NEHEMIAH 12 - Mara Bible RV (BSI)

Theihthaipazy nata Livai pathlazy

¹ Hezy he Siati sawchapawpa Zerubâbe nata Zesua hnohta a vaw liepa theihthaipazy nata Livai pathlazy ama châ. Theihthaipazy cha Seriah, Zeremiah, Ezrâ,

² Amaria, Mâluh, Hâtu,

³ Sekaniah, Rehu, Meremô,

⁴ Idô, Kinethô, Abiza,

⁵ Mizami, Mâdiah, Bilkâ,

⁶ Semiah, Zôiari, Zediah,

⁷ Salu, Amô, Hikia nata Zediah zy châ ei ta, âmo cha Zesua hro chhôh ta theihthaipazy nata ama unawhzy hry liata hyutuhpazy ama châ.

⁸ Livai pathlazy cha Zesua, Binu, Kâdamie, Serebiah, Zudâh nata Mâtaniah zy châ ei ta, Mâtaniah nata a unawhzy cha reithaina hla sana liata chhituhpazy ama châ.

⁹ Bâbukiah nata Uni nata ama unawhzy chhao, chakaona liata âmo dady ta a duahpazy ama châ.

¹⁰ Zesua cha Zôki paw châ ta, Zôki cha Eliasi paw châ ta, Eliasi cha Zôiadâ paw châ ta,

¹¹ Zôiadâ cha Zawnathâ paw châ ta, Zawnathâ cha Zadua paw a châ.

¹² Zôki hro nota theihthaipa ama pho pawhrâhpazy cha, Seriah pathlazy liata Meriah, Zeremiah pathlazy liata Hânaniah,

¹³ Ezrâ pathlazy liata Mesulâ, Amaria pathlazy liata Zehôhanâ,

¹⁴ Maluki pathlazy liata Zawnathâ, Sebaniah pathlazy liata Zawsi,

¹⁵ Hâri pathlazy liata Adanâ, Meraiô pathlazy liata Helakai,

¹⁶ Idô pathlazy liata Zekariah, Kinethô pathlazy liata Mesulâ,

¹⁷ Abizah pathlazy liata Zikari, Miniami nata Môdiah pathlazy liata Pilatai,

¹⁸ Bilkâ pathlazy liata Sâmua, Semiah pathlazy liata Zehônathâ,

¹⁹ Zôiari pathlazy liata Mâtenai, Zediah pa­thlazy liata Uzizi,

²⁰ Sâlai pathlazy liata Kalai, Amô pathlazy liata Ebe,

²¹ Hikia pathlazy liata Hâsabiah nata Zediah pathlazy liata Nethane zy ama châ.

²² Eliasi, Zôdâ, Zôhanâ nata Zadua zy hro nota Livai pathla pho pawhrâhpazy moh cha ro khaipa châ ta, Persia chyhsa Dâria â bei nota theihthaipazy moh chhao ro khaipa a châ.

²³ Livai pathla pawhrâhpazy moh cha, Eliasi sawchapawpa Zôhanâ daihti taihta, thâtihzy rona châbu liata ropa a châ.

²⁴ Livai pathla pawhrâhpazy cha, Hâsabiah, Serebiah, Kâdamie sawchapawpa Zesua nata âmo dady ta a duahpa ama unawhzy ama châ. Âmo cha Khazohpa chyhsa Dâvi biepiepa hawhta, reithaina hla sa awpa nata alyna bie reih awpa ta, a py py ta daihti raipa ama châ.

²⁵ Mâtaniah, Bâbukiah, Ôbadia, Mesulâ, Talmô nata Aku zy cha chhikao vaituhpazy châ ei ta, chhikao kiapâh liata hmo sona ozy vaituhpa ama châ.

²⁶ Âmo cha Zôki hro nota, râhvaotuhpa Nehemiah daihti nata theihthaipa nata chârohtuhpa Ezrâ daihti liata chakaona rai a hriapa theihthaipazy nata Livai pathlazy ama châ. Zôki paw cha Zesua châ ta, Zesua paw cha Zôzadâ a châ.

Zerusale thokhy hlâna

²⁷ Zerusale thokhy hlâna liata, paotlâzy nata tlaipihzy nata totâzy chhaota hlasapa nata alyna bie reipa ta, thokhy hlâna cha a ly ngaitapa ta hmâpa a châ thei nawpa ta, Livai pathlazy cha ama yna su chyu tawhta Zerusale lâ a vy khai awpa ta pahnosapa châ ei ta.

²⁸ Chatanachata Zerusale chheipâh liata a pahrâpa nata Netôpha mo khihzy liata a pahrâpa hlasathaipa pathlazy a hmôpakhy ei ta.

²⁹ Bekilkâ tawhta nata Kebâ nata Azamâve biazy tawh chhao ta hlasathaipazy vaw tlô ei ta. Hlasathaipazy ta Zerusale chheipâh liata khihzy amâ vaw padua hôlô.

³⁰ Theihthaipazy nata Livai pathlazy cha a pathai ei ta, zawpizy nata chhikaozy nata thokhy chhao ama pathai.

