PHILEMAW 1 - Mara Bible RV (BSI)

Anaohna

¹ Krista Zisu châta a tâhpa Pawla nata eima unawhpa Timawthy ta eima viasa kho ngaitapa nata eima hrialâhpa Philemaw,

² eima sietanô Aphia, eima pheisaih châ lâhpa Akhipâ nata na o liata Awnanopa a pakhypa zy eima châ naoh.

³ Khazohpa eima Paw nata Abeipa Zisu Krista tawhta ngiachhiena nata thlalôhna nama hnohta y mawh sy.

Philemaw kyhpachâna nata ngiapâna

⁴ Ei thlahchhânazy liata châ thei tyh na ta, na moh reipa ta ei Khazohpa hnohta alyna bie khâ ei reih tyh.

⁵ Abeipa Zisu nâ ngiapâna nata mopathaihpa zydua kyh na pachâzie zy vaw thei na ta,

⁶ Krista vâta hmo pha to eima hneipa na pahno paki thei nawpa ta, nâ ngiapâna bie cha tiamapa ta chho lymâ awpa ta thlah ei cha chhâpa tyh.

⁷ Unawh y, nâma zawhzi ta mopathaihpazy palôh pathiehpa ta y ta, na kyhpachâna ta alyna nata thlalôhna thata eina pie.

Pawla ta Ônesimâ a reikhei

⁸ Cha vâna chata, â ngiahpa hmo tao awpa bie cha pie awpa ta, Krista liata cha ngâh thlâh hraw sah la,

⁹ kyhpachâna vâta, kei, Pawla, pawpipa nata tahmâ Krista Zisu vâta a tâhpa heta, â haw ta ei châ haw.

¹⁰ Ei sawchapawpa Ônesimâ, bâlia ei ky chhôh ta sawchapaw ta ei hneipa châta ei châ haw.

¹¹ Kha hlâta na châta phahnai leipa ta, tahmâ deikua cha, nâ nata kei châta a phahnai haw.

¹² Cha chyhsa, ei palôh nâ hria chaipa cha, nâ lâ vaw kua awpa ta ei vaw pasiesa.

¹³ Thâtihpha vâta patâhpa ei châ chhôh ta ei hnohta y sala, nâma vyuhpa ta na chakao sala tahpa ei khoh kaw.

¹⁴ Châhrasala na hmo pha tao awpa cha, pataosa raruahpa châ leipa ta, nâma lôhthai tlai ta a taopa na châ awpa ei khohpa vâta, na bie leipa ta khâpa hmah tao awpa khoh va na.

¹⁵ Buakhata a châ chhaihpa kha, chhâzaw ta ano na hnei palâh nawpa a châ thei mâh tâh.

¹⁶ Châhrasala sei hawhta châ khao leipa ta, sei hlâta pha viapa, unawh kho ngaitapa hawhta a châ bâ aw. Keima châta unawh kho ngaitapa châ ta, nâma châ chhochhi ta cha, sapa liata nata Abeipa liata unawh kho ngaitapa a châ pachai aw.

¹⁷ Chavâta na hrialâhpa ta eina pachâ khiah chi ta cha, keima einâ ly awpa hawh chi ta ano he a vaw ly mah y.

¹⁸ Na chô liata hmo paraopa kheihawhpa rai a hnei khiahta tlyma, leibâh kheihawhpa rai a hnei khiahta tlyma, kei ta ei châ bâhpa hawhta rao mah y.

¹⁹ He bie he kei Pawla ta, keima ku tlai ta ei ropa a châ, keima ta ei cha thô aw. Nâ ta keima liata a bâhpa na hneipa, na pôhpa tlai chhao einâ bâhpa chi, ei tahna deikua la châ vei.

²⁰ Chatatlyh, unawh y, Abeipa liata eina phahnaikhei hra awpa chi ei khoh kaw. Krista liata ei palôh na pathieh heih mah y.

²¹ Reingiahna na hneipa liata a lôhpa ta, ei reipa hlâ chhao ta a pha viapa ta na tao aw tahpa pahnopa ta, he châpaphaopa he na hnohta ei vaw ropa a châ.

²² Khâpa rai châ sala, khichhai chhôhpadâhpa nâ vaw chhuanohpa mah y. Nama thlahchhânazy vâta nâmo lâ avyna daihti piepa ei châ aw tahpa ei hnabei a seih.

Byhnâ awna

²³ Krista Zisu vâta ei tâlâhpa Epâpharâ ta a châ naoh.

²⁴ Ei hrialâhpa Mâka, Aristaku, Demâ nata Luka zy chhao ta ama châ naoh hra.

²⁵ Eima Beipa Zisu Krista ngiachhiena cha nama thlahpa hnohta y mawh sy.