MIKÂ 7 - Mara Bible RV (BSI)

Pachhatuh Khazohpa hâ teh u

¹ Ei hupo rimâ cha! Nopi daihti theilâpa pakhy nota, Kre theizy kâmo thoh nota, A sao nie awpa a y leipa hawhta châ na ta; Ei hro ta a tlaichhai kawpa Theiku hmoh tuapa y leipa hawhta dia ei châ haw!

² Khazohpa chyhsa cha, Alei tawhta leidia ha ta; Chyhsapa hry liata Adopa rai y khao veih ei; Thisaih palo awpa ta a byhpa sai châ ei ta, Sao ta a unawhpa a chadipa sai ama châ.

³ Ama kuzy ta moleina hmo taopa a saomâ kaw ta, Beimachâ nata ryureituhpa zy ta Panaopapana amâ hnaw; Molaipa ta a palôh ta moleina hmo a tao khohpa reih papua ta, Cha hawhna chata ama patipatyh khoh tyh.

⁴ Ama hry liata chyhsa pha chaipa cha, Bôbaw hawh dei a châ; Chyhsa do chaipa chhao, Ahloh buh hawh dei a châ. Châ vaituhpazy noh vaw tlô ta, Nâmo hriena noh a vaw tlô; Ama nôpona noh â hnia haw.

⁵ Na opapa zo leipa la, Na viasa chhao ngâ khah y; Na kalachhôh liata a ziapa tawhta Na pakah ochhi vaih mah y.

⁶ Sawchapaw ta a paw saw ta rei leipa ta, Sawchanô ta a nô a dyuh ta, Myuhnô ta a nohnô tei ta, Chyhsapa chariahpazy cha, A o liata chyhsazy cheingei ama châ.

⁷ Kei deikua cha Abeipa lâ ei moh aw; Ei pachhana Khazohpa hâ aw na ta, Ei Khazohpa ta einâ thei aw.

Abeipa ta Pachhana a vaw tlôkhei

⁸ Hy ei chariahpa y, Na palôh nâ eih khah y; Ei paopa chhao ta, Ei thyu heih aw; Zohna lia ei tyupa chhao ta, Abeipa cha ei khaihna a châ aw.

⁹ A chô liata ei molei hapa vâta, Ei kyh na reikhei sala, Pachiana eina taopa hlâlei cha, Abeipa ruchhôna ei phaoh aw. Khaihna lâ nâ chhi papua aw ta, A thaipachâsana ei hmô aw.

¹⁰ Chatanachata, “Abeipa na Khazohpa cha, Khataih liata ma a y haw?” Nâ tahtuhpa ei chariahpa ta hmô aw ta, Nozana ta a khu aw. Ei mozy ta panawhpa ta a ypa cha moh aw ta, Lâpi chiatlao hawhta tlypâpa a châ bâ aw.

¹¹ Na thokhyzy chhôh nawpa noh a vaw tlô hai! Cha noh liata na râhri pakawhpa a châ aw.

¹² Asuria tawhta Izi khihpizy taihta, Izi tawhta Chavah taihta, Tilaipi tawhta tilaipi taihta, Tlâhpi tawhta tlâhpi taihta, Cha noh liata nâ lâ amâ vy aw.

¹³ Râh deikua cha a chhôh liata a pahrâpazy vâta, Roryhrapa ta y aw ta; Ama hmotao theilâpazy vâta, Roryhrapa ta a y aw.

¹⁴ Na chôchahrei ta na phopi cha vaih la, Na ryuto mietaku zaw cha vaih mah y. Âmo cha lyurâhpa liata âmo dei ta a ypa châ ei ta, Sadô liata âmo dei ta a ypa ama cha. Hlâno hawhna khata, Bâsanâ nata Kilia liata ama lao bâ heih mawh ei sy.

¹⁵ Izi râh tawhta na kaw puana nohzy hawhna khata, Hmo noâhpazy ei pahmô aw ei.

¹⁶ Phopizy ta hmô aw ei ta, Thatlô amâ tah kawna zydua ama zakhei aw; Ama pakahzy a chahu aw ei ta, Ama nahzy a pâ aw.

¹⁷ Parih hawhta dohlei palie aw ei ta, Alei liata âlyhpasazy hawhta dohlei ama palie aw. A chalyuna chôta ama thokhyzy tawhta amâ vy aw; Thlazohpa ta Abeipa eima Khazohpa lâ a heih aw ei ta, Nâ cha ama cha chi ngaita aw.

Khazohpa kyhpachâna nata zawngiahna

¹⁸ Nâ hawhta a ryuto laibâhpazy moleina a ngiahthai ta, Ama paraona a mopakhôpa Khazohpa he, Ahy ma a y? Ano cha kyhpachâna tleih beih leipa liata â lypa vâta, A hiehâhna cha chhâzaw ta a vao thlâh ha vei.

¹⁹ Zawh miah a ngiah heih aw ta, Eima moleinazy phei ta a tlypâ aw. Eima moleina zydua cha, Tilaipi ry lâ na thy ha aw.

²⁰ Miah pathlatuhpazy hnohta Hlâno tawhta bie nâ vaw taih hapa hawhta, Zakaw chô liata ngâchhihna palâsa aw chi ta, Abarahâ chô liata kyhpachâna tleih beih leipa na palâsa aw.