MIKÂ 4 - Mara Bible RV (BSI)

Abeipa Tlâh

¹ Noh hnôhlâzy liata cha, Hetana heta a vaw châ aw: Abeipa o tlâh cha, Tlâhpi a sâh chaipazy liata paduapa châ aw ta, Tlâhthlôhzy chô lâta chaluahpa a châ aw; Chatanachata phopizy ta ama by aw.

² Zaio tawhta ryhpa bie pua aw ta, Zerusale tawhta Abeipa bie a pua aw; Chavâta phopi hluhpi a vy aw ei ta, “A vy teh u, Abeipa Tlâh lâ khy sih la, Zakaw Khazohpa o lâ khy suh u; Chatanachata a lâthlôhzy miah pachu aw ta, A lâpizy eimâ chhih thei aw,” Ama tah aw.

³ Khazohpa ta phopizy likah liata bie pachia aw ta, Lâhlapi liata phopi thatlôpazy châta biepathluna a tao aw; Ama zaozizy cha, Leipaliena thua pazaopa lâta daih aw ei ta; Ama aseizy cha, Theilâ kô taina tâkô lâta ama daih aw. Râh kha nata râh kha zaozi a hy thlu khao leipa aw ei ta, Adyuhna kyh a chu khao aw veih ei.

⁴ Chyhsa to ama kre zôh ry liata a tyuh aw ei ta, Ama theiku kô ry chyu liata amâ tyuh aw; Ahy ta hmah pachisa khao aw veih ei, Pheisaihzy Abeipa pakah ta a reih haw.

⁵ Phopi to ama khazoh moh chyu ta charei ei ta, Keimo deikua cha, Abeipa eima Khazohpa moh ta, Chhâzaw nata tlyzaw ta eima charei aw.

Abeipa ta Zaio a pachha aw

⁶ Abeipa ta hetana heta a tah: “Cha noh liata, Pheisypazy ei pakhy aw ei; Ama yna su tawhta papuapazy pahmaoh aw ei na ta, Pasataopazy ei pahmaohpakhy aw ei.

⁷ Pheisypazy cha, Laibâhpazy ta tao aw ei na ta; Thy hapazy chhao, Râh thatlôpa ta ei tao aw ei; Abeipa ta Zaio tlâh liata, Ama chô liata ryu a reih aw; Tahmâ tawhta ama chô liata ryureih aw ta, Chhâzaw ta ryu a reih aw.

⁸ “Hy nâ, mietaku zaw o sâhpa, Zaio sawchanô pahrâna tlâh y, Kha hlâta abeina kha nâ lâ vaw tlô heih aw ta, Zerusale sawchanô abeina nâ lâ a vaw tlô heih aw.

⁹ “Khazia aoh tlili ta na cha? Abei hnei va chi ma? Ryh châ raokheituhpa a leidia ha ma? Chanô sawzeih pasapa hawhta ma, Pasana ta a cha patu haw?

¹⁰ Hy Zaio sawchanô y, Chanô sawzeihpa hawhta, A taikalô la a rôh teh; Khihpi tawhta pua aw chi ta, Lyurâhpa liata na pahrâ aw; Babylaw lâ sie aw chi ta, Cha liata pachhapa na châ aw; Cha liata na chariahpazy ku tawhta Abeipa ta a cha chatlai aw.

¹¹ “Nâma châ dyuh awpa ta, Phopi hluhpi a hmaohpakhy ei ta, ‘Papuapaleipa ta y sala, Eima mozy ta Zaio tawpâ mawh sy,’ ama tah.

¹² Abeipa pachânazy pahno leipa ei ta, A hmochhuahpazy ama novâh vei; Sawhri liata sapiah pahmaohpa hawhta, Âmo cha a pahmaoh hapa pahno veih ei.

¹³ Hy Zaio sawchanô y, Thyu la, sâh tly teh; Thua ta na ki tao aw na ta, Dawh ta na chakiezy ei tao aw; Chatanachata phopi hluhpizy cha, Na pakeichheih aw ei. Ama sâhzy Abeipa lâ hlâ aw chi ta, Ama sôhzy khizaw zydua Abeipa lâ na hlâ aw.”