NEHEMIAH 11 - Mara Bible RV (BSI)

Zerusale liata chhituhpazy

¹ Izarei phopi chhituhpazy cha Zerusale liata pahrâ ei ta. Ahropazy deikua cha, nuby a dao ei ta, pahrawh liata pakha khihpi pathaihpa Zerusale liata pahrâ ei ta, pahrawh liata pachaki cha khih hropazy liata pahrâsapa ama châ.

² Âmo khotlyna tlai ta Zerusale liata pahrâ awpa ta a hlâ theipazy cha, zawpizy ta byhnâ ama awpa.

³ Hezy he Zerusale liata a pahrâpa râh chhituhpazy ama châ. Izarei saw hropazy, theihthaipazy, Livai pathlazy, Achhyna o chakaotuhpazy nata Sawlawmaw chakaotuhpa pathlazy deikua cha Zudâh râh liata ama khihzy liata ama o chyu liata ama pahrâ.

⁴ Zudâh nata Benzami pathla thokhazy Zerusale liata pahrâ ei ta, Zudâh chi tawhta Zerusale liata a pahrâpa cha Uzia sawchapawpa Athiah châ ta, Uzia cha Zekaria sawchapawpa châ ta, Zakariah cha Amaria sawchapawpa châ ta, Amaria cha Sephatiah sawchapawpa châ ta, Sephatiah cha Mâhalâle sawchapawpa châ ta, Mâhalâle cha Pereza pathlazy hry liatapa a châ.

⁵ Pereza pathlazy hry liata Bâruka sawchapaw Mâsei chhao Zerusale liata a pahrâ hra. Bâruka cha Kôhôzeh sawchapawpa châ ta, Kôhôzeh cha Hâziah sawchapawpa châ ta, Hâziah cha Adiah sawchapawpa châ ta, Adiah cha Zôiari sawchapawpa châ ta, Zôiari cha Zekaria sawchapawpa châ ta, Zekaria cha Silôni chyhsa sawchapawpa a châ.

⁶ Pereza pathla Zerusale liata a pahrâpa zydua cha pasaipha 468 ama châ.

⁷ Benzami pathla Zerusale liata a pahrâpa cha Mesulâ sawchapawpa Salu châ ta, Mesulâ cha Zôedâ sawchapawpa châ ta, Zôedâ cha Pedai sawchapawpa châ ta, Pedai cha Kôliah sawchapawpa châ ta, Kôliah cha Mâsei sawchapawpa châ ta, Mâsei cha Ithelâ sawchapawpa châ ta, Ithelâ cha Zesai sawchapawpa a châ.

⁸ A unawhzy chhaota ama zydua ta pasaipha 928 ama châ.

⁹ Zikari sawchapawpa Zôela cha ama hyutuhpa châ ta, Hâsenuah sawchapawpa Zudâh cha khihpi hyutuhpa panona a châ.

¹⁰ Zerusale liata a pahrâpa theihthaipazy cha, Zôiari sawchapawpa Zediah, Zaki nata

¹¹ Hikia sawchapawpa Seriah zy ama châ. Hikia cha Mesulâ sawchapawpa châ ta, Mesulâ cha Zadô sawchapawpa châ ta, Zadô cha Meraiô sawchapawpa châ ta, Meraiô cha Khazohpa o liata ryureituhpa Ahitu sawchapaw­pa a châ.

¹² Abeipa o liata raihriatuhpa ama unawhzy chhaota ama zydua ta 822 ama châ. Zehôrâ sawchapawpa Adiah chhao Zerusale liata a pahrâ. Zehôrâ cha Pelaliah sawchapawpa châ ta, Pelaliah cha Amazi sawchapawpa châ ta, Amazi cha Zekaria sawchapawpa châ ta, Zekaria cha Pâsu sawchapawpa châ ta, Pâsu cha Mâkia sawchapawpa a châ.

¹³ A ama pho pawhrâhpa a unawhzy chhaota 242 ama châ. Azare sawchapawpa Amasai chhao Zerusale liata a pahrâ. Azare cha Ahazai sawchapawpa châ ta, Ahazai cha Mesilemô sawchapawpa châ ta, Mesilemô cha Ime sawchapawpa châ ta,

¹⁴ ama unawhzy chhaota pasaipha 128 châ ei ta, ama hyutuhpa cha Hakedôli sawchapawpa Zabadie a châ.

