NEHEMIAH 6 - Mara Bible RV (BSI)

Nehemiah ama teiparu

¹ Chatawhcha Sanbâlâ, Tôbia, Arabia chyhsa Kese nata eima chariah hropazy ta thokhy ei paduapathi khai hapa nata a pyupa rai a y khao leipa thâtih vaw thei ei ta. Thokhy chhikao ochhizy deikua tao mâh va na.

² Sanbâlâ nata Kese ta chyhsa vaw tuah ei ta, ei hnohta, “A vy la, Ônô bypi khih miakha liata a hmôpakhy suh vy,” tah ei ta. Châhrasala ei chô liata kupathla amâ chhuahpa dei châ tlôh ta.

³ Âmo lâ lyuhchâpazy tuah na ta, ama hnohta, “Rai rônahpa hria hai na ta, a zu thei va na. Khazia nâmo lâ ei zu chhôh ta rai cha â chalih aw?” tah na ta.

⁴ Ama rei hmopa pyly cha ei palih dua na vaw pachhosa ei ta, ei chhy tyhpa hawhta ei chhy lymâ ei.

⁵ A ei pangawhna liata Sanbâlâ ta a chakaotuhpa kei lâ vaw tuah ta, châbyh liata khô leipa, vâtlâh pahno awpa châ na vaw paphao ta.

⁶ “Nâ nata Zu chyhsazy ta chariah ta thyu a chhuah ei chi ta, cha châta thokhy nama paduapathipa kyh chhao phopizy liata pathâh ta, Kese chhao ta a reih hra. Cha biezy tawhta pachâpa ta, ama bei châ awpa na khohpa ta â lâ.

⁷ ‘Zudâh râh liata abei a y,’ tahpa ta na thâtih Zerusale liata phuah awpa ta hrohsopazy chhao na rao ei. Cha biezy cha abei ta a vaw thei aw. Chavâta a vy la, pachâ khoh ei suh u,” tahpa ta châ liana cha roh ta.

⁸ Ano lâ chyhsa tuah na ta, a hnohta, “Na reipa hawhta taopa khâpa hmah y vei. Na pachâpalipa ta na phichhyhpa biezy a châ,” tah na ta.

⁹ Ama zydua ta miah pachhiparypa ta miah pachisa a chhuah ei ta, “Ama bâh pathliah aw ei ta, raihria patlô thei aw veih ei,” tahpa ta ama pachâ. Chavâta Hy Khazohpa, tahmâ ei ku tha na patlô mah y.

¹⁰ Noh kha cha a o liata â hraikhôh thlâh hapa Mehetabe sawchapawpa Deliah sawchapawpa Semiah lâ vawh na ta, ano ta, “Khazohpa o, Achhyna o chhôh liata a hmô sih la, Achhyna o ochhi khaw ha ei suh u. Cha thie awpa ta amâ vy aw. Azo ta cha thie awpa ta amâ vy aw,” tah ta.

¹¹ Châhrasala kei ta, “Kei he a râ thlâh awpa chyhsa ma ei châ? Kei hawhpa chyhsa heta Achhyna o chhôh lâ a ngiapa ta ma ei hro ei pabohsa aw? A ngia aw va na,” tah na ta.

¹² Kha chyhsa kha Khazohpa tuapa châ leipa ta, Tôbia nata Sanbâlâ ta tâkâ piepa ta hmâh ei ta, kha hrohsona biezy kha ei chô liata a reipa a châ tahpa a hnôhlâ ta vaw pahno na ta, ei hmôpasiapa a châ.

¹³ Chipa vâta Achhyna o chhôh lâ a ngia sah la, cha moleina hmo cha na pataosapa ta, ei moh pachhiepa ta eina pasipasawh thei nawpa ei ta, ano kha tâkâ piepa ta ama hmâpa a châ.

¹⁴ Hy ei Khazohpa, Tôbia nata Sanbâlâ he ama hmotaopa lymâ hawhta a thei thlâh ha la, na pachhipary awpa a chhuahpa hrohsonô Nôdiah nata hrohso hropazy chhao a thei thlâh ha mah y.

Thokhy palohpa a châ

¹⁵ Chatanachata thokhy cha, noh sypangawh nata noh no chhôh sapa châ ta, Elul thla, noh kih nata noh pangawhna noh ta palohpa a châ.

¹⁶ Thokhy palohna thâtih cha eima chariahpazy ta ama thei nahta, eima Khazohpa baona ta palohpa a châzie ama pahnopa vâta, eima chheipâh phopi zydua cha chi ngaita ei ta, âmosasyh angâna chhao a tlapahnai khai haw.

¹⁷ Cha dei châ vei, cha nohzy liata, Zudâh nôpawpazy ta Tôbia hnohta châ hluhpi paphao ei ta, Tôbia tawhta châpaphaopa hmô tyh hra ei ta.

¹⁸ Tôbia cha Arâh sawchapawpa Sekaniah piahpa a châpa vâta, bietai taopa ta ano chhâh a châpa Zudâh chyhsa hluhpi y ei ta. A saw­chapawpa Zehôhanâ hra cha Berekiah sawchapawpa Mesulâ sawchanô cha lapinô ta hnei pâ heih ta.

¹⁹ Chavâta chyhsazy ta Tôbia hmotao phapazy cha ei hmiakô liata reih tyh ei ta, ei biereipazy chhao ano lâ ama tlôkhei tyh. Chavâta na pachisa awpa ta, Tôbia ta châzy eina vaw paphao tyhpa a châ.