PHILIPI 2 - Mara Bible RV (BSI)

Krista palôh

¹ Krista liata thapatlôna, a kyhpachâna vâta thlalôhna, Thlahpa akaona, thapasana nata ngiachhiena zy nâmo liata a chyhta chhâ a y khiahta cha,

² palôh miakha phaoh ta, kyhpachâna miakha hneipa ta, lôraohpa nata reihkha tlapa ta ei lyna paki teh u.

³ Hlaotlohna hmô ta, moh a lâ awpa khona vâta tlyma, apalaina vâta tlyma, khâpa hmah tao khuh vy. Tlao a panawh u la, nâmo hlâta mohropazy pha viapa ta rao teh u.

⁴ Nâmo khopa dei moh leipa u la, mohropazy khopa chhao moh tyh hra muh vy.

⁵ He palôh Krista Zisu liata a ypa he nâmo liata chhao y hra mawh sy:

⁶ Ano cha Khazohpa châna a hneipa châ ta, châhrasala Khazohpa tlu ta ypa cha tlaichhai awpa ta rao leipa ta,

⁷ anosasyh ta a parua khai ta, sei ta a taopa ta, chyhsapa hawhta vaw pih ta.

⁸ Chyhsapa hawhta vaw y ta, anosasyh ta a panawh ta, thina taihta reingiahpa ta y ta, kraws liata thina tlai cha.

⁹ Chavâta Khazohpa ta ano cha thata palyupalih ta, moh zydua hry liata moh chônôchaipa a pie.

¹⁰ Chatanachata avâ nata alei nata alei ry liata a ypa zydua ta Zisu moh ta ama pakhu paneih aw ei ta,

¹¹ Paw Khazohpa rônah nawpa ta, paleih to ta Zisu Krista cha Abeipa a châ tahpa ama phuah aw.

Khizaw khaihpa

¹² Chavâta kho ngaitapazy saih u, bie nama zyh tyhpa hawhna khata, ei y nota dei hria leipa u la, tahmâ ei y vei chhôh ta tlao hria viapa ta, chipa nata chalyupa ta nama pachhana cha hria papua teh u.

¹³ Ano alynazie tlaichhai ta, a khopa tao awpa ta, nâmo liata hriatuhpa cha Khazohpa a châ.

¹⁴ Paphôna nata aeichhiana y leipa ta ato tao teh u.

¹⁵ Chatanachata chhâ moleipa nata paviapa hry liana heta, seina hnei leipa nata pathaihpa châ aw ei chi ta, vâ awhsizy hawhta ama hry liata nama khaih aw.

¹⁶ Hrona bie khâchâ patu teh u. Chatanachata hraoleipa ta a râpasuapa nata hraoleipa ta a hriapasapa châ va na tahpa Krista noh liata ei palaikhei thei aw.

¹⁷ Dopa hlâna hawhta, namâ ngiapâna atheihna nata chakaona chô liata patlaipa ta y hraw sah la, a ly pyly na ta, nama zydua ta ei châ lykhei hra ei.

¹⁸ Cha hawhna chata nâmo chhao a ly u la, nâ lykhei hra teh u.

Timawthy nata Epâpharôditâ

¹⁹ Nama thâtih pahnopa ta, kei chhao thapatlôpa ta ei y thei hra nawpa ta, nâmo lâ Timawthy vaw tuah patoh awpa Abeipa Zisu liata ei hnabei a seih.

²⁰ Ano palôh hawhpa a phaohpa, nama duahmo châ pachâkhei hmeiseih awpa chyhsa hropa hnei va na.

²¹ Mohropa zydua cha, Zisu Krista châta châ leipa ta, âmo pha nawpa a tluapa sai ama châ.

²² Timawthy deikua cha pasiapa châ ta, saw ta a paw a chakaopa hawhta, thâtihpha chhona kyh liata eina chakaolâh tyhpa nama pahno.

²³ Chavâta ei thâtih awpa ei pahnopa nahta, thlai vaw tuah awpa ei chhuah.

²⁴ Kei chhao thlai a vy awpa ta Abeipa liata ei hnabei a seih.

²⁵ Ei ngiahnazy liata na chakao awpa ta kei lâta nama vaw tuapa, ei unawhpa nata ei hrialâhpa nata pheisaih ei châlâhpa Epâpharôditâ he, nâmo lâ vaw pasiesa bâ awpa a byuhpa ta ei pahno.

²⁶ Nama zydua ta cha vâ ngaita ei ta, a pasapa kyh nama vaw theipa vâta a palôh pha thai khao vei.

²⁷ Thi daihmâna taihta a pasapa châ tlai ta, châhrasala Khazohpa ta ano cha ngiachhie ta, ano a ngiachhiepa dei châ leipa ta, pachârôhna chôta pachârôh via heihna ei tyh lei nawpa ta, kei eina ngiachhiepa a châ hra.

²⁸ Chavâta ano nama hmô heih tita namâ ly thei nawpa nata ei pachârôhna a chyh via thei nawpa ta, Epâpharôditâ cha nâmo lâ vaw pasiesa awpa a ngiatiah va na.

²⁹ Thapha ngaitapa ta Abeipa liata a vaw ly u la, he hawhpa chyhsazy he palyupalih teh u.

³⁰ Nâmo ta eina deichhy awpa vyuhpa nata namâ phahlanazy pabie awpa ta, a hrona sokhâhpa ta na chakao ta, Krista raihria vâta a thi daihmâpa a châ.