MIKÂ 6 - Mara Bible RV (BSI)

Abeipa pachiana

¹ Abeipa biereipa he thei teh u: Thyu la, tlâhpizy hmiakô liata na bie a duakhei la, Tlâhthlôhzy ta na ao thei mawh ei sy.

² Nâmo, tlâhpizy saih u, Nâmo, leilô abôna hlôpazy saih u, Abeipa ta a phopi a leihna bie he nathlie tua u; Abeipa ta ano phopi leih nawpa hnei ta, Izarei cha â dyuh aw.

³ “Hy ei phopi, khâpa ma na chô liata ei tao? Kheihta ma na rie ei cha pathei? Nâ chhy tua.

⁴ Izi râh tawhta châ kaw chhi papua na ta, Seichâna o tawhta ei cha chatlai; Na hmia lâta Mawsi cha tuapa na ta, Arawna nata Miria ei cha tuapa.

⁵ Hy ei phopi, Môabâ bei Bâlâka ta Nama chô liata tao â chhuahpazy kha a thei u la, Beô sawchapawpa Bâlâma ta  chhynazy chhao kha a thei teh u; Siti tawhta Kilkal taihta Hmo tlôpazy kha a thei teh u; Chatanachata Abeipa ta Siana ta hmo a taopazy nama pahno thei aw.”

Abeipa ta â hnawpa

⁶ “Khâpa a cheipa ta ma, Abeipa hmiakô lâ vawh aw na ta, Khazoh chônôchaipa hmiakô liata ei bôh aw tly? Raopa hlânazy cheipa ta ma, Viahchaotaw kô khapazy cheipa ta ma, Abeipa hmiakô lâ cha ei vawh aw?

⁷ Mietaku tôhpa sâh hluhpi cheih aw sah la, Abeipa cha a palysa aw ma? Sathaw chavah thy hluhpi ta Abeipa cha a palysa aw ma? Ei sawchapaw uhtheipa he ma, Ei paraona ngiahthai nawpa ta ei hlâ aw? Ei pôhpa thei he ma, Ei thlahpa moleina ngiahthai nawpa ta ei hlâ aw?”

⁸ “Hy chyhsapa, Abeipa ta hmo phapa a cha chho haw; Abeipa ta khâpa ma a châ hnaw? Adona taopa ta, Ngâchhihna pasô ta, Nawhna hro hrokheipa ta, Na Khazohpa nata charei khohpa he châ vei ma?”

Moleipa pahleipadiana

⁹ Abeipa ao ta khihpi awsao ta, Na moh chi awpa ta sona ao a châ: “Sôsi bie nathlie u la, Ano a raotuhpa bie nathlie teh u.

¹⁰ Moleipa o liata moleina sôhzy ei my thei aw ma? Chhiesapa ta a ypa panuana tloh leipa ei my thei aw ma?

¹¹ Khopathliahna doleipa a hmâhpa cha, Thai ei pachâsa aw ma? A sahria liata khopathliahna lô doleipa a khôpa cha, Thai ei pachâsa aw ma?

¹² Khihpi liata hneirôhpazy cha, Thachahra hmâna ta ama bie; A khihsawzy ta haipa biezy reih ei ta, Ama paleih ta ama pakah chhôh liata Dôveina bie a reih tyh.

¹³ Chavâta kei chhao ta, A pasa kawpa ta cha tu na ta, Na moleina vâta, Roryhrapa ta ei cha tao haw.

¹⁴ Nie aw chi ta, Châhrasala na rih bie leipa aw ta, Na chhôh liata nodina khâ a y aw; A papai sai ta papai aw chi ta, Pachô thei aw va chi; Na pachô tlakaihpa cha, Zaozi hnohta ei pie aw.

¹⁵ Chi tu aw chi ta, Châhrasala hria aw va chi; Ôli saoh aw chi ta, Châhrasala sathaw a thu aw va chi; Kre thei saoh aw chi ta, Châhrasala kresawhti doh aw va chi.

¹⁶ Ômri bieraopazy chhy ei chi ta, Ahabâ pathla hmotaopa zydua chhy hrapa ta, Ama ryhraonazy nama zipa vâta, Roryhrapa ta cha tao aw ei na ta, Khihsawzy ama ao pasih aw ei ta, Ei phopi nozana cha nâmo ta nama phaoh aw.”