¹⁵ Zerusale liata a pahrâpa Livai pathlazy hry liata Hâsuba sawchapawpa Semiah a hlao ta, Hâsuba cha Azrikâ sawchapawpa châ ta, Azrikâ cha Hâsabiah sawchapawpa châ ta, Hâsabiah cha Buni sawchapawpa a châ.

¹⁶ Khazohpa o khôtho lâ raihria mohôhtuhpa Livai pathla pawhrâhpazy cha Sabethai nata Zôzabâ ama châ.

¹⁷ Mikâ sawchapawpa Mâtaniah chhao Zerusale liata a pahrâ. Mâtaniah cha Zabidi sawchapawpa châ ta, Zabidi cha Asâpha sawchapawpa a châ. Asâpha cha reithaina hla chhituhpa châ ta, alyna bie a reih tyhpa a châ. A pilâhpazy hry liata a panona Bâbukiah nata Sâmua sawchapawpa Abadâ zy chhao Zerusale liata ama pahrâ hra. Sâmua cha Kalâ sawchapawpa châ ta, Kalâ cha Zeduthu sawchapawpa a châ.

¹⁸ Khihpi pathaihpa liata Livai pathla a ypazy cha ama zydua ta 284 ama châ.

¹⁹ Zerusale liata a pahrâpa chhikao vaituhpa Aku, Talmô nata ama unawhzy cha ama zydua ta 172 ama châ.

²⁰ Izarei saw hropazy nata theihthaipa nata Livai pathla hropazy cha Zudâh râh liata ama khihzy liata ama ryuto râh chyu liata ama pahrâ.

²¹ Achhyna o chakaotuhpazy deikua Ôphe liata pahrâ ei ta, Ziha nata Kispâ cha Achhyna o chakaotuhpazy hyutuhpa ama châ.

²² Zerusale liata Livai pathlazy hyutuhpa cha Bâni sawchapawpa Uzizi a châ. Bâni cha Hâsabiah sawchapawpa châ ta, Hâsabiah cha Mâtaniah sawchapawpa châ ta, Mâtaniah cha Mikhâ sawchapawpa châ ta, Mikâ cha Asâpha pathlazy hry liatapa a châ. Asâpha pathlazy cha hlasathaipazy châ ei ta, Khazohpa o raihria mohôhtuhpazy ama châ.

²³ Âmo kyh liata bei biepiepa y ta, noh chareih amâ ngiah awpa zie ta ama niedo piepa ama châ.

²⁴ Zudâh sawchapawpa Zerâ pathlazy hry liata Mesezabe sawchapawpa Pethâhiah cha, zawpizy hmo peimawhpa pachâna kyh zydua liata abei kuphei a châ.

Zerusale khôtho lâta khihzy

²⁵ Zudâh chi thokhazy cha khitawzy nata ama lyuzy liata ama pahrâ. Kiriathâbâ nata a khichapeihzy, Dibô nata a khichapeihzy, Zekaze nata a khichapeihzy,

²⁶ Zesua nata Môladâ nata Bepele,

²⁷ Hâzasua, Besebâ nata a khichapeihzy,

²⁸ Zikalâ, Mekônâ nata a khichapeihzy,

²⁹ Enrimô, Zôrâh, Zamu,

³⁰ Zanôh nata Adulâ nata ama khichapeihzy, Lakhi nata ama lyuzy nata Azekâ nata a khichapeihzy liata pahrâ ei ta, Besebâ tawhta Hinô saikao taihta riehmozy ama paryh.

³¹ Benzami pathlazy chhao Kebâ tawhta pahrâ pathao ei ta, Mikamâ, Aiza, Bethel nata a khichapeihzy,

³² Anathô, Nôbâ, Ananiah,

³³ Hâzaw, Râmâ, Kitai,

³⁴ Hâdi, Zabôi, Nebalâ,

³⁵ Lôdi nata zôthaipazy saikao Ônô zy liata ama pahrâ.

³⁶ Zudâh râh liata Livai py thokha chhao Benzami râh liata pahrâna suzy piepa ama châ.