NEHEMIAH 9 - Mara Bible RV (BSI)

Izarei sawzy ta ama moleina ama palâhâh

¹ Cha thla, noh kih nata noh palihna noh liata, Izarei sawzy a hmaoh ei ta, kâhvileipa ta y ei ta, latho poh a bupa ta, ama luh liata alei a mia ei ta.

² Izarei chipathlazy cha chihropazy tawhta a panano ei ta, a duah ei ta, âmo moleinazy nata ama pathlatuhpazy paraonazy palâhâhpa ta reihpha cheih ei ta.

³ Ama su chyu liata a duah ei ta, Abeipa ama Khazohpa Ryhpa Châbu cha dawh thôh chhôh reih ei ta, dawh thôh hropa chhôh ama moleinazy reihpha cheipa ta Abeipa ama Khazohpa a chhy ei ta.

⁴ Livai hleidy liata Zesua, Bâni, Kâdamie, Sebaniah, Buni, Serebiah, Bâni nata Kenani zy a duah ei ta, ao paro ngaitapa ta Abeipa ama Khazohpa pado ei ta.

⁵ Chatawhcha Livai pathla Zesua, Kâdamie, Bâni, Hâsabâniah, Serebiah, Hôdiah, Sebaniah nata Pethâhiah zy ta, “A duah u la, Abeipa nama Khazohpa cha chhâzaw nata tlyzaw ta reithai teh u,” tah ei ta. Ezrâ ta, “Reithaina nata palyupalihna zydua hlâta chônô viapa ta cheihchalopa na moh rônahpa cha reithaipa ta y mawh sy.

⁶ Nâ cha Abeipa châ chi ta, nâma deita he Abeipa cha na châ. Avâzy tao chi ta, avâzy avâ nata cha liata a ypa zydua na taopa a châ. Alei nata a chô liata a ypa zydua tao chi ta, tilaipi nata a chhôh liata a ypa zydua chhao na taopa sai a châ. Cha zydua cha hrona pie chi ta, avâ liata a ypazy ta ama châ chhy.

⁷ “Nâ cha Zehôvâh Khazohpa châ chi ta, Abarâ a tlyhtuhpa na châ. Ano cha Kaldia râh Ur khihpi tawhta a chhi papuatuhpa nata Abarahâ tahpa ta a moh a bituhpa na châ.

⁸ Na hmiakô liata a palôh ngâchhihpa ta hmô chi ta, chatanachata Kâna mo, Hiti mo, Amawri mo, Perizi mo, Zebu mo nata Kikâsi mozy râh cha a pathlazy pie awpa ta, a hnohta biehrai na tao. Nâ cha asiapa châ chi ta, na bietai a patlôpa na châ.

⁹ “Miah pathlatuhpazy Izi râh liata ama rietheizie hmô chi ta, Tilaipi Saihpa liata ama chana ao na thei.

¹⁰ Phiraoh nata a chakaotuhpa zydua nata a râ chyhsa zydua ta miah pathlatuhpazy chô liata a palai ngaitapa ta hmo ama taopa na pahnopa vâta, ama chô liata ngiana nata hmonoâhpazy tao chi ta, tanoh eima hmôpa hawhna heta, na moh nâ tao haw.

¹¹ Ama hmiakô liata tilaipi pachhaih chi ta, tilaipi liah liata alei hipa liata sie ei ta, âmo a chadaituhpazy cha, ti thatlô ngaitapa liata alô pathlapa hawhta, ti a thu ngaitapa liata na pathla ha ei.

¹² Nohchhô ta meihdo tôh ta âmo chhihtha chi ta, zâ ta ama siena lâpi pakhaih awpa ta mei tôh ta na chhihtha ei.

¹³ Sinai Tlâh liata za chô chi ta, avâ tawhta âmo cha bie a chho chi ta, ryureina dopa, ryhpa dopa, bieraopa nata biepiepa phapazy na pie ei.

