NEHEMIAH 4 - Mara Bible RV (BSI)

Raihria pakhâpadiena

¹ Thokhy eima taopa thâtih cha Sanbâlâ ta a thei nahta, thata a pathi ia ta, Zuzy cha pahneisao ta.

² Chatanachata a unawhzy nata Samâri pheisaihzy hmiakô liata, “He Zu dyutlai leipazy heta khâpa ma ama tao hra tly? Khihpi amâ paduapathi heih aw ma? Atheihnazy ama hlâ aw ma? Noh kha ta patlô zua amâ chhuah hra ma? Mei ta a kâ hapa alôzy cha hnaihny tawhta thaopa ta ama pathieh heih aw ma?” tah ta.

³ A kiapâh liata Amawna chyhsa Tôbia y ta, ano ta, “Khâpa thokhy cha ma zua ama padua thei hra bao aw tly? Changie ta hmah kiah sala, alô thokhy ama taopa cha a pacho thlâh bao aw na,” tah ta.

⁴ Thlahchhâ na ta, “Hy eima Khazohpa, miah nathlie mah y. Mohnaopa ta eima y hih. Miah ama pasipasawhna he ama luh chô liata palie thlu la, hraopa ta y ei sala, râh hropa liata sei ta y mawh ei sy.

⁵ O satuhpazy hmia liata na hie ama cha pahâh haw. Chavâta ama thaileichâna khu leipa la, ama moleinazy na mohmô tawhta pahlei khah y,” tah na ta.

⁶ Chatanachata thokhy cha padua pi ta. Zawpizy ta hria khohna palôh ama hneipa vâta, thokhy cha â sâhna khophie taih thlai patlô pi ta.

⁷ Zerusale thokhy taopathina raihria cha a hmasie lymâ ta, a raonazy pamai pathaopa a châ tahpa Sanbâlâ, Tôbia, Arabia mo, Amawna mo nata Asadô mozy ta ama thei nahta, ama hiehâh ngaita ta.

⁸ Zerusale siehnao ta tymâna tao awpa ta a paraoh ei ta.

⁹ Eima Khazohpa lâta thlahchhâ pi ta, âmo tawhta eimâ boh thei nawpa ta chhô nah zâ ta vaituhpazy soh pi ta.

¹⁰ Zudâh zawpizy ta, “Hmo phaohtuhpazy ama tha a chhâ haw. Hnaihny hra cha hluh tlôh ta, keimo ta la thokhy he padua thei aw ma pi,” tah ei ta.

¹¹ Eima chariahpazy ta, “Âmo lâ vawh aw pi ta, thie aw pi ta, raihria eima chalihsa hlâlei pahno leipa aw ei ta, miah hmô aw veih ei,” tah ei ta.

¹² Cha nota ama chheipâh liata a pahrâpa Zuzy ta, “Namâ vaw lie tita su to tawhta amâ châ dyuh aw,” tahpa ta ei hrawh tlai miah chho ei ta.

¹³ Chavâta zawpizy cha ama zaozizy, ama aseizy, ama libawzy a chabapa ta, thokhy hnôhky lâta â hnai chaina su ruapazy liata, a pho pho ta soh ei na ta.

¹⁴ Chatawhcha mohmia pasaih na ta, thyu na ta, nôpawpazy nata ryureituhpazy nata zawpizy hnohta, “Âmo cha chi khuh vy. Abeipa rônahpa nata chichhihpa a thei u la, nama unawhzy, nama sawchapawzy, nama sawchanôzy, nama lapinôzy, nama ozy châta a dyuh muh vy,” tah na ta.

Raihria pazao heihpa a châ

¹⁵ Amâ chhuahna eima pahnonazie eima chariahzy ta vaw thei ei ta. Khazohpa ta amâ chhuahna a parao hapa eima pahnonazie chhao vaw thei hra ei ta. Chatanachata thokhy lâ kua heih pi ta, eima raihria chyu hria heih pi ta.

¹⁶ Cha noh tawhta cha, ei chyhsa â khophie ta raihria ei ta, â khophie ta aseizy, vyhphaozy, libawzy, chachôhna vyhphaozy a chaba ei ta. Chhituhpazy cha Zudâh pathla,

¹⁷ thokhy a chhôh haipazy hnôh lâta a duah ei ta. Hmo a phaohpazy chhao ama ku râkha lâta hmo patu ei ta, râkha lâta chaihrai chaba ei ta.

¹⁸ Raihriatuhpazy ta ama zaozi a pataihpa ta raihria ei ta. Ei kiapâh liata chiahmie tôtuhpa y ta.

¹⁹ Nôpawpazy, ryureituhpazy nata zawpizy hnohta, “Rai a hluh ngaitapa vâta, thokhy chô liata a pachhaih khai ha pi ta, pakha nata pakha likawh eimâ hla kaw hih.

²⁰ Chiahmie pyu nama theina su liata, cha liana cha keimo lâ a vaw hmaoh tyh muh vy. Eima Khazohpa ta miah â dyuhpa aw,” tah na ta.

²¹ Chatanachata rai cha hriapasa pi ta, â khophie ta my khihdei tawhta zâlâ awhsi â lâna taihta asei a chaba ei ta.

²² Cha nona chata zawpi hnohta, “Zerusale a chapiapa maih cha, âmo a chakaotuhpazy chhaota Zerusale liata a rie lymâ mawh ei sy. Chatanachata zâ ta miah vaih aw ei ta, nohchhô ta rai miah ama hriakhei aw,” tah na ta.

²³ Chavâta kei chhao, ei unawhzy chhao, ei satliazy chhao, vaituhpa nâ zi tyhpazy chhao, ahy hmahta eima chysia pahluh leipa pi ta, ti eima do no chhao ta eima chaihraizy soh ma pi.