NEHEMIAH 5 - Mara Bible RV (BSI)

Rietheipazy tlybaina Nehemiah ta a pachhâsa

¹ Chatawhcha zawpizy nata ama la­pinôzy ta ama unawh Zuzy chô liata paphôhpa ta thata awh ei ta.

² Thokhazy ta, “Keimo sahlao he eima sawchapawzy nata eima sawchanôzy chhaota hluh ngaita pi ta, chavâta nie awpa hneipa ta eima hroh thei nawpa ta, sâh a chhuhrao ei suh u,” tah ei ta.

³ “Chakâhna a tlôpa vâta, nie awpa sâh eima hnei thei nawpa ta, eima lyuzy, eima kre sadôzy, eima ozy taihta sôhkâ ta eima sokhâh lymâ bâ,” a tahpazy y hra ei ta.

⁴ “Eima lyu nata eima kre sadô râhpawzy abei hnohta pie awpa ta, sôhzy dyuchei pi ta.

⁵ Eima sapa he eima unawhzy sapa hawhta châ ta, eima sawzy chhao âmo sawzy hawhta châ hra ei ta. Cha hawhta a châ nota, eima sawchapawzy nata sawchanôzy cha sei pachâsa awpa duahmo liata a duah pi ta, eima sawchanô thokhazy chhochhi cha sei ta taopa ama châ haw. Chyhsa hropazy ta eima lyu nata kre sadôzy ama hnei khai ha tawhta cha, tao thei awpa hnei khao ma pi,” a tahpazy chhao ama y.

⁶ Cha biezy nata ama paphôhna aozy ei thei nahta, ei hiehâh ngaita ta.

⁷ Kei nata kei ta a chhohia na ta, nôpawpazy nata ryureituhpazy maochhie ei na ta, ama hnohta, “Nama unawhzy tawhta apôhna la ei chi ta,” tah na ta, ama thâtih pachâ awpa ta zawpi awpakhy na ta,

⁸ ama hnohta, “Keimo ta phopizy lâta zuapa eima unawh Zu chyhsazy eima theina hawhta chatlai pi ta, nâmo deikua cha, nama unawhzy zuah ei chi ta, eima hnoh cheingei ta zuapa ama châ hih!” tah na ta. A thlih thlâh ha ei ta, rei awpa khâpa hmah pahno leipa ei ta.

⁹ Chavâta ama hnohta, “Nama hmotaopa he pha vei. Eima chariah phophizy ta miah ama pahneisao lei nawpa ta, eima Khazohpa nama chi awpa châ vei ma?

¹⁰ Cha dei châ vei, kei nata ei unawhzy nata nâ chakaotuhpazy ta âmo cha sôh nata sâh zy â bâh ta eima pie lymâ. Ngiachhiepa ta apôhna hneipa ta dyu pacheisapa he pathleih ei suh u.

¹¹ Tanoh tlai heta ama lyuzy, ama kre sadôzy, ama ôli sadôzy, ama ozy pakua khai ha u la, ama sôh, sâh, kre sadô nata sathaw zy tawhta apôhna nama lapazy pakua khai ha teh u,” tah na ta.

¹² Âmo ta, “Chazy cha pakua khai aw pi ta, âmo tawhta khâpa hmah a hnaw aw ma pi. Na reipa hawhta eima tao aw,” tah ei ta. Chatawhcha theihthaipazy aw ei na ta, ama reipa hawhta zawpizy cha bie pataihsa ei na ta.

¹³ Ei poh pai chatho na ta, ama hnohta, “He bietai a tao leipa maih cha, he poh pai chathopa hawhna heta, Khazohpa ta a o tawhta nata a rai tawhta chatho pathlah mawh sy. Chatho pathlahpa châ sala, parua khaipa châ mawh sy,” tah na ta. Zawpi zydua ta, “Amen”, tah ei ta, Abeipa cha reithai ei ta. Zawpizy ta ama bietai hawhta tao ei ta.

Nehemiah apiepasaina

¹⁴ Cha dei châ vei, Zudâh râh a vaotuhpa ta raopa ei châ rakha tawhta, Bei Âtazezia â beina kô kihna tawhta kô sythôh nata kô nona taihta, kô hrawh hleino chhôh, kei nata ei unawhzy ta râhvaotuhpa tovyuh niedozy nie ma pi.

¹⁵ Kei hlâta a vaw y tuapa râhvaotuhpazy khata zawpi chô liata phaohri thata pavi ei ta, noh chareih ta ama nie awpa pati nata kresawhti hleikhô ta, tâkâ sekel sypalih ama pacheisa tyh. Ama chakaotuhpazy taihta zawpi chô liata amâ pabeisa ngaita. Kei deikua cha, Khazohpa ei chipa vâta, cha hawhta tao va na.

¹⁶ Thokhy taopathina raihria liata a hmâh khai na ta, râh hnei a chhuah leipa na ta, nâ chakaotuhpa zydua chhao, thokhy raihria liata ama ypakhy khai.

¹⁷ Cha dei châ vei, eima chheipâh phopizy tawhta a vypazy hleikhô ta, Zu chyhsa nata ryureituhpa manôh 150 zy ta ei tlâhkhai liata khâ ama dôh tyh.

¹⁸ Ei niedo awpa ta noh kha châta viahchao tôhpa pô kha nata mietaku phapa pô charu nata pavawzy raopa châ ta, noh hrawh padai lymâ ta kresawhti chi nanopa hluhpi na pie tyh awpa ta raopa a châ hra. Chazy cha ei to thei awpa a châ nota, zawpi châta ama phao â hri tu aw tahpa pachâpa ta, râhvaotuhpa châta niedo raopazy cha eina pie awpa ei ta a hnaw va na.

¹⁹ Hy ei Khazohpa y, he phopi châta ei hmotaopa zydua he, ei pha nawpa ta a thei thlâh ha mah y.