NEHEMIAH 8 - Mara Bible RV (BSI)

Ezrâ ta Ryhpa a reihpapua

¹ Chyhsa zydua reihkha tlapa ta, Ti Chhikao tlyhmia tlyliah liata a hmaohpakhy ei ta. Chârohtuhpa Ezrâ hnohta, Abeipa ta Izarei sawzy bie a piepa Mawsi Ryhpa châbu vaw cheih awpa ta chho ei ta.

² Thla sarina, noh khana noh ta, theihthaipa Ezrâ ta Ryhpa cha chapawzy, chanôzy nata a pahno thai awpa zawpizy lâ vaw cheih ta.

³ Ezrâ ta Ti Chhikao tlyhmia tlyliah liata ahmaohpakhypa chapawzy, chanôzy nata a pahno thaipazy lâ a heihpa ta, Ryhpa Châbu cha mydi kari tawhta nohchhô taih reih ta. Chyhsa zydua ta Ryhpa Châbu reina lâ cha ama nah pachôh ei ta.

⁴ Ezrâ cha Ryhpa Châbu rei nawpa ta ama taopa tho tlailai chô liata a duah ta. A chachâh lâ kâ liata Mâtithiah, Semâ, Aniah, Uria, Hikia nata Mâsei zy a duah ei ta, a chavei lâta Pedai, Misela, Mâkia, Hâsu, Hâsbâdanâ, Zekaria nata Mesulâ zy amâ duah.

⁵ Ezrâ cha zawpi zydua hlâta â sâh viapa liata a duah ta, zawpi zydua mohmô ta châbu cha pakai ta, châbu a pakai nahta, zawpi zydua a duah ei ta.

⁶ Ezrâ ta Abeipa, Khazohpa rônahpa cha reithai ta, zawpi zydua ta ama bâh avâ lâ chaluahpa ta, “Amen, Amen,” tahpa ta a chhy ei ta. Ama luh a bôh ei ta, ama hmia alei lâ a khupa ta Abeipa a naoh ei ta.

⁷ Zawpizy amâ duana su liata amâ dua thlâh ha nota, Livai pathlazy, Zesua, Bâni, Serebiah, Zami, Aku, Sabethai, Hôdiah, Mâsei, Kelitâ, Azariah, Zôzabâ, Hâna nata Pelai zy ta zawpizy cha Ryhpa ama pahno thei nawpa ta pachu ei ta.

⁸ Khazohpa Ryhpa châbu bie cha a siapa ta reihpapua ei ta, ama reipa cha zawpizy ta ama pahno thei nawpa ta, a yzie chhopasia lymâ ei ta.

⁹ Ryhpa biezy ama thei nahta, zawpi zydua thata cha ei ta. Râhvaotuhpa Nehemiah, theihthaipa nata chârohtuhpa Ezrâ nata zawpi pachutuhpa Livai pathlazy ta zawpi zydua hnohta, “Tanoh he Abeipa nama Khazohpa châta noh pathaihpa a châ hih. Chavâta mâchhiesa leipa u la, cha hra khuh vy,” tah ei ta.

¹⁰ Nehemiah ta ama hnohta, “Nama o lâ chyu a di u la, sa thawhpa kei nie u la, kresawhti thlôhpa doh u la, a chhuanoh hmâ leipazy hnohta niedozy paphao teh u. Tanoh he eima Beipa châta noh pathaihpa a châ hih. Pachârôhpa ta y khah u. Abeipa alyna cha nama thatlôna châ tlôh ta,” tah ta.

¹¹ Livai pathlazy ta zawpizy cha ama hna pangâh ei ta, ama hnohta, “A chalih teh u. Tanoh he noh pathaihpa a châ hih. Pachârôhpa ta y khah u,” tah ei ta.

¹² Ama hnohta bie phuahpazy ama pahno thaipa vâta, zawpizy cha niedo awpa nata mohropazy niedo paphao awpa nata alyna rônahpa tao awpa ta, ama o lâ chyu a di ha ei ta.

Byureih kyhchhi

¹³ A noh nona liata, zawpizy hry liata chhôhkha pawhrâhpazy cha Ryhpa biezy a chu awpa ta, theihthaipazy nata Livai pathlazy chhaota chârohtuhpa Ezrâ lâ pangai ei ta.

¹⁴ Thla sarina kyhchhi nota, Izarei sawzy cha byureih liata ama y awpa a châzie Abeipa ta Mawsi hmâpa ta bie a piepa cha Ryhpa liata hmô ei ta.

¹⁵ Byureih kyhchhi kyh Ryhpa liata, “Tlâhzy lâ sie u la, Ryhpa liata ropa hawhta, byureihzy sa nawpa ta ôli chiahzy, lyurâhpa ôli chiahzy, tho hroh kôzawpa chiahzy, thiahrâ kuahzy nata tho buh rôhpa chiahzy vaw cheih muh vy,” tahpa ta ama khih zydua nata Zerusale liata phuahpa ta ama pathâhsa awpa a châzie ropa hmô hra ei ta.

¹⁶ Chatanachata zawpizy cha sie ei ta, thobuh chiahzy vaw cheih ei ta, ama o chô liata zy, ama tlyhmia liata zy, Khazohpa o tlyhmia liata zy, Ti Chhikao tlyhmia tlyliah liata zy, Epharai Chhikao tlyhmia tlyliah liata zy, ama byureih cha tu chyu ei ta.

¹⁷ Seichâna tawhta a vaw kuapa zawpi zydua ta byureihzy tu ei ta, byureihzy liana cha pahrâ ei ta. Nunâ sawchapawpa Zawsua daihti tawhta, cha noh taihta, Izarei sawzy ta byureih kyhchhi vaw hmâh khao leipa ei ta. Chavâta byureih kyhchhi ama hmâ theipa cha amâ ly ngaita.

¹⁸ Kyhchhi pathao noh tawhta pachhâ noh taihta, Ezrâ ta Khazohpa Ryhpa Châbu cha noh chareih ta reih ta. Kyhchhi cha noh sari hmâh ei ta, a noh chariena noh liata, biepiepa hawhta pakhypi pathaihpa hmâpa a châ.