NÂHU 3 - Mara Bible RV (BSI)

Ninivâ hupona

¹ Thisaih a palopa khihpi cha a hu a po na! Haipa biezy nata hraonazy ta bie ta, A sa taipa chie beih vei.

² Chheina pyu ta bie ta, Tiaki a hluahpa pyuzy ta a bie; Arâ a pathluahpa pyu ta bie ta, Talailih a zawpa pyuzy ta a bie.

³ Arâ pheisaihzy ta zaozi pathlipa ta a dyuh ei ta, Asei patliepazy ta amâ dyuh; Zasâh manôh ama thiepa rizy a pacho hôlô ta, Athihpa ri chhâ thai khao vei. Chyhsa rizy liata amâ pachhi!

⁴ Cha zydua cha, Âzuahnô sihryhna rei tiah leipa vâta châ ta, A khoiah hneina nata a dyuthaina vâta a châ; A sihryhna ta râhzy zuah ta, A dyuthaina ta phopizy a zuah tyh.

⁵ Hy Ninivâ, moh teh, ei châ dyuh hih, Pheisaihzy Abeipa ta a tah. Na hmia khuna taihta na hnorâh ty aw na ta, Phopizy na thluahruana pamosa aw ei na ta, Khinarâhzy na nozana ei pamosa aw ei.

⁶ Apuapa cha thy thlu aw na ta, Saw ta cha reih aw va na; Pahneiparâsaopa ta ei cha soh aw.

⁷ Châ hmôpa zydua ta châ sysai aw ei ta, “Ninivâ cha roryhrapa ta y ha ta, Ahy ma ano châta mâchhie a sa aw?” Ama tah aw. Thlah châ palôh awpazy cha, Khataih liata ei tlua aw?

⁸ Thebe khihpi hlâta na pha via ma? Nile chavah kiah liata y ta, Ti ta chadôpa ta, A diahsua tilaipi châ ta, A thokhy tizy a châpa hlâta na pha via ma?

⁹ Kusi nata Izi cha a thatlôna châ ta, A thatlôna ta chhâna hnei vei; Puti nata Libia mo chhao, Ano baotuhpazy ama châ.

¹⁰ Chatanachôta Thebe cha papaipa châ ta, Seichâna lâ a siepa kha; Khiliah su to liata A hawsaihzy taichheihpa châ ei ta, A chyhsa zachhihpazy cha, Nuby a daopa ta amâ rai; A chyhsa rônahpazy chhao, Bâliazy ta ama chahry.

¹¹ Nâ chhao paripa ta a nyu aw chi ta, Na chariahpa tawhta abohna na tlua aw.

¹² Na thokhyzy cha theiku kô hawhta châ ei ta, Theiku kô hmoh tuapa hawhta ama châ. Chalyupa ama châ khiahta cha, Nietuhpa pakah lâ ama zô tyh.

¹³ Na pheisaihzy kha moh tua, Chanôzy ama châ khawh. Na râh thokhy chhikaozy cha, Na chariahzy hmia liata a kawh pi ta â pahy; Na thokhy chhikao hraina lâhreizy chhao, Mei ta a kâ khai haw.

¹⁴ Dôhpa ta na y chhôh châta ti thaih la, Na thokhyzy pa-i teh; Beihlei yna lâ sie la, Pachawhpâna beihlei tly la, Beihlei raona chakoh kei patu teh.

¹⁵ Cha liata mei ta cha kâsao aw ta, Zaozi ta a cha chhawh pachhô aw. Khawsu ta chicheipa a nie khaipa hawhta, Nâ chhao zaozi ta a cha nie khai aw; Khawsu hawhta pôhpa ta, Khawthlôhraihpa hawhta pôh hra la.

¹⁶ Vâ awhsizy hlâta hluh viapa ta, Na sôhdaohpazy papôh chi ta, Châhrasala khawsuzy hawhta, Râh nie khai ei ta amâ zaw syulyu haw.

¹⁷ Na beimachâzy cha, Khawthlôhraihpa lyu ei ta; Na pheisaih hyutuhpazy chhao, Chasipaw daihti sadô diahpai liata Khawsu a pahmaohpa ama lyu. Noh a vaw chhi nahta, A zaw ha tyh ei ta, Ama yna su a pahnopa y khao tyh veih ei.

¹⁸ Hy Asuria bei, Na mietaku vaituhpazy a mô ei ta, Na beimachâzy amâ môkua haw. Na phopi cha tlâhpizy liata viavi ei ta, A pakhy awpa y veih ei.

¹⁹ Na hmah ru ngaita ta, Na pasana pahua nawpa y vei; Na thâ a theipa zydua ta Ama ku ama cha chabaih chie. Chhiena na taopa chhâ beih leipa vâta, Pasa a tao leipa ahy ma a y?