiraoh ta Mawsi cha aw ta, a hnohta, “Sie u la, Abeipa cha kei chakao muh vy. Nama hawtizy chhao nama hnohta sie hra ei sala, nama mietaku zawzy nata nama viahchao hrizy deikua cha a ngua mawh ei sy,” tah ta.

²⁵ Mawsi ta, “Abeipa eima Khazohpa lâ eimâ theih nawpa ta, atheihna awpazy nata raopa hlâna awpazy eima ku liata miah na pie awpa a châ.

²⁶ Eima sahrohzy eima hnohta ama sie hra awpa a châ. Sahrohzy hry liatapa he Abeipa eima Khazohpa chakao nawpa ta eima hmâ awpa châ tlôh ta, a su eima tlô hlâta cha, khâpa ta ma Abeipa eima chakao aw tahpa ei pahno leipa vâta, sahroh pô kha hmah eima siesai awpa châ vei,” tah ta.

²⁷ Châhrasala Abeipa ta Phiraoh cha a palôh kuh pachhasa ta, âmo cha pasiesa khoh khao vei.

²⁸ Phiraoh ta Mawsi hnohta, “Kei tawhta pua teh. A chado la, ei hmia rai vaw hmô khao khah y. Ei hmia na hmô noh cha, na thi noh a châ aw,” tah ta.

²⁹ Mawsi ta, “Na reih pasu kaw, na hmia cha hmô beih khao aw va na,” tah ta.