PHILIPI 3 - Mara Bible RV (BSI)

Krista ngiapâna vâta siana

¹ Achhâna ta cha, unawh saih u, Abeipa liata a ly teh u. Bie hmopa nama hnohta ro chaneipa he, namâ boh nawpa a châpa vâta, kei châta noaichhihpa châ vei.

² Izy tawhta a vaih teh u. Hmopha leipa a taotuhpazy tawhta a vaih u la, ama sapa a taipazy tawhta a vaih teh u.

³ Keimo, Thlahpa ta Khazohpa a chhypa, Krista Zisu a palaikheipa nata sapa liata ngâna rai a pahnie leipazy pi he, chopawtaipazy cha eima châ.

⁴ Ei khoh khiah la, kei chhao sapa liata ngâna a pahnieh theipa ei châ. Chyhsa ta sapa liata ngâna pahnieh thei nawpa chhâpa a hneipa hawhta â pachâ khiahta cha, kei he ei hnei pachai.

⁵ Noh chariena noh ta chopawtaipa, Izarei phopi pathla, Benzami chi, Hebraizy hry liata Hebrai pachaipa ei châ. Ryhpa kyh liata Phârisaih châ na ta,

⁶ phahnai ngiahna kyh liata Awnanopa a taolatuhpa ei châ. Ryhpa biezy zyhpa vâta siana kyh liata chhao seina hnei leipa ei châ.

⁷ Châhrasala kei châta athôhna a châ awpa maih Krista vâta kyna ta ei rao khai.

⁸ Cha dei châ vei, ei Beipa Zisu Krista pahnopa cha hmo hropa zydua hlâta sôh via ta, chavâta hmo to kyna ta ei rao khai. Krista cha ei thôhkhei thei nawpa ta, ano vâta hmo to ky na ta, hmo hropa zydua cha hnaihny hawh dei ta ei rao.

⁹ Ryhpa bie zyhpa vâta siana keima liata hnei leipa na ta, Krista ngiapâna vâta siana a hneipa ei châ. Cha siana cha Khazohpa tawhta a puapa châ ta, ngiapâna vâta hnei theipa deita a châ. Chavâta Krista liata ei y thei nawpa ta, hmo to kyna ta ei rao khai haw.

¹⁰ Chatanachata Krista nata a thyuheihna hmotaotheina cha pahno aw na ta, a rietheitaona liata a hlao hrapa ta, a thina liata ano hawhta thi hrapa ta,

¹¹ athihpa hry tawhta thyuheihna cha, ano hawhta ei to tlai hra aw.

Anuapa lâ pangaina

¹² Chazy cha a hmô hapa hawhta a reih leipa na ta, paki hapa hawhta a rao va na. Krista Zisu ta eina patuna chhâpa patu hra awpa ta ei tei lymâ.

¹³ Unawh saih u, chazy cha a patu hapa hawhta a pachâ va na. Châhrasala hmo miakha taopa ei hnei: Hnôhlâ hmozy mypa ta, hmialâ hmozy pazapa ta,

¹⁴ Khazohpa ta Krista Zisu liata chô lâ eina awna chhâpa lymâ hmô awpa ta, anuapa lâ pangaipa ta ei sie lylia.

¹⁵ Keimo, pitlohpazy ta cha, cha hawhpa palôh cha phaoh ei suh u. Kheihawhpa kyh liata tlyma, palôh nanopa a phaohpa nama châ khiahta cha, cha chhao cha Khazohpa ta a cha pahnosa aw ei.

¹⁶ Khâpa rai châ sala, eima tlôna rakha liata eima duahmo nata â hmiepa ta hroh sih la, eima tlô pachiena tawhta hmialâ tôh lymâ suh u.

¹⁷ Unawh saih u, ei hâ nâ latuhpazy châ teh u. A mopâ awpa keimo miah hnei ei chi ta, keimo hawhta a ypazy cha a mopâ teh u.

¹⁸ Chyhsa hluhpi cha Krista kraws khakhaipazy ama châ tahpa ei cha chho tyhpa ei kha, tahmâ chhao mothlih chhaota ei cha chho heih ei.

¹⁹ Cha sahlao chhâna cha leidiana châ ta, ama khazoh cha ama py châ ta, ama rônahna cha ama maophyuhna a châ. Khizaw hmozy liata palôh a sohpa ama châ.

²⁰ Keimo khihsana deikua cha vârâh liata y ta, vârâh tawhta Pachhatuh Abeipa Zisu Krista a zu awpa cha ngiatiah leipa ta eima hâ.

²¹ Ato ano rei sai ta a paysa theipa Krista ta eima pôhpa nawh ngaitapazy he ano pôhpa rônahpa hawhta y awpa ta, a hmotaotheina hmâpa ta a taopathi aw.