NEHEMIAH 13 - Mara Bible RV (BSI)

Paduapathina raihria patlôpa a châ

¹ Cha noh ta, zawpi theina liata Mawsi Châbu cha reih ei ta. Cha liata Amawna mo nata Môabâ mozy cha Khazohpa pakhypi liata amâ ngia cheita awpa châ vei tahpa ropa hmôpa châ ta.

² Izarei sawzy Izi râh tawhta ama kaw pua nona khata, viahchhâ nata ti zy ta vaw dy leipa ei ta, Izarei sawzy chô liata Bâlâma chhie ama pasasapa vâta a châ. Châhrasala eima Khazohpa ta ama chhiesana cha byhnâ ta tlao a pachâsa haw.

³ Zawpizy cha ryhpa ama theipata nahta, chihropa pathla zydua cha Izarei sawzy tawhta panano ei ta.

⁴ Eima Khazohpa o chhôhpadâhpazy mohôhtuhpa ta raopa theihthaipa Eliasi cha Tôbia nata azaona a hneipa châ ta, ano chata cha hmozy a y hlâta,

⁵ niepa hlâna, ropahâhpa, hmobaohzy, sâh su hrawh su khazy, kresawhti nata sathaw so tyhna chhôhpadâhpa lai ngaitapa cha Tôbia y nawpa ta vaw pachhuahpanoh ta. Cha liata hmo sopazy cha Livai pathlazy, hlasathaipazy, chhikao vaituhpazy nata theihthaipazy châta thyuna zy châta hmâ awpa ta biepiepa kha châ ta.

⁶ Cha hawhta hmo a y nota, kei cha Zerusale liata y leipa na ta. Babylaw bei Âtazezia abeina kô sythôh nata kô nona liata, abei a hmô awpa ta ei sie chhôh a châ. Noh khazie tlyma ei y tawhta, sie heih awpa ta abei cha hiah na ta.

⁷ Zerusale tlô na ta, Eliasi ta Tôbia châta moleina hmo a taopa cha hmô na ta. Khazohpa o dôhpachhôh tlyhmia lia tlai ta a y nawpa chhôhpadâhpa vaw pachhuahpanoh ta.

⁸ Ei hiehâh ngaita ta, Tôbia hmobaoh zydua cha chhôhpadâhpa tawhta thy khai na ta.

⁹ Chatawhcha biepie na ta, chhôhpadâhpazy cha pathai ei ta, Khazohpa o hmobaohzy cha, niepa hlâna nata ropahâhpa chhaota a ngiakhei heih na ta.

¹⁰ Livai pathlazy tovyuh ama vaw pie leipa chhao pahno na ta. Chavâta raihriatuhpa Livai pathlazy nata hlasathaipazy cha ama lyu lâ chyu ta ama kua khai ha tyh.

¹¹ Chavâta ryureituhpazy cha bie a padai ei na ta, ama hnohta, “Khazia Khazohpa o he uasa leipa ta a y?” tah na ta. Awpakhy ei na ta, ama raihriana su chyu liata soh heih ei na ta.

¹² Zudâh mo zydua ta sâh su hrawh su kha, kresawhti nata sathaw thyuna sôh sona liata vaw soh ei ta.

¹³ Theihthaipa Selemiah nata chârohtuhpa Zadô nata Livai chyhsa Pedai zy cha thyuna sôh avaotuhpazy ta rao ei na ta. Âmo baotuhpa châta Mâtaniah sawchapawpa Zaku sawchapawpa Hâna rao na ta. Âmo cha ngâ tlâhpa ta pachâpa châ ei ta, ama rai cha ama unawhzy hnohta ama to awpa hmo raipa a châ.

¹⁴ Hy ei Khazohpa, he kyh liana heta nâ thei thlâh ha la, ei Khazohpa o nata a chakaona châta ei hmotao phapazy he pahlei khah y.

¹⁵ Cha nohzy liata, Zudâh râh liata chyhsazy ta kresawhti saohna khaohzy liata Pahânoh ta kre ama saohpa hmô na ta. Sapiahzy alâ vaw paphaosa ei ta. Kresawhtizy, kre theizy, theikuzy nata hmo to vaw paphaosapa ta, Pahânoh ta Zerusale vaw tlôkhei tyh ei ta. Niedo ama zuana noh kyh liata, âmo cha zikyu a râ ei na ta.

