PHILIPI 4 - Mara Bible RV (BSI)

Pasyuna nata thlahchhâkheina

¹ Chavâta ei kho ngaitapa nata ei vâ ngaitapa ei unawhzy nata ei lyna nata ei lakhozy saih u, Abeipa liata â ipa ta a duah teh u.

² Abeipa liata palôh miakha phaoh awpa ta Eudia nata Sytyke zy ei haw ei.

³ A châ na, raopaky ei kylâhpa chhao chi kha ei châ haw hra. Kha chanôzy kha vaw bao mah y. Âmo kha Klemena nata ei hrialâhpa hropa zydua chhaota thâtihpha vâta ei hriapasana liata nâ hrialâhpazy châ ei ta, hrona châbu liata ama moh a ypazy ama châ.

⁴ Abeipa liata khâ a ly teh u; ei tah heih aw, a ly teh u.

⁵ Nama nôphana cha chyhsa zydua pahnopa châ mawh sy. Abeipa cha â hnia haw.

⁶ Khâpa liata hmah nôpopa ta y leipa u la, ato liata thlahchhâpa nata hiapa ta alyna bie reih u la, nama khopazy cha Khazohpa hnohta pahnosa teh u.

⁷ Chatanachata Khazohpa thlalôhna, novâhna zydua hlâta sôh viapa ta nama palôh nata nama pachânazy cha Krista Zisu liata a cha vaipa lymâ aw ei.

⁸ Achhâna ta cha, unawh saih u, adopa maih zy, zachhihpa maih zy, asiapa maih zy, pathaihpa maih zy, khochhihpa maih nata pasâhsa a chhihpa maih zy cha, phana hneipa ta, reithai tlâh a châ khiahta cha, chazy cha pachâ teh u.

⁹ Keima liata hmo namâ chupa, nama daopa, nama theipa nata nama hmôpa zy kha tao tyh muh vy. Chatanachata thlalôhna Khazohpa ta a cha ypâ aw ei.

Philipi mo hmopiepa vâta alyna bie reina

¹⁰ Eina pachâna ei chi tahmâ nama pathieh heihpa vâta ei ly ngaita. Na pachâ kaw tyh tlai ei chi ta, châhrasala rypaohna nama hmô leipa vâta a châ.

¹¹ Ei phahlana kyh a reihpa châ va na. Kei la kheihawhpa duahmo lia rai y aw sah la, palôhtlâh ei pao lymâ.

¹² Phahlapa ta yzie thai na ta, hneirôhpa ta yzie chhao ei thai. Kheihawhpa duahmo rai châ sala, lôhrâtlôpa nata nodipa ta y thaina bieru pahno na ta, hneirôhpa nata phahlapa ta y thaina bieru chhao ei pahno.

¹³ Tha nâ patlôtuhpa Krista liata ato ei tao thei.

¹⁴ Chatahrasala ei nôponazy liata nama nô eina pokhei tyhpa ei chi he, nama tao pha na.

¹⁵ Nâmo, Philipi mo saih u, thâtihpha ei chho tua nota Mâsidônia râh tawhta ei pua nona kha, nâmo dei leipa ta cha, Awnanopa miakha hmahta hmopiena nata hmodaona kyh liata na hrialâh veih ei tahpa nâmo tlai ta nama pahno.

¹⁶ Thysalawnika khih liata ei y nona chhao kha, ei phahlana pazao nawpa ta, ei kha dei châ leipa ta, ei no dua eina vaw paphao ei chi.

¹⁷ Hmopiepa a tluapa châ leipa na ta, nama lymâ a papôh awpa theilâpa a tluapa tlao ei châ.

¹⁸ Châhrasala ato hnei na ta, ei hnei hluh ngaita. Epâpharôditâ ku liata hmosaipiepazy eina vaw paphaopa ei chi kha vaw hmô na ta, ei dôkhâ haw. Nama hmosaipiepazy kha atheihna a pyh tlâhpa nata Khazohpa a palysapa, ropahâhpa hmohlâpa a châ.

¹⁹ Ei Khazohpa ta Krista Zisu liata a rônahna hneirôhzie lymâ hawhta namâ phahlana to liata a cha pazao aw ei.

²⁰ Eima Khazohpa nata Paw hnohta chhâzaw nata tlyzaw ta rônahna y mawh sy. Amen.

Anaohna

²¹ Krista Zisu liata mopathaihpa zydua kha nâ naohpa muh vy. Ei hnohta unawh a ypazy ta ama châ naoh.

²² Mopathaihpa zydua ta châ naoh ei ta, Kaisarâ chhôhkha liata a ypazy ta amâ châ naoh pachai.

²³ Abeipa Zisu Krista ngiachhiena cha nama thlahpa hnohta y mawh sy.