NEHEMIAH 2 - Mara Bible RV (BSI)

Nehemiah Zerusale lâ tuapa a châ

¹ Bei Âtazezia â beina kô kihna, Nisan thla liata, a hmiakô liata kresawhti ama vaw so nahta, kresawhti cha la na ta, abei pie na ta. Cha hlâta a hmiakô liata pachârôhna hmia phaoh beih leipa na ta.

² Abei ta ei hnohta, “Tlâhleipa chhao châ leipa chi ta, khazia pachârôhna hmia na phaoh? Hmo hropa châ vei, palôh liata pachârôhna na hneipa vâta a châ,” na tah ta. Chi ngaita na ta.

³ Abei hnohta, “Abei cha hroh kôzaw mawh sy! Nâ pathlatuhpazy thlâ yna khihpi cha roryhrapa ta y ta, a chhikaozy chhao mei ta a kâ khai nota, kheihta ma pachârôhna hmia phaoh leipa ta ei y thei aw,” tah na ta.

⁴ Abei ta, “Khâpa na hia khoh?” na tah ta. Avâ Khazohpa lâ thlahchhâ na ta.

⁵ Abei hnohta, “Abei ta paryhsa sala, châ chakaotuhpa he na modypa ei châ khiahta cha, Zudâh râh liata nâ pathlatuhpazy thlâ yna khihpi lâ na pasiesa la, cha khihpi cha paduapathi awpa ta na pasaih mah y,” tah na ta.

⁶ A kiapâh liata abeinô chhao a tyuh thlâh ha ta, abei ta, “Khachâ na hawh aw, khati nâ vaw lie heih aw?” na tah ta. A daihti ei taih nahta, abei cha a ly kawpa ta na pasiesa ta.

⁷ Abei hnohta, “Abei ta a paryhsa khiahta cha, Zudâh râh ei tlôna taihta ama râhzy siepahlie na pasai awpa ta, Chavah Haosâ râhvaotuhpazy lâta châ na taopa awpa ta ei châ haw.

⁸ Abei râhmâhpa avaotuhpa Asâpha hnohta chhao, Achhyna o dôhna chhikao tlâh, khihpi thokhy nata ei pahrâ nawpa o châta a ngiahpa thozy na pie awpa ta châ na taopa awpa ta ei châ haw,” tah na ta. Ei Khazohpa ku phapa cha ei chô liata y ta, abei ta ei hiapazy cha hlao na patloh ta.

⁹ Chavah Haosâ râhvaotuhpazy kô ei tlô nahta, abei châzy cha pie ei na ta. Na sielâh awpa ta, abei ta pheisaih hyutuhpazy nata arâ pheisaihzy tuah ta.

¹⁰ Cha thâtih cha Hôrô chyhsa Sanbâlâ nata Amawna chyhsa molaipa Tôbia ta ama vaw thei nahta, Izarei sawzy châta phana tao awpa ta a vaw tlô awpazy thâtih ta âmo cha palysa lei kaw ta.

Nehemiah ta Zerusale thokhy a mohpasia

¹¹ Zerusale cha tlô na ta, cha liata noh thôh y na ta.

¹² Kei nata ei hnohta a ypa chyhsa chyhta chhaota zâ ta pua pi ta. Ei Khazohpa ta Zerusale châta ei tao awpa ei palôh liata a sopa cha, ahy hmah chho leipa ei na ta. Ei kiapa sahroh dei leipa ta cha, sahroh hropa ei chhipa y vei.

¹³ Zâ ta pua na ta, Saikao Chhikao, Drâkao Tikhaoh nata Hnaihny Chhikao zy chapiapa ta sie na ta, Zerusale thokhy chopa nata mei ta a chhikao a kâpazy moh na ta.

¹⁴ Tihnawh Chhikao nata Abei Tipo lâ sie na ta, ei kiapa sahroh sie thei nawpa su rai y leipa ta.

¹⁵ Zâ ta chavah kaw sao na ta, thokhy cha mohpasia na ta, vaw kua na ta, Saikao Chhikao lâ tawhta a di na ta.

¹⁶ Khihpi ryureituhpazy ta khataih lâ ma sie na ta, khâpa ma ei tao tahpa pahno veih ei. Zuzy, theihthaipazy, nôpawpazy, beimachâzy nata raihria awpa mohropazy chhao chho mâh tlâ veih ei na.

¹⁷ Ama hnohta, “Eima duahmo chhiezie he hmô ei chi ta, Zerusale cha roryhrapa ta y ta, a chhikaozy mei ta a kâ khai ha hih. A vy teh u, mohnaopa ta eima y khao lei nawpa ta, Zerusale thokhy he paduapathi suh u,” tah na ta.

¹⁸ Hmopha tao nawpa ta ei Khazohpa ku ei chô liata a yzie nata ei hnohta abei biereipazy âmo chho ei na ta. Âmo ta, “Thyu sih la, paduapathi tlai ei suh u,” tah ei ta. Chatanachata raihria phapa châta ama ku tha a patlô ei ta.

¹⁹ Cha thâtih cha Hôrô chyhsa Sanbâlâ nata Amawna chyhsa molaipa Tôbia nata Arabia chyhsa Kese zy ta ama thei nahta, miah pasipasawhpa ta miah pahneisao ei ta, “Khâpa hmo ma nama tao? Abei ma nama chakhia aw?” miah tah ei ta.

²⁰ Âmo cha a chhy ei na ta, ama hnohta, “Avâ Khazohpa ta vânoh miah a patosa aw. Keimo ano chakaotuhpazy thyu aw pi ta, khihpi he eima paduapathi aw. Nâmo deikua cha, Zerusale khihpi liana heta tovyuh nata biehneina nata a chhu thei awpa khâpa hmah hnei aw veih ei chi,” tah na ta.