¹⁶ Khihpi liata a ypa Tyre mo chhao ta, nga nata hmo to vaw phaoh ei ta, Zudâh mo nata Zerusale mo hnohta Pahânoh ta zuah tyh ei ta.

¹⁷ Chavâta Zudâh nôpawpazy cha a padai ei na ta, ama hnohta, “Khazia Pahânoh papuapaleipa ta hmo moleipa nama tao?

¹⁸ Châ pathlatuhpazy chhao khata, he hawhta tao ei ta, eima Khazohpa ta he chhiena zydua he eima chô liata nata he khihpi chô liata a vaw patlôsapa châ vei ma? Pahânoh papuapalei ei chi ta, tahmâ Izarei chô liata pathiiana ru viapa nama vaw patlôsa ha hih,” tah na ta.

¹⁹ Zerusale thokhy chhikao liata a vaw zohpa nahta, Pahânoh a tlô hlâ chhao ta, ochhizy khaw khai ha awpa ta biepie na ta, Pahânoh a chhâ hlâlei pahy lei awpa ta bie papua na ta. Pahânoh ta hmo rai amâ ngiakhei lei nawpa ta, nâ chakaotuhpa thokha chhikaozy pavaisa ei na ta.

²⁰ Cha vâna chata sôhdaohpa nata hmo chi to a zuahpazy cha, Zerusale khôtho lâ liata zâ kha zâ no amâ rie pâ tyh.

²¹ Âmo cha zikyu a râ ei na ta, ama hnohta, “Khazia thokhy khôtho liata namâ rie tyh? Nama tao heih khiahta cha, nama chô liata ku ei pathla aw,” tah na ta. Cha rakha tawhta cha Pahânoh ta vaw tlô khao veih ei.

²² Livai pathlazy cha a pathai ta, Pahânoh pathaisa awpa ta, chhikaozy cha vaih awpa ta biepie ei na ta. Hy Khazohpa y, he kyh liana chhao heta nâ thei thlâh ha la, na zawngiahna hluh ngaitapa vâta rie na pahlôh mah y.

²³ Cha nohzy liata, Asadô chanôzy, Amawna chanôzy nata Môabâ cha­nôzy lapinô ta a hneipa Zu chyhsazy hmô na ta.

²⁴ Ama saw khophiezy cha Asadô reih tlao cheih ei ta, Zudâh reih cheih thei leipa ei ta, ama nôzy reih tlao ama chei khai haw.

²⁵ Âmo cha ra ei na ta, chhiesapa ei na ta, thokhazy cha tu ei na ta, ama sâzy phia na ta. Khazohpa moh ta bie pataihsa ei na ta, ama hnohta, “Nama sawchanôzy cha ama sawchapawzy nama pie awpa châ leipa ta, nama sawchapawzy châta tlyma, nâmo châta tlyma, ama sawchanôzy nama hnei awpa châ vei.

²⁶ Izarei bei Sawlawmaw chhao kha, cha hawhpa chanôzy vâta a molei hapa kha châ vei ma? Phopi hluhpi hry liata ano hawhpa bei y veih ei. Ano cha Khazohpa ta kyh a pachâpa châ ta, Khazohpa ta Izarei zydua chô liata bei ta a taopa a châ. Chatanachôta ano tlai chhao kha, chihropa chanôzy ta ama pamoleisa hapa a châ.

²⁷ Cha hawhta a châ khiahta cha, nama bie nathliepa ta, chihropa chanôzy lapinô ta hneipa moleina lai ngaitapa taopa ta, eima Khazohpa chô liata ngâchhih leipa ta eima y aw ma” tah na ta.

²⁸ Theihthai beichaipa Eliasi sawchapawpa Zehôdâ sawchapawpa pakha cha, Hôrô chyhsa Sanbâlâ piahpa châ ta. Chavâta ano cha keima tawhta ei papua haw.

²⁹ Hy ei Khazohpa y, theihthaipa raihria, theihthaipa biehrai nata Livai biehrai ama papuapaleipa vâta, âmo cha a thei thlâh ha mah y.

³⁰ Chatanachata chihropa a hniahnipa zydua tawhta âmo cha pathai ei na ta, theihthaipazy nata Livai pathlazy châta ama hria awpa ei raopa chyu ei.

³¹ Daihti raopa liata tho hlâna nata thei hmiatuapa hlânazy châta â ngiahpazy chhao ei pie ei. Hy ei Khazohpa, hmopha ei taopazy vâna heta nâ thei thlâh ha mah y.