¹⁴ Na Pahânoh pathaihpa thâtih âmo pahnosa chi ta, châ chakaotuhpa Mawsi hmâpa ta biepiepazy, bieraopazy nata ryhpazy na pie ei.

¹⁵ Ama nodi nota avâ tawhta viahchhâ pie chi ta, ama dâhphi nota lôpanô tawhta ti papua chi ta, âmo pie awpa ta na bâh avâ lâ pazawhpa ta bie nâ taihpa râh a ngia ta, hnei awpa ta na chho ei.

¹⁶ “Châhrasala âmo nata miah pathlatuhpazy khata a palai ngaitapa ta hmo tao ei ta, ama koh pachyu ei ta, na biepiepazy zyh veih ei.

¹⁷ Na biepiepazy zyh khoh leipa ei ta, ama hry liata hmonoâhpa na taopazy chhao pahno khoh khao veih ei. Ama rao pachyu ei ta, ama seichâna Izi râh lâ kua heih awpa ta chhituhpa ama rao. Châhrasala nâ cha a ngiahthai awpa ta a mâ thlâh hapa, ngiachhiena nata zawngiahna a hneipa, a hiehâh a rupa nata kyhpachâna a ipa a hneipa Khazohpa châ chi ta, âmo cha a heihsai va chi.

¹⁸ Viahchaotaw nothlahpa a tao ei ta, ‘He he Izi râh tawhta châ kaw chhi papuatuhpa na khazoh a châ,’ tahpa ta Khazohpa moh thata ama reipachhie no chhao khata,

¹⁹ na zawngiah­na rônah ngaitapa vâta, râhchawhpa liana kha âmo a heihsai va chi. Ama siena liata a chhihtha laihpa meihdo tôh ta âmo cha nohchhô ta siesai leipa ta, zâ ta ama lâpi a pakhaihpa mei tôh ta âmo cha siesai vei.

²⁰ Âmo pachu awpa ta na Thlahpa phapa pie chi ta, na mânâ ama pakah lâ a ngia awpa pakhâ leipa chi ta, ama dâhphi nota do awpa ti na pie tyh ei.

²¹ Kô sypalih chhôh râhchawhpa liata âmo chyh chi ta, khâpa hmah a phahla veih ei. Ama chysiazy chy leipa ta, ama pheizy thloh vei.

²² “Khinarâhzy nata phopizy âmo pie chi ta, râh chaki to taihta tovyuh na pie ei. Chatanachata Hesbaw bei Sihaw râh nata Bâsanâ bei Ôkâ râhzy ama hnei.

²³ Ama pathlazy cha avâ awhsi zie ta papôh chi ta, a ngia ta hnei awpa ta ama pathlatuhpazy hnohta na chhopa râh lâ nâ chhi ei.

²⁴ Chatanachata ama pathlazy ta a ngia ei ta, râh cha ama hnei. Râh liata a pahrâpa Kâna mozy ama hmiakô liata panawhsa chi ta, ama khopa hawhta tao awpa ta, cha râh liata phopizy nata ama beizy cha Izarei sawzy ku liata na pie ei.

²⁵ Thokhy a hneipa khihpizy nata râh pha ngaitapazy la ei ta, hmo pha to ta a biepa ozy, tikhaoh chao chiehpazy, kre sadôzy, ôli sadôzy nata theilâpa kô hluhpi ama hnei. Nie ei ta, rihbiepa ta y ei ta, thawh ei ta, na phana hluhpizy vâta a ly ngaitapa ta ama y.

²⁶ “Chatanachôta rei a ngiah leipa ei ta, châ dyuh ei ta, na ryhpa hnôhchhypa ta, nâ lâta âmo pakuasa awpa ta zikyurâtuhpa na hrohsopazy thie ei ta, Khazohpa reipachhiena rarôh y ngaitapa ama tao.