³¹ Zudâh chhituhpazy thokhy chô lâ kiakhei ei na ta, lyna hla hlâ awpa ta hlapy rônahpa py no rao na ta. Py kha cha chho lâta Hnaihny Chhikao lâ pangaipa ta thokhy chô liata sie ei ta.

³² Âmo cha Hôsai nata Zudâh chhituhpa khophiezy ta ama pazi.

³³ A pazipa ta Azariah, Ezrâ, Mesulâ,

³⁴ Zudâh, Benzami, Semiah nata Zeremiah zy sie ei ta.

³⁵ A pazipa ta theihthaipazy pathla chiahmie tôtuhpazy hry liatapa Zawnathâ sawchapawpa Zekaria sie ta. Zekaria cha Semiah sawchapawpa châ ta, Semiah cha Mâtaniah sawchapawpa châ ta, Mâtaniah cha Mikai sawchapawpa châ ta, Mikai cha Zaku sawchapawpa châ ta, Zaku cha Asâpha sawchapawpa a châ.

³⁶ Zekaria heinawhzy chhao sie hra ei ta, chazy cha Semiah, Azare, Milâlai, Kilâlai, Mâai, Nethane, Zudâh nata Hânani zy ama châ. Khazohpa chyhsa Dâvi tô tyhpa pyungiapa chhaichhizy chhaota sie ei ta, chârohtuhpa Ezrâ ta hmia â sah.

³⁷ Tihnawh Chhikao ama tlô nahta, chakhâ lâ a kiahpa thokhy, Dâvi khihpi lâ pangaina lâpi chhâhchabi a chhih ei ta, Dâvi o machhua lâta siepa ta, nochhi lâchhâh ta Ti Chhikao pangaipa ta ama sie.

³⁸ Lyna hla hlâtuhpa hlapy hropa cha maw lâta sie ei ta. Kei nata zawpi khophiezy chhao, âmo pazipa ta thokhy chô liata eima sie hra. Meihô Patina Osâhpa machhua lâta siepa ta, thokhy kawhpa lâ pangai ei ta.

³⁹ Epharai Chhikao, Zesanah Chhikao, Nga Chhikao, Hânane Osâhpa nata Zakha Osâhpa chô lia zy ta sie laih ei ta, Mietaku Chhikao tlôna taihta sie ei ta, Vaituhpa Chhikao liata amâ duah.

⁴⁰ Lyna hla hlâtuhpa hlapy py nozy cha Khazohpa o liata a duah ei ta, kei nata ryureituhpa khophie chhao a duah hra pi ta.

⁴¹ Chiahmie tôtuhpa theihthaipazy, Eliakima, Mâsei, Miniami, Mikai, Eliônai, Zekaria nata Hânaniah zy y ei ta,

⁴² Mâsei, Se­miah, Eliaza, Uzizi, Zehôhanâ, Mâkia, Elâmi nata Eze zy ama y hra. Hlasathaipazy ta Zezrâhia chhihthana ry liata ao paro ngaitapa ta hla sa ei ta.

⁴³ Cha noh liata atheihna hluhpi hlâ ei ta. Khazohpa ta alyna rônahpa a patosapa vâ ei ta, chanô nata hawtizy chhaota a ly ngaitapa ta y ei ta. Zerusale alyna cha lâhlapi tawh chhao ta thei theipa a châ.

Achhyna o liata chakaona

⁴⁴ Cha daihti liata, hmo sona chhôhpadâhpazy, thyunazy, thei hmiatuapazy nata su hrawh su khazy mohôhtuhpazy raopa châ ei ta. Âmo cha ryhpa ta â hnawpa hawhta, khih to lyuzy tawhta theihthaipazy nata Livai pathlazy tovyuh ama piepazy pahmaoh ta a mohôh awpazy ama châ. Zudâh mo cha theihthaipazy nata Livai pathlazy chakaona liata amâ ly ngaitapa vâta, theihthaipazy nata Livai pathlazy tovyuh ama pie tyh.

⁴⁵ Chatanachata theihthaipazy nata Livai pathlazy cha, Dâvi nata a sawchapawpa Sawlawmaw biepiepa hawhta, ama Khazohpa chakaona rai nata pathaisana chakaonazy hria lymâ ei ta, hlasathaipazy nata chhikao vaituhpazy chhao ta chakaona rai ama hria awpazy ama hria lymâ hra.

⁴⁶ Hlâno Dâvi nata Asâpha daihti no tawhta, hlasathaipa py chhituhpazy vaw y ha ei ta, Khazohpa lâta alyna bie reina nata reithaina hla sanazy liata ama vaw chhihtha tyh.

⁴⁷ Zerubâbe nata Nehemiah daihtizy liata cha, Izarei saw zydua ta hlasathaipazy nata chhikao vaituhpazy tovyuh noh chareih ta pie tyh ei ta, Livai pathlazy tovyuh chhao pananopa ei ta, Livai pathlazy ta Arawna pathlazy tovyuh awpa ama panano pachhuah tyh.