ÔBADIA 1 - Mara Bible RV (BSI)

Edômâ panawhpa a châ aw

¹ He biezy he Ôbadia aluahna châ ta, Abeipa Zehôvâh ta Edômâ kyh liata a reipa biezy a châ: Abeipa tawhta bie thei pi ta, Phopizy hry liata lyuhchâpa tuapa a châ; “Thyu teh u, Edômâ a dyuh ei suh u!” Tahpa ta ama pahrua.

² Pachâ teh, phopizy hry liata cha panawh aw na ta, Mohnao ngaitapa na châ aw.

³ Nâ lôpanô keina liata y chi ta, Su sâhpa liata pahrâpa ta, “Ahy ma alei lâ nâ pathla thei aw?” Na palôh liata a tahtuhpa y, Na palôh laina ta a cha dôvei haw.

⁴ “Pahmôhpi hawhta â sâh pi ta a zawpa ta, Awhsizy hry liata na bu tu hra la, Cha tawhna chata ei châ daophi pathlah aw,” Abeipa ta a tah.

⁵ Parutuhpazy nâ lâ a vy ei sala, Hraotuhpazy zâ ta amâ vy khiahta cha, Amâ ngiahpa hlâta hluhvia ama la aw ma? Kre thei lyutuhpazy nâ lâ a vy ei sala, Kâmo thoh awpa siesai leipa ta ama y aw ma? Nâ deikua cha hrao khaipa na châ haw.

⁶ Esaw cha hrao khaipa châ ta, A ryubyh la khaipa a châ.

⁷ Na viasa zydua ta na râhri taihta cha chadai ei ta, Nâ nata adyhna a taopazy ta Cha dôvei ei ta ama cha pahnie haw. Na viahchhâ a niepazy ta Na ry lâta khoheih cha chôkhâh ei ta, Châhrasala pahno va chi.

⁸ “Cha noh liata, chyhsa sopazy Edômâ tawhta pahleipadia aw ei na ta; Novâhna chhao, Esaw Tlâh tawhta ei pahleipadia aw,” Abeipa ta a tah.

⁹ “Hy Temâ y, Na pasaiphazy ama palôh a dua aw; Esaw Tlâh liata chyhsa zydua thiepa châ aw ei ta, Chhawh pathlah khaipa ama châ aw.”

Edômâ hriena chhâpa

¹⁰ “Na unawhpa Zakaw chô liata thachahra na hmâpa vâta, Nozana ta cha khu aw ta, Chhâzaw ta chhawh pathlahpa na châ aw.

¹¹ Khichhaipazy ta Zerusale sôh a râkhei ei ta, Chihropazy ta a thokhy chhikao a ngiapa ta, Zerusale kyh nuby amâ dao noh kha, Â hlapa tawhta tlâ na moh ei; Chavâta nâ chhao âmo hawhpa na châ hrapa kha.

¹² Na unawhpa chhiena â tyh noh kha, Kheihta ma a lypa ta moh thei chi ta, Zudâh pathla raona amâ tyh noh kha, Kheihta ma thaphapa ta na sai thei tly! Ama pachârôhna noh liata, Kheihta ma na pakah a kawh chie thei tly!

¹³ Ei phopi chhiena amâ tyh noh ta, Ama thokhy chhikao namâ ngia awpa châ vei; Chhiena vâta riethei ama tao noh ta, Nama saipaza thlâh ha awpa châ vei; Pachârôhpa ta ama y noh ta, Ama sôhzy nama la awpa châ hra vei.

¹⁴ Ei phopi a râpazy cha thie awpa ta, Lâtlei liata nâ byh awpa châ vei; Pachârôh noh ta a hroh tlakaihpazy chhao, Chariahpa ku lia na hlâ awpa châ vei.”

Abeipa noh â hnia haw

¹⁵ “Abeipa noh cha, Phopi zydua châta â hnia haw; Na taopa hawh tlai ta, Na chô liata taopa a châ aw; Na hmotaopazy tlai kha, Na luh chô lia â vaw lie aw.

¹⁶ Ei tlâh pathaihpa liata nyu nama dopa hawhna khata, Phopi zydua ta ama doh aw; Dopa ta palâ aw ei ta, A pih leipa hawhta ama châ aw.”

Izarei parônahsana

¹⁷ “Zaio tlâh liata deikua cha, Pachhapazy ta pahrâ aw ei ta, Su pathaihpa a châ aw; Zakaw pathlazy cha, Ama ryuto râh ama hnei aw.

¹⁸ Zakaw pathlazy cha, Mei châ aw ei ta; Zawsi pathlazy chhao, Meipaleih ama châ aw; Esaw pathlazy cha, Sawphao châ aw ei ta; Mei ta rao aw ei ta, Ama pakâ khai aw; Esaw pathlazy cha, Ahrohpa rai y aw veih ei,” Abeipa ta a tah.

Abeipa khinarâh

¹⁹ “Neke mo ta Esaw Tlâh hnei aw ei ta, Sephelâ mo ta Philistinâ râh ama hnei aw; Epharai râh hnei aw ei ta, Samâri râh chhao ama hnei aw; Benzami ta Kilia râh a hnei aw.

²⁰ Izarei saw pheisaih paipatlapazy ta Kâna râh Zarephâ taihta hnei aw ei ta, Zerusale chyhsa paipatlapa Sepharâ liata a ypazy ta, Neke khihpizy ama hnei aw.

²¹ Esaw Tlâh chô liata ryureih awpa ta, Pachhatuhpazy Zaio Tlâh lâ khy aw ei ta, Chatanachata khinarâh cha Abeipa eih a châ aw.”