²⁷ Chavâta âmo rie a patheituhpa ama chariahzy ku liata na pie ha ei. Ama nôpona daihti liata cha pado ei ta, vârâh tawhta vaw nathlie chi ta, na zawngiahna rônah ngaitapa vâta pachhatuhpazy pie chi ta, âmo chata ama chariahzy ku tawhta ama pachha haw.

²⁸ Châhrasala ama thadâh tawhta, na hmiakô liata moleina hmo tao heih ei ta, chavâta âmo cha ama chariahzy ku liata siesai chi ta, ama chariahzy ta ama chô liata bie ama hnei haw. Chatahrasala nâ lâ vaw kua ei ta, ama cha pado nahta, vârâh tawhta vaw nathlie chi ta, na zawngiahna vâta ei hluhpi na pachha heih tyh ei.

²⁹ Na ryhpa lâ na pakuasa thei nawpa ei ta, âmo cha zikyu a râ tyh chi ta. Châhrasala a palai ngaitapa ta hmo tao ei ta, na biepiepazy zyh leipa ei ta, na pachianazy ama chakhia lymâ. Chyhsa ta na pachiana biezy hawhta a tao khiahta cha, a hroh awpa châ ta, châhrasala ama ngiatlâh pasuapa nata ama hnôkhi chhapa cha ano lâ tlao pahei ei ta, rei a ngiah khoh veih ei.

³⁰ Âmo cha kô hluhpi chhyh thai chi ta, na hrohsopazy hmâpa ta, na Thlahpa ta zikyu nâ râ tyh ei. Chatanachôta thei lei nahpâ amâ pachâ tyh. Chavâta cha râhzy liata phopizy ku liata na pie ha ei.

³¹ Châhrasala na zawngiahna rônah ngaitapa vâta, ama chhâna ngâsâ cha patlôsa leipa chi ta, âmo cha a heihsai va chi. Nâ cha ngiachhiena nata zawngiahna ta a biepa Khazohpa na châ.

³² “Chavâta eima Khazohpa, Khazohpa rônahpa nata thatlôpa nata chichhihpa, a biehrai patlôpa ta ngâchhihna a palâsa tyhpa Khazohpa y, keimo nata eima beizy, eima beimachâzy, eima theihthaipazy, eima hrohsopazy, miah pathlatuhpazy nata na phopi pôhpalôhpa chô liata, Asuria beizy daihti tawhta tanoh taihta rietheina vaw tlôpa zydua he, hmo chyhpa ta rie pachâ khah y.

³³ Eima chô liata hmo a tlôpa zydua liana heta, nâ cha asiapa na châ. Ngâchhihpa ta hmo tao chi ta, keimo deikua molei ngaitapa ta hmo eima tao tyh.

³⁴ Eima beizy, eima beimachâzy, eima theihthaipazy nata miah pathlatuhpazy ta na ryhpa zyh leipa ei ta, na biepiepazy nata zikyurâna bie na piepazy thei khoh veih ei.

³⁵ Âmo khinarâh liata y ei ta, na phana rônahpa na patosapa hry liata ypa ta, râh laipa nata phapa na piepa liata ama ypa chhao ta, nâ cha chakao leipa ei ta, ama moleina raizy bâhsai veih ei.

³⁶ Moh tua, tanoh he sei ta y pi ta, a theilâpa nata a hmopiepa phapa nie awpa ta miah pathlatuhpazy hnohta na piepa râh lia tlai ta sei ta eima y hih.

³⁷ Eima moleina vâta eima chô liata bei châ awpa ta na raopazy ta râh kôvei phanazy ama to khai ha hih. Ama khozie hawhta eima pôhpa nata eima sahrohzy chô liata biehnei ei ta, nôpo pachârôhpa ta eima y.

³⁸ “Cha zydua vâna chata, ropa tlai ta biehrai a ipa tao pi ta, eima beimachâzy, eima Livai pathlazy nata eima theihthaipazy moh chhao biehraina chahnao pa-ina châ liata ropa a châ,” tah ta.