MIKÂ 5 - Mara Bible RV (BSI)

Ryureituhpa a vaw pih aw

¹ Hy pheisaihzy sawchanô y, Na pheisaihzy pahmaohpakhy teh; Miah dôh ei ta, Izarei ryureituhpa baih liata Chôchahrei ta ama tu hih.

² Nâ, Bethlehe Ephrâthâ y, Zudâh phozy hry liata chyh chaipa châ hra la, Nâma tawhta ei châta Izarei ryureituhpa a vaw pua aw. Ano cha hlâno tawhta a y hapa châ ta, Chhâzaw ta a y kôzawpa a châ.

³ Chavâta sawzeihpa ta saw a sa hlâlei cha, Abeipa ta âmo cha a heihsai chy aw ta, Cha khai tawhta a unawh laibâhpazy cha, Izarei sawzy lâ ama kua heih aw.

⁴ Ano cha a duah aw ta, Abeipa thatlôna ta a mietaku zaw a vaih aw; Abeipa a Khazohpa moh rônahna ta A mietaku zaw cha a vaih aw ei. Â bohpa ta y aw ei ta, A rônahna cha, Khizaw kaokih chhâna taihta a tlô aw.

⁵ Ano cha ama thlalôhna a châ aw. Asuria ta eima râh lâ a vypa ta, Eima abei ozy a tlypâ khiahta cha, Ano a dyuh awpa ta, Mietaku vaituhpa pasari pathyu aw pi ta, Beimachâ pacharie eima pathyu aw;

⁶ Asuria cha zaozi ta parao aw ei ta, Nimraw râh cha â ngiana liata ama parao aw. Asuria cha eima râh lâ a vy sala, Eima râh chhôh liata a phei a vaw tly tita, Ano ta miah a pachha aw.

Laibâhpazy pachhana

⁷ Zakaw laibâhpazy cha, Phopizy hry liata ama y aw; Abeipa tawhta diati hawhta châ aw ei ta, Sibiepa chô lia vâsua hawhta ama châ aw; Chyhsa châta pahawhpasâh leipa aw ei ta, Chyhsa sawzy hâ hra aw veih ei.

⁸ Zakaw laibâhpazy cha, Râhsazy hry liata chakeibarôhneipa hawhta Râhzy hry liata y aw ei ta, Mietaku zaw hry liata chakeibarôhneipa lochopa hawhta Phopizy hry liata ama y aw. A chapia ti ei ta, Âmo cha alei liata a tlypabai aw ei; Âmo cha hriechheih khai aw ta, A pachha thei awpa y veih ei.

⁹ Na khakhaipazy chô lâta na ku hy aw chi ta, Na chariahpazy cha chhawh pathlahpa ama châ aw.

¹⁰ Abeipa ta hetana heta a tah: “Cha noh liata, Na arâzy nâ tawhta chhawh pathlah aw na ta, Na talailihzy ei parao aw.

¹¹ Na râh khihpizy parao aw na ta, Na thokhy zydua ei pacho khai aw.

¹² Dyuthaipazy na ku tawhta chhawh pathlah aw na ta, Kulâ moh thaipazy hnei khao aw va chi.

¹³ Na khazoh nothlahpazy chhawh pachhô aw na ta, Na panana tôhzy ei chhawh pachhô khai aw; Chatanachata na ku ta a taopazy lâta A bôh heih khao aw va chi.

¹⁴ Na Aseri tôhzy nâma tawhta phia aw na ta, Na khihpizy ei parao aw.

¹⁵ Reingiah leipa phopizy chô liata, Hiehâhna nata pathiiana ta phuh ei la aw.”